Isaías 9

1Chaywanpas muchuqkunapaqqa manañan laqhayaq kanqañachu. Diosqa Zabulón aylluta Neftalí ayllutawanmi k'umuykachirqan, hamuq p'unchaykunapin ichaqa hatunchanqa lamar-qocha patapi tiyaqkunata, Jordán mayuq inti lloqsimuy ladonpi tiyaqkunata, wak llaqtayoqkunaq tiyasqan Galilea hap'iytapas. 2Tutayaqpi purishaq llaqtan huk hatun k'anchayta rikurqan, sinchi laqhayaqpi tiyaq runakunatan k'anchay k'anchaykurqan. 3Qanmi, Señor Dios, paykunata aswanta askhayachirqanki, qanmi anchatapuni kusichirqanki. Chaymi paykunaqa llapallanku ñawpaqeykipi q'ochukunku imaynan cosecha tiempopi runakuna kusikunku hinata, imaynan llat'anasqankuta rakinakuqkunapas q'ochukunku hinata. 4Imaynan Madián suyuta unayña atiparqanki, chay hinatan sarunchaq llaqtataqa k'umuchirqanki, qanmi llasa yugonkuta p'akirqanki, waqtananku varatapas qechurqanki. 5Soldadokunaq q'aqraqechisqan botaskunapas, yawarkama p'achankupas lliwmi ninaq ruphasqan kanqa. 6Huk qhari wawan nacepuwanchis, Diosmi qowanchis huk qhari wawata, paymi ñoqanchista kamachiwasun. Paypa sutinmi kay hina kanqa: Musphana ruway Yuyaychaq, Atiyniyoq Dios, Wiñay Yaya, Thak-kaypa Qollanan. 7Davidpa kamachikuy tiyananpin tiyanqa, kamachikuy atiyninqa hinantinmanmi mast'arikunqa, thak-kaypas manan tukukunqachu. Chaninchayta ruwaspa cheqaqllatapuni kamachispanmi kamachikuyninta allinta takyachinqa kunanmanta wiñay-wiñaypaq. Chaytan Tukuy-atiyniyoq Señor Diosqa ruwanqa pay kikin hatunchasqa kananpaq. 8Señor Diosmi Jacobpa mirayninman rimaykurqan, Israel runakunamanmi siminkunata apachimurqan. 9Samariapi tiyaq llapa Israel runakunan chayta entiendenku, paykunan ichaqa hatunchakuspanku anchaykachaspanku ninku: 10Ladrillo wasikunaqa urmaykapunmi, ñoqanchisqa rumikunawanmi perqasunchis, k'ita higos sach'akunatan wit'upunku, ñoqanchisqa chaypa rantinpin cedro sach'akunata mallkisunchis, nispa. 11Chayraykun Señor Diosqa awqankunata kallpacharqan, pay kikinmi phawaykunanpaq kallpacharqan. 12Inti lloqsimuy ladomanta Siria runakuna, inti haykuy ladomantataq Filistea runakuna hamuspanku Israeltaqa hukllataraq oqoykurqanku. Chaywanpas Señor Diospa k'arak phiñakuyninqa manan thanirqanchu, aswanpas: Muchuchisaqmi, nishallanpunin payqa. 13Paykunaqa manan muchuchiqninku Diosman kutirikurqankuchu, Tukuy-atiyniyoq Señor Diostapas manan maskharqankuchu. 14Chaymi Señor Diosqa Israel suyuta umantawan chupantawan wit'unqa, huk p'unchayllapin payqa palmeratapas, soqostapas wit'unqa. 15Umaqa kurak runakunaman umallikunamanwanmi rikch'akun, chupataq llulla yachachiq profetakunaman rikch'akun. 16Umallikunan kay llaqtata waqllichirqan, llaqta runakunataq chinkapurqanku. 17Chayraykun Señor Diosqa waynakunatapas mana tayta-mamayoqkunatapas viudakunatapas mana khuyapayarqanchu, llapan runakunan millay mana chanin kanku, mana yuyayniyoq hinataqmi thawtinkupas. Chaywanpas Señor Diospa k'arak phiñakuyninqa manan thanirqanchu, aswanpas: “Muchuchisaqmi”, nishallanpunin payqa. 18Mana chanin kayqa nina hinaraqmi rawrarin, khiskakunata ch'aphrakunata hap'iriq nina hinaraqmi rawrarin, sach'a-sach'akunata ruphaykuq nina hina, putumiq q'osñipi wayraman wach'iq hina. 19Tukuy-atiyniyoq Señor Diospa k'arak phiñakuynin hawan suyuqa ninawan hap'iykachisqa kashan, hinan runakunata muchuchishan, chaymi mana pipas wawqenta khuyapayanchu. 20Lloq'e ladonpi tarisqantan oqorqon manataq saksanchu, paña ladonpi tarisqantan mikhurqon, yarqasqallataqmi kashan, wawankunatawanraqmi mikhunkupas. 21Manaseswan Efrainwanqa paykunapuran maqanakunku, iskayninkutaq kuska Judá contra phawaykunku. Chaywanpas Señor Diospa k'arak phiñakuyninqa manan thanirqanchu, aswanpas: “Muchuchisaqmi”, nishallanpunin payqa.

will be added

X\