Jeremías 22

1Señor Diosmi niwarqan: Reypa wasinta rispa kay willakuyta willamuy, 2Davidpa kamachikuy tiyananpi tiyashaq Judá reyman, oficialninkunaman, reypa wasin punkunta haykuq runakunamanwan, Señor Diospa siminta uyariychis, nispa. 3Señor Diosmi nin: Allinta ruwaychis chaninchaychispas, runaq kallpan suwakuqpa atiyninmanta sarunchasqata hoqariychis, ama ima mana allintapas ruwaychischu, amallataq k'iriychischu wak llaqtayoqkunatapas, wakcha wawakunatapas, viudakunatapas. Ama wañuchiychischu mana huchayoqkunatapas. 4Kay kamachisqayman hinachus kawsankichis chayqa, kallanqapunin Davidpa kamachikuy tiyananpi tiyaq reykuna. Paykunan oficialninkunantin runankunantin qhapaq wasiq punkunta haykunqaku carretapi caballopi ima. 5Ichaqa kay kamachisqayta mana kasuwankichischu chayqa, ñoqa Señor Diosmi jurani kay qhapaq wasiq raqay-raqayman tukupunanpaq, nispa. 6Señor Diosmi Judá reypa ayllunta nin: Galaad orqo hinan qanqa ñoqapaq kanki, Libanoq k'awchin hinan qanqa ñoqapaq kanki, ichaqa juranin qanta purunyachinaypaq, ñawpa llaqta chiriyasqata hina ruwanaypaq. 7Hachantin runakunatan kachamusaq qanta chaqonasuykipaq, munay sumaq cedro sach'aykichistan wit'unqa, ninawantaq kanaykunqa, nispa. 8Chaymantataqmi chay llaqtanta purispa hinantin suyu runakuna tapunakunqa: ¿Imanaqtintaq Señor Diosqa kay hatun llaqtatari kay hinata ruwarqan? nispa. 9Kutichinqakutaq: Diosninku Señor Dioswan rimanakusqankuta mana hunt'aspan wikch'upusqaku, hinaspan wak dioskunata yupaychapusqaku servipusqaku ima, chaymantan khayna kapurqanku, nispanku. 10Ama waqaychischu rey Josiasmantaqa, ama llakikuychischu wañusqanmantaqa. Aswanpas churin Salummanta khuyayta waqaychis, payqa mana kutimuqllañan ripushan, payqa manapuniñan paqarisqan hallp'amanqa kutimunqañachu. 11Judá rey Josiaspa churin Salummi taytanpa rantinpi rey karqan. Paymantaqa Señor Diosmi nin: Kay suyumanta lloqsipuspan manaña kutimunqañachu, 12aswanmi kamachipaq apasqa llaqtapi wañunpunqa, manañataq kay suyutaqa rikunqañachu, nispa. 13¡Ikiraqmi runaq kallpanta suwakuspa wasinta ruwakuqqa! Paymi altos wasikunata ruwakun runata mana allinta ruwaspa, paymi yanqallan llank'achikun llaqtamasinwan, manataq llank'asqanmanta qopunchu. 14Paymi nin: Hatun wasita ruwakusaq, patanpi hatuchaq wasikunayoqta, nispa. Ventanakunatapas kicharqarin, perqantapas cedro tablawan qatarqon, pukawantaq llunch'irqon. 15¿Qan yuyankichu rey kayqa cedro tabla chawpipi tiyay kasqanta? Taytaykiqa allintan mikhurqan, ukyarqan, allintataqmi ruwarqanpas, chanincharqanpas, chayraykun tukuy imakunapas allinkama karqan. 16Wakchakunamantawan pisichasqakunamantawanmi payqa sayarikuq, chaymi allinkama ima ruwasqanpas karqan. Chaykuna ruwaqmi ñoqa reqsiqqa. 17Qanmi ichaqa, qan kikillaykipaq imatapas yuyapakunki mana chaninwan imapas tarinaykita. Mana huchayoqkunatan wañuchinki, llaqtaykitan sarunchanki, kallpantapas suwakunki. Ñoqa Señor Diosmi chayta nini. 18Chayraykun Judá rey Josiaspa churin Joacimmanta Señor Diosqa nin: Manan pillapas wañusqanmanta waqaq kanqachu, manapunin pillapas waqaspa niq kanqachu: ¡Ikiraqmi wawqelláy! ¡Imaraqmi panalláy! ¡Ikiraqmi wiraqocháy! ¡Imaraqmi reyníy! nispa. 19Wañusqa asnota hinan hawaman aysarparinqaku, Jerusalenpa qhepanmanmi wikch'umunqaku, nispa. 20Líbano orqoman seqay, chaymanta waqyakamuy, Basán hallp'api qaparkachamuy, Abarim orqo-orqomanta waqyakamuy, yanapaqniykikunaqa llapanmi atipasqaña. 21Ñoqaqa rimapayarqayki allinraq kashaqtiykin, qantaqmi ichaqa: ¡Manan uyariykimanchu! niwarqanki. Wayna kasqaykimantapachan ahinallatapuni ruwaq kanki, rimasqaytaqa manapunin uyariqchu kanki. 22Wayran apapunqa llapan umalliykikunata, yanapaqniykikunataqmi preso apasqa ripunqaku. Chay hinaqa, p'enqasqa llakikuypin qhepakapunki millay ruwasqaykikunamanta. 23Kunanmi qanqa kusisqa q'esaykipi tiyashanki, Libanomanta apamusqa cedrowan qatasqa wasipi tiyashanki, ichaqa imaynataraqmi qaparinki nanay chayamusuqtiyki, wachakuy nanay hinaraqmi kanqa, nispa. 24Señor Diosmi nin: Ñoqa kikiypa sutiypin jurani, hinaña Judá rey Joacimpa churin Conías kanman paña maki dedoypi selloyoq anilloy chaypas, horqokuspaymi 25qoykiman, qanpa manchakusqayki awqaykiman, pikunachus wañunayki munaq runakunamanpas, Babilonia rey Nabucodonosormanpas, Caldea runakunamanpas. 26Qantan mamaykitawan wikch'usqaykichis mana paqarisqayki wak suyuman, chaypitaqmi wañupunkichis. 27Kutimuy munasqaykichis llaqtamanqa manapuniñan kutimpunkichisñachu, nispa. 28¿Wikch'usqa mankachu Coniasqa? ¿Mana piqpa munasqan k'arpachu payqa? ¿Imanaqtintaq payqa wawakunantin mana reqsisqa suyuman wikch'usqa? 29¡Kay pachantin llaqtakuna, uyariychis Señor Diospa siminta! 30Kay runaq wawanqa manan hukllapas Davidpa kamachikuy tiyananpi tiyaykunqachu, Judapi wakmanta rey kananpaq, chayrayku, kay runata qelqaychis mana wawayoqta hina, kawsayninpi qaqapaq runata hina. Ñoqa Señor Diosmi chayta nini.

will be added

X\