1 Ch'akiriykapusqan hawataq Señor Diosqa Jeremiasta rimapayarqan: 2 Judá suyun llakikuymanta waqaykushan, llaqtankunapas pasaqtan phutikushan. Runakunapas llakikuymantan pituchakushan, Jerusalenpas nanaymantan qapariykamushan. 3 Qhapaq runakunapas kamachinkutan unuman kachanku, paykunan p'uytukunaman rispa mana tarimunkuchu, ch'usaq p'uyñuntinmi kutirimunku, sinchi khuyay llakisqataq, p'enqasqataq umankutapas llakikuymanta pakaykukuspa. 4 Chakra llank'aqkunapas kallpa wañuymi kanku, umankutapas llakikuymantan qatakunku, mana para chayaqtin, hallp'apas ch'akispa k'akapusqanmanta. 5 Campopi tarukakunapas qholla uñankutan wikch'ukapunku, mikhunankupaq mana q'achu kapuqtin. 6 K'ita asnokunapas orqo patakunapin sayarayanku, wayrallatañan chacalkuna hina muskhinku, ñawinkupas ayphayaykapushanñan, mikhunankupaq pasto mana kaqtin, nispa. 7 Llaqtataq Señor Diosta nirqan: Señor Diosniyku, hinaña huchayku contraykupi rimarin chaypas, imallapipas yanapawaykupuni sutiykita yupaychanaykupaq. Askha kutipin qanmanta t'aqarikurqayku, contraykitapunin huchallikurqayku. 8 Qanllan Israelpa hap'ipakunanqa kanki, llakikuy p'unchaypipas qespichiqniykun kanki, ¿imanaqtinmi mana reqsisqa runa hina kanki? ¿Imanaqtinmi purikuq runa qorpachakuq hinalla kanki? 9 ¿Imanaqtinmi mancharisqa runa hinalla kanki? ¿Imanaqtinmi allin qhari kashaspa mana yanapaykukuq hina kanki? Chaywanpas, Señor Diosniyku, chawpiykupipunin kashanki, llapa runan yachanku llaqtayki kasqaykuta. ¡Amapuni saqerpariwaykuchu! nispa. 10 Kay llaqtamantan Señor Diosqa nin: Paykunan mana cuidakuspa hinantin phawaykachayta munakapurqanku, chayraykun paykunataqa mana chaskisaqchu. Kunantaqmi huchankumanta yuyarispa paykunata muchuchisaq, nispa. 11 Señor Diosmi niwarqan: Ama mañakamuwaychu kay llaqtaq allin kananpaqqa. 12 Hinaña ayunashanku chaypas, mañakusqankutaqa manan uyarisaqchu, ruphachina sacrificiotaña ruru ofrendataña haywamuwanqaku chaypas, manan chaskisaqchu. Paykunataqa wañuchisaqmi maqanakuywan, yarqaywan, onqoypiwan, nispa. 13 Ñoqataq kutichirqani, ¡Señor Diosníy, qhawariyyá! Profetakunaqa nishallankupunin, Señor Diosmi nin: Manan kanqachu maqanakuypas yarqaypas, aswanmi thak-kayllapi kakunkichis, nispa. 14 Chaymi Señor Diosqa kutichimuwarqan: Arí, profetakunaqa chay hinata sutiypi nispankuqa llullakushankun. Ñoqaqa manan hayk'aqpas paykunataqa kachamurqanichu, manataqmi willaqtapas churarqanichu, manapunin rimapayallarqanipaschu. Rikhuriymanta rimasqankuqa yanqa q'otullan, paykuna kikinkumanta watupakusqallankun, sonqonkumanta horqokuspa rimasqallankun. 15 Chaymi ñoqa Señor Diosqa paykunamanta nini: Yanqan sutiypi rimaq churakunku mana ñoqa kamachishaqtiy. Ninkuraqtaq: Manan kay llaqtapi kanqachu maqanakuypas yarqaypas, nispanku. Chay rimaq profetakunan wañuranqaku maqanakuypi yarqaypiwan. 16 Paykunaq rimapayasqanku llaqtapas wañurallanqataqmi maqanakuypi yarqaypiwan warmintin wawakunantin, ayankutaq Jerusalén callekunapi wikch'u-wikch'u kanqa, manataq pillapas kanqachu paykunata p'ampaykuq. Chaykunawanmi kutichisaq mana chanin kasqankumanta, nispa. 17 Nillawarqantaq, llaqtayta niy: Ñawiymanta waqay phawamuchun, tuta-p'unchay ama thanispa, munasqay llaqtaypa manchakuy hatun llakikuyninmanta, khuyay manchana k'irinmantawan. 18 Hawaman lloqsispaypas, hatun maqanakuypi wañuqpa ayallantan rikushani. Llaqtaman haykuspaypas yarqaymanta wañuqpa ayallantan rikushani. Profetakunapas sacerdotekunapas wak llaqtakunapin purinku, manataq imatapas yachankuchu, nispa. 19 Llaqtataq nirqan: Señor Diosnillayku, ¿Judataqa pasaqtapunichu wikch'upurqanki? ¿Sión llaqtataqa cheqnikunkipunichu? ¿Imanaqtinmi k'iriwarqankiku mana hampiy atiyta? Allillan kanaykutan suyakusharqayku, manataq ima allinpas kawankuchu. Qhalilla kanaykutan suyakusharqayku, manchapakuyllapitaq kashayku. 20 Señor Diosnillayku, millay ruwasqaykutan willakamuykiku, ñawpa taytaykuq huchallikusqantan reqsikuyku, qan contrapunin huchata ruwarqayku. 21 Sutiyki yupaychasqa kananpaq amapuni wikch'uwaykuchu, ama pisichaychu ch'uya wasiykipi kaq qhapaq tiyanaykita. Yuyariy ñoqaykuwan rimanakusqaykita, amapuni mana hunt'aqqa kaychu. 22 ¿Idolokunamantari kanchu mayqellanpas para chayachiy atiq? ¿Hanaq pachari payllamantachu parata parachimun? Señor Diosnillayku, qanmi kanki parachimuqqa, qanpunin kanki tukuy chaykuna ruwaqqa, chayraykun qanllapi suyakuyku, nispa.
