1 Señor Diosmi niwarqan: Rispayki, linomanta p'alta chumpita rantikamuy, hinaspa chumpiykukunki, ichaqa amaraq unuman tupachinkichu, nispa. 2 Ñoqataq Señor Diospa niwasqanman hina rantikamuspay chumpikurqani. 3 Señor Diosqa nillawarqantaqmi: 4 Chay rantispa chumpikusqayki chumpita aparikuspa Perat llaqtata riy, chaypitaq qaqa k'aktuman pakaykamuy, nispa. 5 Ñoqataq Señor Diospa kamachiwasqanman hina Perat llaqtapi pakamurqani. 6 Unay p'unchaymantañataq Señor Diosqa wakmanta niwarqan: Perat llaqtata riy, hinaspa chay pakasqayki chumpita apamuy, nispa. 7 Ñoqataq Perat llaqtata rirqani, hallp'amanta horqoqtiytaq chumpiqa ismusqaña kapusqa, mana imapaq valeq. 8 Hinan Señor Diosqa nillawarqantaq: 9 Chay kasqallantapunin ismuchisaq Judapa uma hoqariq-kayninta Jerusalenpa sinchi uma hoqariq-kaynintawan. 10 Kay millay llaqtaqa manapunin kamachiyta kasukuyta munapunkuchu, aswanmi millay sonqonkuq kamachisqanta ruwapushanku, wak dioskunatataq servispa yupaychashanku, chay ismusqa p'alta chumpi hinan mana imapaq valeq kanku. 11 Imaynan chumpiqa ñañu wasata mat'iykun, chay hinatan ruwarqani Israel llaqtata Judá llaqtatawan ñoqaman k'askasqa kawsanankupaq. Ñoqaqa munarqanin paykuna llaqtay kananta, hatunchaqniy kananta, yupaychaqniy kananta, qhapaqchaqniy kanankutawan, paykunataq ichaqa mana uyariwarqankuchu, nispa. Ñoqa Señor Diosmi chayta nini. 12 Nillankitaq paykunata, Israelpa Diosnin Señormi nin: Llapa mak'asmanmi vinota hunt'achinqaku, nispa. Israel runakunataqmi nisunki: ¿Kunallanraqchu uyarikushan mak'asman vino hunt'achinari? nispa, 13 niqtinkun, qan kutichinki, Señor Diosmi nin: Llapan kay suyupi kaq runakunatan macharqarichisaq, Davidpa kamachikuy tiyananpi tiyaq reytapas, sacerdotekunatapas, profetakunatapas, Jerusalenpi llapan tiyaqkunatapas. 14 Chaymantataqmi mak'asta hina paykunapurata takanachispa p'akisaq, taytanta churintawan. Manapunin pitapas khuyapayasaqchu, llapallantapunin chhallusaq, nispa. Ñoqa Señor Diosmi chayta nini. 15 Israel runakuna, ¡Señor Diosmi rimanña! ¡Amapuni umata hoqariychischu! ¡Allintapuni uyariychis! 16 Hatunchaychis Diosniykichis Señor Diosta manaraq tutayachimushaqtin, qankunaqa misk'akuwaqchismi tutayaq orqokunapi. Yupaychaychis Diosniykichis Señor Diosta suyakusqaykichis sumaq k'anchayta manaraq laqhayaqman tukuchispa llanthuykachimushaqtin. 17 Manataqchus qankuna kasukunkichis chayqa, pakallapin waqasaq uma hoqariq kasqaykichismanta. Ñawiymantan weqe unu surunqa, sonqoy lloqsinankaman waqaykusaq Señor Diospa llaqtan apasqa kasqanmanta. 18 Reyta, maman reinatawan niy: Kamachikuy tiyanamanta uraykuychis, pampapi tiyaykuychis, ñan umaykichismanta pilluykichis urmaykunña, sumaq k'achanchaq coronaykichispas urmaykunña. 19 Neguev ch'inneqpi llaqtakunapas awqanpa muyuykusqanñan kashan, manañan pipas haykunmanñachu. Llapanñan Judapas pichaspa apasqaraq kapushan, wak suyuman pasaq apasqan kapushan, nispa. 20 ¡Yaw, Jerusalén, ñawiykita kichariy! ¡Qhawariy wichaymanta awqaq hamusqanta! ¿Maytaq michinaykipaq qosqay ovejakunari? ¿Maytaq chay allichachaq t'aqa ovejaykunari? 21 ¿Ima ninkitaq qanpa “reqsisqaymi” nisqayki runakuna qanta atipaspa kamachiqniyki kapuqtinkuri? ¿Manachu wachakuq warmita hina chaymanta nanay hap'isunki? 22 Ichapaschá ninki: ¿Imanaqtinmi kaykuna kawan? nispayki. Chaykunaqa hatun huchaykikunamantan kasunki, Chayraykun polleraykita q'allparqasunkiku, hukkunaq violasqantaq karqanki. 23 ¿Yana runaq yana-kaynin yuraqyanmanchu? ¿Leopardoq alqa-kaynin chinkanmanchu? Qankunapas millay ruwayta yachaykuspari, ¿allinkaq ruwayta atiwaqchisñachu? 24 Chayraykun qankunata ch'eqechisqaykichis ch'inneq wayra ichhu q'opata apashaq hinataraq. 25 Chay hina ruwasqan qanpas kanki, chay hina kanaykin chayamushasunki, ñoqata qonqapuwasqaykimanta yanqa dioskunaman sonqollikusqaykimanta. Ñoqa Señor Diosmi chayta nini. 26 Ñoqapas polleraykitan q'allparparisqayki uyayki pakaqtaraq q'ala-kayniykita rikunankupaq. 27 Ñoqan rikuyki millakusqay huchakuna ruwashaqta, orqokunapin pampakunapin rikuyki wasanchashawaqta, uywa hina mana p'enqakuspa hucha ruwashaqta, qhelli huchapi purishaqta. ¡Imaraqmi qanmanta Jerusalén! ¿Hayk'aqkamataq mana ch'uyanchakunkichu? nispa.
