Jeremías 20

1Dios yupaychana wasi qhawaqkunamanta aswan kurak umallin karqan Imerpa churin sacerdote Pasurqa. Paymi uyarirqan Jeremiaspa willakusqanta, 2hinaspan Jeremiasta hasut'ichirqan, hinallataq yupaychana wasi qaylla wichay lado Benjamín Punku nisqapi chakintawan makintawan cepopi kanichirqan. 3Qhepantin p'unchaytaq Pasurqa Jeremiasta cepomanta kacharichimurqan, chaymi Jeremiasqa payta nirqan: –Señor Diosmi Pasur sutiykita t'ikrarqapun “Hinantinpi Q'aqchakuy” nisqaman. 4Señor Diosmi nin: Qantan tukuchisqayki mancharikuyman qan kikiykipaq llapan amigoykikunapaqpas. Qan kikiyki qhawakushaqtiykin, amigoyki awqanpa wañuchisqan kanqa. Llapan Judapi tiyaq runakunatapas Babilonia reymanmi hap'iykachisaq, chay reymi wakinta Babiloniaman kamachi kanankupaq apanqa, wakintataq wañuchinqa. 5Hinallataqmi awqanpa makinman hap'iykachisaq kay llaqtaq qhapaq kaynintapas llapan kaqninkunatapas, chaniyoq illankunatapas, Judá reykunaq qhapaq kayninkutapas, paykuna llat'anaspa chaykunata Babiloniaman apanankupaq. 6Qanpas Pasur, Babiloniaman apasqan kanki, llapan wawakunantin warmintin ima. Chaypin wañupunki, chayllapitaqmi p'ampapusunkikupas, qantapas amigoykikunatapas, mayqenkunamanchus llullakuspa profetizarqanki chaykunatapas, nispa. 7Señor Diosníy, qanqa q'otullawanmi uyachiwasqanki, ñoqataq hinalla uyakusqani. Aswan kallpayoqmi kasqanki, chaymi atipawarqanki. Tukuy runaq asikunanpaqmi kapushani, ch'isiyaqnintinmi ñoqawan burlakushanku. 8Sapa kuti rimaspaymi qaparispa waqyakuni: ¡Ch'aqwaymi kanqa! ¡Thunikuymi kanqa! nispallapuni. Chay hinata simiyki willasqaymantan sapa kutilla k'amiwanku asipayawanku. 9Chaymi nirqani: Señor Diosmanta amaña rimasaqchu, paypa sutinpipas amaña runaman willasaqchu, nispa. Ichaqa sonqoypin simiykiqa nina hinaraq rawrashan, tulluytaraqmi parichishan. Upallakuyta munani chaypas manapunin ch'inyakuyta atinichu. 10Uyarishanin runakunaq chhiwchinakusqanta: ¡Hinantinpin q'aqchakuy kashan! ¡Hamuychis ch'atasunchis! nispa nishaqta. Reqsisqaykunaraqmi munashanku purisqaypipas misk'akunayta. Paykunan ninku: Ichapaschá q'otusqa kanqa, chaypi atipananchispaq, hinaspataq vengakunanchispaq, nispanku. 11Qanmi Señor Diosníy, ñoqawanqa kashanki, mana atipana maqanakuq soldado hinaraq. Qatiykachawaqniykunaqa misk'akunqakun, manataqmi atipawanqakuchu. Pisipaspankun p'enqasqa qhepakunqaku, p'enqaypi rikukusqankuqa mana hayk'aq qonqasqan kanqa. 12Tukuy-atiyniyoq Señor Diosníy, qanpunin kanki chanin t'aqwiqqa, qanpunin kanki runaq sonqon rikuqqa. Rikuchiway chay runakuna ñak'arichisqaykita, chaninchaqniy kanaykipaq akllakusqaymi kanki. 13Señor Diosman takiychis, Señor Diosta yupaychaychis. Paypunin sarunchasqata millaykunaq atiyninmanta qespichin. 14¡Paqarisqay p'unchayqa ñakasqa kachun! ¡Mamaypa wachakuwasqan p'unchayqa ama saminchasqachu kachun! 15¡Taytayta kusichiq runaqa ñakasqa kachun, taytayta qharin wawayki kasqa, niqpas ñakasqa kachun! 16¡Chay runaqa Diospa mana khuyapayaspa thunisqan llaqtakuna hina kachun! Chay runaqa tutamantapacha nanaymanta qaparisqata uyarichun, kuskan p'unchaytataq awqa-tinkuypi ch'aqwayta uyarichun, 17mamaypa wiksallanpiraq mana wañuchiwasqanmanta. Chay hinapiqa mamaypa wiksallanpiña p'ampakuyman karqan, ñoqaqa manaña hayk'aqpas paqariymanñachu karqan. 18¿Imapaqraqmi mamaypa wiksanmantaqa lloqsimurqani, nanayllata phutikuyllatawan rikunaypaq, p'enqayllapi ch'isiyanaypaq? nispa.

will be added

X\