1 ¡Hanaq pachata kicharillawaqña, hinaspa uraykamullawaqña! Chaymi orqokunaqa qanta rikuspa khatatatanman 2 rawrashaq nina patapi t'impushaq unu hina. Uraykamullawaqña awqaykikunaman qan kikiykita reqsichikunaykipaq, hinan hatun suyukunapas qayllaykipi khatatatanqaku. 3 Qanqa uraykamuspa mana hayk'aq suyasqayku musphanakunata ruwaqtiykin, orqokuna qayllaykipi khatatatarqan. 4 Ñawpamantapachan mana pipas uyarirqanchu, repararqanchu, rikurqanchu wak diostaqa, aswanpas qanllatan. Qanllan suyakuqniykikunapaqqa chaykunata ruwapunki. 5 Qanmi kusisqa chanin ruwaqta chaskinki, munayniykiman hina kawsay munaqta chaskinki, chaypas ñoqaykuqa huchallikurqaykun, qantaqmi phiñakurqanki, chay hinaqa, ¿imaynatan qespichisqa kaykuman? 6 Llapallaykun qhelli runa hina kayku, tukuy chanin kaqkuna ruwasqaykupas millay qhelli thanta hinan, llapallaykun raphi hina naq'eykapuyku, huchallikusqaykupas wayra hinan apawanku. 7 Manan pipas qanmanta mañakamunchu, manan pipas qanman hap'ipakamunchu, chaymi mana qhawarimuwankikuchu, millay ruwasqaykupi naq'enaykupaqmi saqerpariwarqankiku. 8 Chaypas, Señor Diosnillayku, qanmi taytaykuqa kanki. Ñoqaykuqa t'urullan kayku, qantaq llut'aqniyku kanki, llapallaykutan ruwawarqankiku. 9 Señor Diosnillayku, ama sinchita phiñakuychu, amallataq mana chanin ruwasqaykutapas yuyarishallaychu. ¡Llapallaykun llaqtayki kayku, chayrayku qhawarimuwayku! 10 Ch'uya llaqtaykikunan purun kapushan, Sión llaqtan raqay-raqay kapushan, Jerusalenmi thunisqa kapushan. 11 Tayta-mamaykuq qanta yupaychamunanku ancha sumaq ch'uya wasiykun ninaq ruphasqan kapushan, tukuy aswan munasqayku cheqaskunan thunisqa kapushan. 12 Chay hina kashaqtinqa, Señor Diosnillayku, ¿manachu imanankipas? ¿Upallakunkichu? ¿Sinchitapunichu llakichiwankiku? nispa.
