Isaías 66

1Señor Diosmi nin: Hanaq pachan kamachikuy tiyanay, hallp'a pachataq chakiypa samanan. Chhaynaqa, ¿imayna wasitan perqapuwankichis? ¿Mayneqpitaq samakuyman? 2Ñoqan hinantin pachakunata ruwarqani, chaymi tukuy chaykunaqa paqarirqan. Ñoqaqa sumaqtan qhawarini k'umuykukuq, huch'uyyaykukuq, simiytapas manchakuq runataqa. 3Ichaqa llaqtay runakunan munaynillankuta akllakurqanku. Toro sacrificiotan haywanku, runatapas sacrificanankupaq wañuchillankutaqmi, ovejatapas sacrificankun, alqotapas mikhunankupaq sipillankutaqmi, ruru ofrendatapas haywankun, khuchi yawartapas haywallankutaqmi, inciensotapas q'apachinkun, idolotapas yupaychallankutaqmi, tukuy chay millaykunawanmi kusikunkupas. 4Chaymi ñoqapas paykunamanqa sinchi muchunata chayachimusaq, imatachus manchapakusqankutan paykunaman chayachimusaq. Waqyakurqanin, manataq pipas kutichimuwarqanchu, rimarqanin, manataq uyariwarqankuchu, aswanpas mana chanintan ruwarqanku, millakusqaytan akllakurqanku, nispa. 5Señor Diospa siminta manchakuqkuna, payta uyariychis. Paymi nisunkichis: Llaqta-masiykichismi cheqnikusunkichis, ñoqaman sonqollikusqaykichisraykun qarqosunkichis, hinaspa asipayaspa nisunkichis: Lliphlli-kayninta Señor Diosqa rikuchichun, kusikusqaykichista rikunaykupaq, nispanku. Ichaqa p'enqachisqan paykunaqa kanqaku, nispa. 6¡Uyariychis! ¡Llaqtan qaparkachamushan! ¡Uyariychis! ¡Diospa wasinpin warararay kashan! Señor Diospa awqankunata muchuchisqanmi chayqa. 7Señor Diosmi nin: Sión llaqtaqa manaraq nanaywan hap'ichikushaspan wachakurqan, nanaypas manaraq hap'ishaqtinmi qhari wawata wachakurqan. 8¿Pitaq chay hinata uyarirqan? ¿Pitaq chay hinata rikurqan? ¿Huk p'unchayllapichu hatun suyuqa paqarin? Sión llaqtaqa nanay hap'iqtinmi wawankunata wachakurqan. 9Ñoqataq wachakunanpaq cuerponta kichani chayqa, ¿manachu nacechiyman? Ñoqa nacechishaspayqa, ¿cuerponta mat'irqoymanchu? nispa. 10Jerusalenta llapa munakuqkuna, paywan kusikuychis, paymanta q'ochukuychis, Jerusalenpaq llapa waqaqkuna, paywan kuska anchata kusikuychis. 11Paytaqmi mama hina luyluspa uywasunkichis sonqopas-sonqo kanaykichiskama, ñuñunkichismi hinaspan qhapaq kayninwan kusikunkichis. 12Señor Diosmi nin: Ñoqaqa mayuta hinan Jerusalenpi sumaq kawsayta mast'arisaq, hatun suyukunaq qhapaq kaynintapas Jerusalenpi mayuta hinan llimp'arichisaq. Jerusalenmi qankunata uywasunkichis, makinpin marq'amusunkichis, moqon patapin luylusunkichis. 13Imaynan mamaqa wawanta sonqochan, chay hinatan ñoqaqa qankunata sonqochasqaykichis, Jerusalenpin sonqochasqa kankichis, nispa. 14Chayta rikuqtiykichismi sonqoykichis kusikunqa, cuerpoykichispas q'achu hinan llanllarinqa. Señor Diosqa kamachinkunamanmi atiyninta rikuchinqa, awqankunapaqtaqmi k'arakta phiñakunqa. 15Señor Diosqa nina ukhupin chayamun, carretankunapas muyuq wayra hinan, k'arak phiñakuynintan sinchita phiñakuspa chayachinqa, rawrashaq ninawanmi muchuchinqa. 16Señor Diosqa ninawanmi juzganqa, espadanwanmi llapa runata taripanqa, askhatan wañuchinqa. 17Señor Diosmi nin: Wakin runakunan ch'uyanchakunku maqchikunku wak'a dioskunata yupaychana huertakunaman haykunankupaq. Chaykunapin chawpinkupi sayaykuq runa imaynatachus ruwasqanta hina ruwanku, chhaynatan mikhunku khuchi aychatapas, huk'ucha aychatapas, wak qhelli animalkunaq aychantapas. Ichaqa qonqayllan huk-nisqalla wañuchisqa kanqaku. 18Ñoqan yachani ruwasqankutapas yuyayninkutapas, chaymi ñoqaqa hamushani llapa llaqtakunatapas hatun suyukunatapas huñuykamunaypaq. Paykunan hamunqaku hinaspan qhapaq-atiyninta rikunqaku. 19Paykunapaqqa señaltan churasaq, hinaspan wakinninku puchuqta kachasaq kay suyukunaman: España suyuman, Libia suyuman, allin wach'iq runayoq Lidia suyuman, Tubal suyuman, Grecia suyuman. Kachallasaqtaqmi lamar-qocha patapi kaq karu suyukunamanpas, paykunaqa manan ñoqamanta uyariwarqankuchu, manan qhapaq-atiyninmantapas imatapas yachankuchu. Chay kachasqaykunaqa paykunamanmi qhapaq-atiyninmanta willamunqaku. 20Hinan lliw suyukuna ukhumanta llapa llaqta-masiykichista Jerusalenman pusamunqaku caballokunapi, carretakunapi, toldoyoq carretakunapi, mulakunapi, camellokunapi ima. Paykunan Jerusalenpi ch'uya orqoyman ñoqapaq ofrenda hina pusasqa kanqaku, imaynan Israel runakunaqa wasiyman ch'uya haywanakunapi ofrendakunata apamunku hina. 21Paykunamantan wakinninkuta akllasaq sacerdotekunata Leví runakunata wasiypi serviq kanankupaq, nispa. 22Señor Diosqa nillantaqmi: Ñoqan mosoq hanaq pachatapas mosoq hallp'a pachatapas kamasaq, chaykunan ñawpaqeypi wiñaypaq kashallanqapuni, chay hinan mirayniykichispas sutiykichispas kashallanqapuni. 23Sapa killan, mosoq killa p'unchaypi, sapa semanan samana p'unchaypi, tukuy runa ñawpaqeypi k'umuykukuq hamunqaku. 24Yupaychasqanku qhepata lloqsispankun ñoqa contra sayariqkunaq ayanta rikunqaku. Mikhuqninku kuruqa manapunin wañunqachu, ruphaqninku ninapas manapunin wañunqachu. Tukuy runapaqmi ancha millakuy kanqaku, nispa.

will be added

X\