Jeremías 1

1Kay qelqan willakun Hilciaspa churin Jeremiaspa rimasqankunata ruwasqankunatawan. Jeremiasqa Benjamín ayllu hallp'api Anatot llaqtamantan karqan, ayllunkunaqa sacerdotekunan karqan. 2Señor Diosmi Jeremiasman rimaykurqan Amonpa churin Josías chunka kinsayoq watapiña Judapi rey kashaqtin. 3Chaymantapas rimaykullarqantaq Josiaspa churin Joacim Judapi rey kashaqtin. Rimaykullaqtaq Josiaspa churin Sedequías Judapi chunka hukniyoq wata rey kanankama. Chay wataq phisqa killanpitaq Jerusalén llaqta runakunaqa Babilonia suyuman kamachipaq apasqa kapurqanku. 4Señor Diosmi kay hinata niwarqan: 5Mamaykiq wiksanpi manaraq kashaqtiykin akllakurqayki, manaraq nacemushaqtiykin t'aqakurqayki, hatun suyukunapaq profeta kanaykipaqmi churarqayki, nispa. 6Ñoqataq nirqani: ¡Ay, Apu Señor Diosníy! Sinchi waynallaraqmi kani, manan rimaytapas yachaniraqchu, nispa. 7Señor Diostaq ichaqa niwarqan: Ama sinchi waynallaraqmi kani, niychu. Maytachus “riy” nisqaytan rinki, ñoqaq kamachisqaytataqmi rimamunki. 8Aman pitapas manchakunkichu, ñoqan qanwan kashani waqaychanaypaq. Ñoqa Señor Diosmi chayta nini. 9Chaymantataqmi Señor Diosqa makinta haywarimuwaspa simiyta tupaykuwarqan, niwarqantaq: Ñoqan simiykiman simiyta qoyki rimanaykipaq. 10Kunanmi huk kamachikuqta churayki hatun suyukunamanpas huch'uy suyukunamanpas, qanmi t'irankipas kumpankipas, qanmi chhallunkipas ñut'unkipas, qantaqmi sayarichinkipas takyachinkipas, nispa. 11Señor Diosqa nillawarqantaqmi: Jeremías, ¿imatan rikushanki? nispa. Ñoqataq kutichirqani: Almendro mallki k'allmatan rikushani, nispa. 12Señor Diostaq niwarqan: Allintan rikusqanki, ñoqaqa qhawashallasaqpunin simiykuna hunt'akunantaqa, nispa. 13Wakmantan Señor Diosqa tapuykuwarqan: –¿Imatan rikushanki? nispa. Ñoqataq kutichirqani: –T'impushaq mankatan rikushani, wichay ladomanta kaykamaraq wasapasqan chayamushaqta, nispa. 14Señor Diostaq niwarqan: Wichay ladomantan wasapamunqa hatun llakikuna llapan kay suyupi tiyaq runakunaman. 15Ñoqa kikiymi waqyashani llapan wichay lado suyu ayllukunata hamunankupaq. Ñoqa Señor Diosmi chayta nini. Reykunan hamunqaku, Jerusalenman haykuna kikin punkukunapin kamachikuy tiyanankuta wakichikunqaku. Llaqta muyuriq perqa contran kanqaku, Judá llaqtakunatan muyuykunqaku. 16Ñoqan llaqtayta muchuchisaq saqerpariwasqanku huchankumanta, paykunan wak dioskunaman inciensota q'apachirqanku, paykunaq ruwasqanku idolokunatan yupaycharqanku. 17Qanqa allintapuni chumpiykita wataykukuy, sayariy, ñoqaq kamachisqay simita llapanta willamuy. Aman mancharikunkichu, mancharikunkichus chayqa, ñoqan paykunaq ñawpaqenpi khatatatachisqayki. 18Kunanmi qanta tukuchiyki allin kallpachasqa llaqtata hina, fierromanta wasi tusata hina, broncemanta perqata hina, Judá reykunawan, umalli runakunawan, sacerdotekunawan, llapan runakunawanpas churanakunaykipaq. 19Paykunan contraykipi sayarinqaku, ichaqa manan atipasunkikuchu, waqaychanaypaq qanwan kashasqayrayku. Ñoqa Señor Diosmi chayta nini.

will be added

X\