Isaías 8

1Señor Diosmi niwarqan: Huk hatun qelqana tablata hap'iy, hinaspa chaypi qelqay allin sut'i leenata hina: ¡Usqhayllata llat'anay! ¡Usqhayllata qechuy! nisqata. 2Hinaspataq sacerdote Uriasta, Jeberequiaspa churin Zacariastawan hunt'aq testigoyki kananpaq hap'ikuy, nispa. 3Chaykuna qhepatataq profetisa warmiywan puñurqani, hinan payqa wiksallikuspa qhari wawata wachakurqan. Chaymi Señor Diosqa niwarqan: Chay wawata sutichay ¡Usqhayllata llat'anay! ¡Usqhayllata qechuy! nisqa sutiwan. 4Manaraq wawa: Taytáy, mamáy, nispa rimayta t'oqyachishaqtinmi, Damasco llaqtapas Samaria llaqtapas llat'anasqa kanqa, lliw qhapaq kayninkunapas Asiria reymanmi apasqa kanqa, nispa. 5Señor Diosqa nillawarqantaqmi: 6Jerusalenpi kaq sumaqllata suchuq Siloé huch'uy mayutan kay runakunaqa pisichan, Rezintawan Pecatawantaqmi manchakunku. 7Chaymi ñoqa Señor Diosqa Asiria reyta tukuy-atiyninta paykuna contra apamusaq, Eufrates hatun mayuq llimp'asqanta hinaraq. Eufrates mayuqa patantintaraq wasapaspan hinantinman llimp'arinqa. 8Judakaman phawarinqa, llimp'arispanmi p'ampaykunqa, kunkakamataq aypanqa. ¡Emanuel! Suyuykiqa hatun raphrawan pakaykusqa hinan kanqa, runakunaq hunt'aykusqanmi kanqa, nispa. 9Yaw, suyukuna, huñunakuychis, pasaqta mancharikuychis, llapan karu suyupi tiyaqkuna, kayta uyariychis: Armakunataña hap'inkichis chaypas, q'aqchasqapunin qhepankichis, arí, hinapunin kankichis. 10Maqanakuypaq yuyaykuychis, qolluchisqataqmi kanqa, ima munasqaykichista rimariychis, manataqmi hunt'akunqachu, Diosmi ñoqaykuwan kashan. 11Señor Diosmi atiyniyoq-kayninwan hoqariwaspa, ama kay runakunaq purisqanta purinaypaq anyaykuwarqan: 12Hinaña kay llaqta nin: Ñoqanchis contran sayarin, nispa chaypas ama qankunaqa chhaynata niychischu. Paykunaq lliw manchakusqantaqa ama manchakuychischu, amataq manchapakuychispaschu. 13Ñoqa Tukuy-atiyniyoq Señor Diostan ch'uya kasqayta reqsiwanaykichis, ñoqatan manchakuwanaykichis, ñoqaq ñawpaqeypin manchapakunaykichis. 14Runakunaqa ñoqatan yupaychawananku, ichaqa Israelpaqwan Judapaqwanmi misk'ana rumi kasaq, urmachiq qaqa kasaq, Jerusalenpi tiyaqkunapaqtaq huk toqlla kasaq. 15Askhan misk'anqaku, urmanqaku, wañunqakupas, askhan toqllaman urmanqaku, hap'isqataq kanqakupas, nispa. 16Ñoqan nirqani: Kay willakuy qelqata k'uyuychis, hinaspa yachachisqaykunaq rikushasqan allinta wisq'aychis. 17Jacobpa mirayninmantaña Señor Dios pakakushaqtinpas, ñoqaqa paymanmi hap'ipakuni, paypin suyakushallanipuni. 18Ñoqapas Tukuy-atiyniyoq Señor Diospa qowasqan wawaykunapas kaypin kashayku. Sión orqopi tiyaq Señor Diosmi churawanku Israel runakunapaq sut'i señal kanaykupaq. 19Runakuna nisunkichis: Wañusqakunaq espiritunta tapukuychis, ninrillamanta chhiwchispa chhuchupayaq watuqkunatapas tapukuychis. ¿Manachu huk llaqtaqa diosninkuta tapukunanpuni? ¿Manachu wañuqkunaq yuyaychakuynintapas kawsaqkunapaq mañakunan? nispa chayqa, 20qankunan ninkichis: ¡Manan! Aswanpas Diospa kamachikuyninta kasuychis, nispa. Paykunachus Diospa siminman hina mana rimanqaku chayqa, manan paykunapaq k'anchay kanraqchu. 21Paykunan purinqaku kayneqman haqayneqman ñak'arichisqa yarqasqa ima. Yarqayta muchusqanku hawataq sinchita phiñakunqaku, hinaspa reyninkutapas Diosninkutapas ñakanqaku. Altotan qhawarinqaku, 22chaymantataq pampata qhawarinqaku, manataq imatapas tarinqakuchu, aswanpas ñak'ariyllata laqhayaqtawan, anchiyllata tutayaqtawan. Paykunaqa sinchi laqhayaqman wikch'usqan kanqaku.

will be added

X\