Jeremías 19

1Señor Diosmi niwarqan: Phaway rantirqamuy t'uru p'uyñuta, hinaspataq wakin kurak runakunata kurak sacerdotekunatawan waqyarispa, 2“K'arpa Punku” nisqa qaylla Ben-hinom wayq'oman rinki, chaypin willamunki imatachus nisqayta. 3Ninkitaq: Judá suyu reykuna, Jerusalenpi tiyaqkuna, Israelpa Diosnin Tukuy-atiyniyoq Señorpa siminta uyariychis. Paymi nin: Ñoqan kayman sinchi hatun llakita kachamusaq, chaymanta uyariq sapanka runaqmi ninrinraq chiriririnqa. 4Chaytan ruwasaq llaqtay runakunaq qonqarqowasqan hawa, paykunan sacrificiokunata ruphachirqanku paykunaqpas ñawpa taytankuqpas Judá suyu reykunaqpas mana reqsisqan wak dioskunaman, kay cheqaspin askha mana huchayoqkunaq yawarninta hich'arqanku. 5Hinallataq altarkunata ruwakurqanku wawankuta Baal diosman ruphachinankupaq. Chay hina ruwaytaqa manan kamachirqanichu, manapunin chay hina kanantaqa yuyallarqanipaschu. 6Chayraykun huk p'unchay chayamunqa kay cheqasta manaña Tofet nispa sutichanankupaq, manallataq “Ben-hinom wayq'o” nispapas, aswanmi ninqaku: “Runa Wañuchina wayq'o”, nispa. Ñoqa Señor Diosmi chayta nini. 7Kay cheqaspin Judá runakunaq Jerusalén runakunaq yuyaykusqankuta tatichisaq. Ñoqapunin awqankuwan atipachisaq, wañuchiy yuyaykuqninkupas paykunataqa wañuchinqapunin, hinan ayankuta ankakunaman salqa animalkunamanwan qaraykusaq. 8Kay llaqtatan tukuchisaq mancharikuyman runakunaqpas qhawarparinanman, lliw qayllanta puriqkunapas pasaq thunisqa kasqanta qhawaykuspan manchakuymanta musphanqaku. 9Wañuchiy munaq awqankun paykunata muyuykuspa llakichinqa, ñoqan churinkuq, ususinkuq aychanta mikhuchisaq, hatun llakiq qatisqan kashaspan llaqtamasinkutapas mikhunqaku, nispa. 10Chaykunata niykuspataq puriysiqniyki runakunaq rikushasqan p'uyñuta p'akinki. 11Ninkitaq, Tukuy-atiyniyoq Señor Diosmi nin: Kay llaqtatan runankunatawan p'akirqosaq imaynan t'uru p'uyñuta p'akinku hinata, manan wakmanta ruwanqakuñachu. Runakunataq ayankuta p'ampakapunqaku kaq Tofetpi manaña mayllapas aya p'ampanapaq cheqas kasqanrayku. 12Sut'itan nini kay llaqtataqa Tofetpi yupaychana cheqasta hinapuni ruwanayta. 13Jerusalén runakunan Judá suyu reykunapiwan wasi patankupi inciensota q'apachirqanku ch'askakunaman, vinowanpas ch'uyarqanku wak dioskunaman, chaywanmi Tofetpi yupaychana cheqas hina qhellichasqa kanqaku, nispa. 14Chaymantataq Jeremiasqa Señor Diospa profetizananpaq Tofetman kachasqanmanta kutimpurqan, Señor Dios yupaychana wasiq pationpi sayaykuspataq llaqtantinman nirqan: 15Israelpa Diosnin Tukuy-atiyniyoq Señormi nin: Kay llaqtamanmi llaqta-masinkunamanwan tukuy yuyaykusqay ñak'ariykunata chayachimusaq, simiyta mana kasukuspa rumi sonqo kasqankumanta, nispa.

will be added

X\