Isaías 45

1Señor Diosmi rey kananpaq Cirota hawirqan, paytan paña makinmanta hap'iykuspa nin: Ñawpaqeykipin hatun suyukunata atipani, reykunaq atiynintapas yanqayachini, ñawpaqeykipin llaqta punkukunata kichani kicharayashananpaq. 2Ñoqan ñawpaqeykita risaq, orqokunatan pampayachisaq, bronce punkukunatan p'akisaq, fierro q'ewikunatan chhallusaq. 3Ñoqan pakasqa illakunata qosqayki, pakapi waqaychasqa qhapaq kaykunata qosqayki Señor Dios kasqayta yachanaykipaq, Israelpa Diosnin sutiykimanta waqyasqayta yachanaykipaq. 4Kamachiy Jacobta yanapanaykiraykun akllakusqay Israel llaqtata kacharichinaykiraykun sutiykimanta waqyayki, qhapaq sutiwanmi sutichayki qanqa manaraq reqsiwankichu chaypas. 5Ñoqan Señor Diosqa kani, manan wakqa kanchu, manan ñoqamanta wak diosqa kanchu. Ñoqan maqanakunaykipaq kallpachayki, qanqa manaraq reqsiwankichu chaypas. 6Ñoqan chayta ruwani teqsimuyuntinpi runakuna ñoqallapuni Diosqa kasqayta yachanankupaq. Ñoqan Señor Diosqa kani, manan wakqa kanchu. 7Ñoqan k'anchayta k'ancharichini, laqhayaqtapas kamani, ñoqan samitapas rikhurichini, hatun llakitapas paqarichini, ñoqa Señor Diosmi tukuy chaykunataqa ruwani. 8Ñoqan hanaq pachamanta chanin-kayta parachimusaq, phuyumantan chanin-kayta parachimusaq. Hallp'a pampan ch'onqanqa, hinaspa qespikuyta ruruchinqa, chaninkaqtapas t'ikachinqa. Ñoqa Señor Diosmi chayta ruwasaq. 9¡Ay, Kamaqninwan churanakuqmanta! Payqa k'arpakuna ukhupi k'arpallataqmi. T'uruqa llut'aqninta ninmanchu: ¿Imatan ruwashanki, nispa? Ruwasqanpas ninmanchu: ¿Manan llut'ayta yachankichu, nispa? 10¡Ay, taytanta: ¿Imapaqmi churiyawarqanki? niqmanta! ¡Ay, mamantapas: ¿Imapaqmi wachawarqanki? nispa qapariykuqmanta! 11Israelpa Ch'uya Diosninmi, Kamaqnin Señor Diosmi nin: Ñoqan imachus qhepaman kananta yuyaykuni, qankunari, ¿wawaykunamantachu tapuwankichis? Icha, ¿imaynata ruwanaypaqchu yachachiwankichis? 12Ñoqan kay pachata ruwarqani, chaypin runata kamarqani, ñoqa kikiymi hanaq pachata mast'arqani, llapa ch'askakunatan kamachini. 13Ñoqan Cirota paqarichimurqani chanin yuyaykusqayta hunt'anaypaq, maykunantachus purinantan kuskachasaq. Paymi llaqtayta wakmanta perqanqa, kamachipaq apasqa runakunatapas kacharinqa, mana pagotapas qokuytapas chaskispalla. Ñoqa Tukuy-atiyniyoq Señor Diosmi chayta nini, nispa. 14Señor Diosmi Israelta nin: Egipto suyuq ruruchisqankunan, Etiopía suyuq qhatunankunan, Sabá suyu hatunkaray runakunan qanman chayamunqa, hinaspan qankunaq kapunqa. Chay runakunaqa cadenawan watasqan qhepaykita purinqaku, ñawpaqeykipin qonqorikuspa nisunkiku: Qanllawanpunin Diosqa kashan, manan wak Diosqa kanñachu, nispanku. 15Israelpa Diosnin, qanmi llaqtayta qespichinki, qanqa mana rikuna Diosmi kanki. 16Idolota ruwaqkunaqa llapallankun musphachisqa p'enqachisqa kanqaku, llapallankun hatun llakipi rikukunqaku. 17Israeltan ichaqa Señor Diosqa qespichin, mana p'itiytan yanapashallanpuni, manan hayk'aqpas p'enqachisqachu k'umuykachisqapaschu kanqa. 18Señormi hanaq pachata kamarqan, paymi Diosqa. Paymi kay pachata ruwarqanpas teqsicharqanpas, manan yanqa kananpaqchu chayta kamarqan, aswanpas runaq tiyananpaqmi kamarqan. Paymi nin: Ñoqallan Señor Diosqa kani, manan wak diosqa kanchu. 19Manan pakapichu rimarqani, manan tutayaq hallp'a pachapipaschu rimarqani. Manan Jacobpa mirayninta nirqanichu: Maskhawankichisña chaypas, yanqapaqmi kanqa, nispaqa. Aswanpas ñoqa Señor Diosmi cheqaqtaqa rimani, chaninkaqtan willani, nispa. 20Señor Diosmi nin: Hatun suyu runakuna, huñukamuychis, Babilonia suyuq urmaykusqanmanta ayqekuqkuna hamuychis. Mana ima yachaqmi k'ullu idolonkuta wantuqkunaqa, mana yuyayniyoqmi paykunata mana qespichiyta atiq diosmanta mañakuqkunaqa. 21Juzganapi rimariychis, pruebakunata willakuychis, llapallaykichis tapunakuychis. ¿Pitaq ñawpamantapacha chaykunata willakurqan? ¿Pitaq unaymantaña chay sucedesqakunata willakurqan? ¿Manachu ñoqa Señor Diosqa willakurqani? Ñoqallapunin Diosqa kani, chanin Diosmi kani, qespichiqmi kani, manan ñoqamanta wak diosqa kanchu. 22Kay pachantinpi tiyaqkuna, kutimpuwaychis, ñoqan qespichisqaykichis, ñoqan Diosqa kani, manan wakqa kanchu. 23Sutiypin jurani, cheqaqtapunin rimani: ñawpaqeypin llapa runa qonqorikamuwanqaku, hinaspan kasuwanankupaq juranqaku: 24Señor Diosllapunin atipachinpas kallpachanpas, nispanku. Chay ruwasqayqa hunt'akullanqapunin. Ñoqa Señor Dios contra llapa phiñakuqkunan ñawpaqeyman hamuspanku p'enqakunqaku. 25Ñoqa kaqtiymi Israelpa llapa mirayninqa atipanqa, hinaspan hatunchawanqaku, nispa.

will be added

X\