Isaías 6

1Rey Uziaspa wañukapusqan watapin Señor Diosta rikurqani, paymi altopi tiyashasqa kamachikunan hatun tiyananpi, qoysu p'achanmi yupaychana wasita hunt'aykushasqa. 2Paypa altonpin k'anchashaq serafinkuna kashasqa, chaykunan soqta raphrayoqkama kasqaku. Iskay raphrankuwanmi uyankuta pakakusqaku, iskaywantaq chakinkuta pakakusqaku, iskaywantaq phalasqaku. 3Paykunapuran waqyanakurqanku: ¡Tukuy-atiyniyoq Señor Diosqa ch'uyay-ch'uya, ch'uyapunin! ¡Paypa lliphlli-kayninqa kay pachantintan hunt'aykun! nispanku. 4Chay hinata qapariqtinkun yupaychana wasiq punkunraq chhaphchikurqan, wasimantaq q'osñi hunt'aykurqan. 5Hinan nirqani: ¡Ay ñoqamanta, imanaykusaqtaq, wañurqosaqchá kunanqa! Tukuy-atiyniyoq Señor Diostan rikurqoni, payqa Reymi, ñoqaqa millay qhelli simi runan kani, millay qhelli simi rimaq runakuna ukhupitaqmi tiyanipas, nispa. 6Chay raton k'anchashaq serafinkunamanta huknin ñoqaman phalarimurqan. Altar patamanta sansata tenazakunawan hap'ispan apamuwarqan, 7hinaspan chaywan simiyta tupaykuwaspa niwarqan: Qhawariy, kay sansan simiykita tupaykusunki, huchallikusqaykin pichasqa, huchaykikunan pampachasqa, nispa. 8Chaymantataq Señor Diospa kunkanta uyarirqani: ¿Pitataq kachasaq? ¿Pitaq ñoqanchismanta willaq rinqa? nishaqta. Hinan ñoqaqa kutichirqani: Ñoqan kaypi kashani, ñoqata kachaway, nispa. 9Chaymi niwarqan: Phaway, kay llaqtata nimuy: Anchataña uyarishaspapas manan entiendenkichischu, allintaña qhawashaspapas manan reparankichischu, nispa. 10Kay runakunaq sonqonta rumiyachiy, ninrinkutapas roqt'uyachiy, ñawinkutapas ñawsayachiy, ama uyarinankupaq, ama rikunankupaq, ama entiendenankupaqwan. Ahinapin ñoqaman mana kutirikamuwanqakuchu, manataq qhaliyachisqapaschu kanqaku, nispa. 11Chaymi ñoqaqa tapuykurqani: Señor Diosníy, chaykunari, ¿hayk'a unaytaq kanqa? nispa. Paytaq niwarqan: Llaqtakuna lliw thunisqa, mana ch'ulla tiyaqniyoq kanankama, wasikunapas mana ch'ulla runayoq kanankama, campokunapas purun-purun kanankama, 12runakunata presota karu suyuman apachinaykama, kay suyu ch'usaqpuni-ch'usaq kanankama. 13Runakunamanta chunka p'akillanña qhepanman chaypas, wañuchisqallapunin kanqa, ichaqa imaynan encina sach'apas, roble sach'apas wit'usqa kurkunmanta ch'ikchimun, chay hinatan ch'uya llaqtayqa ch'ikchimunqa, nispa.

will be added

X\