Isaías 53

1Llaqta runakunan nin: ¿Pitaq uyarisqankutaqa iñinman karqan? ¿Pitaq Señor Diospa chay ruwashasqantaqa reparanman karqan? 2Ch'ikchimushaq hinan payqa Diospa ñawpaqenpi wiñarqan, ch'aki hallp'api saphiyoq hinan wiñarqan. Manan allin rikch'ayniyoqpaschu munaypaschu karqan. Manan qhawapayaspa munanapaq hinapaschu karqan, 3runakunaq pisichasqanmi qhawarparisqanmi karqan. Nanaypa ñit'isqan runan karqan, muchuyman yachasqan karqan, manan pipas paytaqa rikuyta munarqanchu, ñoqanchispas pisichaspan hinallata qhawarparirqanchis. 4Chaypas paypunin onqoyninchiskunata muchurqan, nanayninchiskunatapas muchurqanpunin. Ñoqanchistaq Diospa ñak'arichisqanpaq yuyarqanchis: Diosmi paytaqa k'irishan k'umuykachishan, nispa. 5Paytaq ichaqa mana kasukusqanchiskunamanta k'irisqa karqan, huchanchiskunamanta sinchi muchuchisqa karqan. Diosqa allinninchispaqmi paytaqa ñak'arichirqan, chaymi k'irisqa kasqanwan qhaliyachisqa kanchis. 6Llapallanchismi ovejakuna hina ch'eqeripurqanchis, sapankan ñanninkumankama t'aqarikapurqanku, Señor Diostaqmi llapanchispa huchanchismanta payta muchuchirqan. 7Payqa muchuchisqan karqan, ichaqa k'umuykukullarqanmi, manan rimarillarqanpaschu. Nak'anapaq apasqa borrego hinan karqan, millman rutuqninpa qayllanpi oveja hinan upallakurqan, manan payqa rimarillarqanpaschu. 8Mana chaninninpin hap'isqapas juzgasqapas karqan, manataqmi pipas paymanta llakikurqanchu. Wañuchipurqankun, llaqtaypa huchankunamantan wañuchisqa karqan. 9Huchasapakunawanmi p'ampasqa karqan, qhapaqkunawanmi p'ampasqa karqan, chaypas manan hayk'aqpas mana chaninta ruwarqanchu, manan llullakurqanpaschu, nispa. 10Ichaqa Señor Diosmi payta muchuchiyta munarqan, hinan payqa hucha pampachaypaq sacrificasqa wañurqan. Chaymi mirayninta rikunqa, unaytataq kawsanqa, ñoqa Señor Diospa yuyaykusqaykunatapas paymi hunt'anqa. 11Sinchi muchusqan qhepatan k'anchayta rikunqa, chay hinapin yachanqa mana yanqapaqchu muchusqanta. Chanin kamachiymi askha runaq huchanmanta muchurqan, chaymi payqa paykunata chaninchanqa. 12Ñoqaqa allichachaqkuna ukhupin payta hatunchasaq, kallpasapakunawantaq qechusqakunata rakinakunqa. Wañunamanmi paymantakama rirqan, huchasapakuna hinan wañurqan, pay kikinmi askha runaq huchanta q'epirqan, huchasapakunapaqmi ñoqamanta mañakurqan.

will be added

X\