Jeremías 10

1Israel llaqta, uyariy Señor Diospa nisqasuykita. 2Paymi nin: Ama yachaqakuychischu wak llaqtakunaq ruwasqankunata, amataq mancharikuychischu hanaq pachapi ima señalta rikuspapas, hinaña chay suyukuna manchakunku chaypas. 3Chay runakunaq diosninkumanta yachachikuyninqa yanqan. Mallki-mallkimantan kurkuta wit'urqamunku, kurku llaqllaqtaq azuelanwan llaqllarparin. 4Chaymantataq qoriwan qolqewan k'achancharqon, clavokunawan takarqarispataq allin-allinta hap'irqarichin mana kuyunanpaq. 5Idolonkuqa pepino tarpusqa chakrapi phalaq animalkuna manchachiq saywa hinan. Chaykunaqa manan rimaqchu, wantuykachanallan mana puriq kaspanku. Ama manchakuychischu chaykunataqa, manan pitapas mana allintaqa ruwanmanchu, manallataq pitapas allintaqa ruwanmanchu, nispa. 6Señor Diosníy, qan hinaqa manan pipas kanchu. Qanqa atiyniyoqmi kanki, sutiykiqa hatunmi qhapaqtaqmi. 7Qanmi kanki suyukunaq Reyninqa, ¿pitaq manari manchakusunkimanchu? Kay pachapi yachayniyoq reykuna ukhupiqa qanllapunin manchakuna kanki, qan hinaqa manan pipas kanchu. 8Llapallankun mana yuyayniyoqkuna kanku, kurkumanta idolonkuqa manan imatapas yachachinmanchu. 9Idolonkuqa Tarsis hap'iymanta apamusqa qolqe llaphllawan qatasqallan, diosninkuqa Ufaz suyumanta apamusqa qori llaphllawan p'istusqallan. Idolonkuqa kurku llaqllaqpa qori ch'uyanchaqpa ruwasqallanmi, p'achankuqa llawlli-pukamanta rawraq-pukamantawanmi, llapan chaykunaqa allin awaqkunaq ruwasqanmi. 10Qan Señorllan ichaqa cheqaq Diospuni kanki: kawsaq Dios, wiñay Rey. Phiñakuqtiykipas pacharaqmi kuyurin, phiñakuqtiykiqa manan suyukunapas sayanmanchu. 11Qankunaqa, Israel runakuna, wak suyu runakunata niychis: Kay pachatapas hanaq pachatapas mana ruwaq dioskunaqa ch'usaqyachipusqan kay pachamanta kanqa, manapunin hukllapas hanaq pachaq uranpiqa qhepanqachu, nispa. 12Atiyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast'arirqan. 13Kunununuq kunkanwanmi hanaq pacha unupas qaparin, hinantinmantan pacha phuyutapas sayarichin, paratapas parachin illapatapas lliphllikichin, waqaychasqa ukhumantan wayratapas horqomun. 14Lliw runataq mana yuyayniyoq uma muyusqakuna, qori ch'uyanchaq runaqa ídolo ruwasqanmantan uyanta mana maymanpas churayta atinchu, ídolo ruwasqanqa mana kawsaq q'otuylla kasqanmanta. 15Mana imapaq valeq pukllana kasqanmi kanku, p'uchukay p'unchaypin Señor Diosqa chaykunata thunipunqa. 16Chaykunamantaqa Jacobpa Diosninqa huk-niraqpunin, paymi tukuy imaymanakuna kamaq, paymi Israelta akllakurqan kaqnin kananpaq, Tukuy-atiyniyoq Señor Diostaqmi sutinqa. 17Yaw, awqaq muyuykusqan ukhupi kashaq llaqta, kaqniykikunata q'epichakuy. 18Señor Diosmi nin: Kay kutipiqa karumanmi warak'arparisaq kay suyupi tiyaq runakunata. Aswantaraqmi mat'iykusaq, pasaqtapunin paykunataqa ch'irwarqosaq, nispa. 19Llaqtataq qaparispa nirqan: ¡Imanaykusaqtaq kay nanaypi rikukuspa! ¡K'iriykunapas mana hampiy atiymi! Ñoqaqa yuyarqanin: Chay nanayqa muchuy atiyllachá, nispa. 20Karpaykunapas lliwmi thunisqa, watanankunapas llapanñan p'itisqa. Wawaykunapas llapanmi wikch'upuwarqan, manapunin kapunkuñachu. Manapunin pillapas kanñachu wakmanta karpay sayarichiqllapas, ukhunpi t'aqaqninkunata ruwaqllapas, nispa. 21Ñoqataq nirqani: Kay llaqtaq michiqninkunaqa mana yuyayniyoqkunan, manan Señor Diostapas maskhankuchu, chayraykun qaqaparqanku, llapan oveja t'aqakunapas ch'eqechisqan kashanku. 22¡Uyariychis! ¡Huk willakuymi chayarqamun! Wichay lado huk llaqtamantan hatun ch'aqway hamushan, Judapi llaqtakunatan ch'usaq purunman tukuchinqa, chacal animalkunaq tiyananmanmi tukuchinqa, nispa. 23Señor Diosmantaq nirqani: Señor Diosníy, yachanin, manan runaq munayninchu imayna kananpaqpas, runaqa manan yachakunchu imayna kanantapas. 24Chaninchayniykiman hina wanachiwayku ama phiñakuspalla, phiñakuspaqa thunirqowankikumanmi. 25Phiñakuyniykitaqa chayachiy mana reqsiqniyki suyukunaman, sutiyki mana yupaychaq llaqtakuna pataman. Jacobpa llaqtantaqa paykunan wañuchirqanku, paytaqa pasaqtan thunipurqanku, suyuntintan raqay-raqayta ruwaykapurqanku, nispa.

will be added

X\