1 Manan Señor Diospa atiyninqa pisiyarqonchu, payqa qespichinqapunin. Manan Señor Diosqa roqt'uyarqonpaschu, payqa uyarinqapunin. 2 Ichaqa mana chanin ruwasqaykichiskunan qankunataqa Diosniykichismanta t'aqarqasunkichis, huchaykichiskuna hawan mana qhawarimusunkichischu, mana uyarisunkichispaschu. 3 Qankunaqa runa wañuchiqmi kankichis, mana chanin ruwaqmi kankichis, llullan kankichis, millaytan rimankichis. 4 Manan pipas juzganapi chaninninpi quejakunchu, manan pipas cheqaq sonqowan juzganaman rinchu, aswanpas yanqa thawtiyman hap'ipakuspan llullakunku, mana allinkunatan kamarinku, mana chanintan paqarichinku. 5 Mach'aqway runtukunata oqllaq hinan millaykunata yuyaykunku, qhampu llikakuna hinan yuyaykusqankuqa. Chay runtukunata mikhuqqa wañunmi, q'apiykuqtinkupas mach'aqwaykunan lloqsimun. 6 Chay llikakunaqa manan p'acha ruwakunapaq allinchu, manan pipas ruwasqankuwanqa p'achakuyta atinchu, ruwasqankuqa mana chaninpunin, maqashaspallan pitapas imaymanata ruwanku. 7 Usqhayllan mana allinmanqa phawarinku, mana manchakuspan mana huchayoqta wañuchinku. Yuyaykusqankuqa mana chaninpunin, runakunata waqllichispallan muchuchispallan kawsanku. 8 Manan piwanpas sumaqta kawsankuchu, manan paykunaqa ima chanintapas ruwankuchu. Purisqanku ñankunaqa q'ewisqakaman, pipas chaykunanta puriqqa manan sumaq kawsayta yachanchu. 9 Chaymi Diosqa mana kacharichiwanchischu, payqa manan qespichiwanchischu. K'anchaytan purinanchispaq suyakunchis, ichaqa tutayaqllapunin kashan, sut'iyaytan suyakunchis, ichaqa laqhayaqllapipunin purishanchis. 10 Ñawsakuna hinan perqata llankhukunchis, mana rikuqkuna hinan llamispalla purinchis, tutapi hinan chawpi p'unchaypi misk'akunchis, kallpasapakuna ukhupin wañusqakuna hina kanchis. 11 Llapallanchismi ukumarikuna hina ayqonchis, urpikuna hinan khuyayta “qoy, qoy” ninchis, Diospa qespichiwananchistan suyakunchis, manataq qespichiwanchischu, kacharichiwananchistan suyakunchis, manataq kacharichiwanchischu. 12 Diosnillayku, ñoqaykuqa sinchitan mana kasurqaykikuchu, huchaykupas huchachawankun, mana chanin ruwasqaykutaqa reqsikuykun, huchaykutapas willakuykikun. 13 Manan qantaqa kasurqaykikupaschu, manataq qanpaqqa hunt'aqpaschu karqayku, aswanpas saqepurqaykikun, hukkunatan pisicharqayku, ch'aqwa hatarichiqmi karqayku, llullakuyta yuyaykuspaykun hukkunata q'otunaykupaq rimanakurqayku. 14 Ahinaqa chanin-kaymi wikch'usqa kapun, chanin kawsaymi mana qayllaykampunchu, manan plazapi cheqaq-kayqa kanñachu, chanin kawsaypas manan rikhurimpunchu. 15 Manañan pipas siminta hunt'apunchu, mana allinmanta t'aqakuqtapas llat'anankun. Señor Diosqa manan kusikurqanchu chanin-kaypa mana kasqanta rikuspaqa. 16 Ñak'arichisqakunata mana pipas yanapaykuq kasqantan rikurqan, mana pipas sayarikuq kasqanmantan utirayarqan, chaymi atiyninwan qespichirqan, chanin yuyaykusqanwanmi atiparqan. 17 Chanin-kaywanmi soldadoq unkunwan hina p'achakurqan, qespikuywanmi cascowan hina churakurqan, awqankunata vengakuywanmi p'achawan hina p'achakurqan, muchuchinanpaq sienteywanmi capawan hina churakurqan. 18 Ruwasqankunaman hinan sapankaman paganqa, payta cheqnikuqkunatan k'arakta muchuchinqa, awqankunamanmi maychus chaskinankutapuni qonqa, lamar-qocha patapi tiyaq llaqtakunatapas muchuchinqan. 19 Inti lloqsimuy ladomanta inti haykuy ladokama tiyaqkunan Señor Diosta hatun atiynintapas manchakunqaku. Payqa kallpasapa wayraq tanqasqan phawashaq mayu hinan hamunqa. 20 Señor Diosmi nin: Sionmanmi kacharichiqniykichis hamusaq, Jacobpa mirayninkuna huchankumanta ñoqaman kutirikamuqkunamanmi hamusaq. 21 Qankunawanmi rimanakuni: Ñoqan Espirituyta qoykichis, simiykunawanmi yachachiykichis. Chaykunaqa wiñay-wiñaypaqmi kashanqa qankunawanpas, wawaykichiskunawanpas, nietoykichiskunawanpas, nispa.
