Isaías 44

1Kunanqa kamachiy Jacob, uyariway, akllakusqay Israel, uyariway. 2Ñoqan kamaqniyki Señor Diosqa kani, mamaykiq wiksallanpiraqmi ruwarqayki, kunanmi yanapaykushayki, ahinaqa ama manchakuychu, qanqa kamachiymi kanki, akllakusqay Jesurunmi kanki. 3Ñoqan ch'aki pampaman unuta parachimusaq, ch'aki hallp'api yarqhakunata purichisaq. Mirayniykimanmi Espirituyta kachaykamusaq, wawaykikunatan saminchasaq. 4Hinan allin qarpasqa q'achu hina wiñanqaku, mayu patapi saucekuna hina wiñanqaku. 5Hukninmi ninqa: Ñoqaqa Señor Diospan kani, nispa, huknintaq ninqa: Jacobpa mirayninmi kani, nispa, hukninkaqtaq makinpi qelqakunqa: Señor Diospa kaqninmi kani, nispa, hinaspan sutinman Israel sutiwan sutichakunqa, nispa. 6Israel runakunaq reynin Señor Diosmi, Israelta kacharichiq Tukuy-atiyniyoq Señor Diosmi nin: Ñoqan ñawpaqkaqpas qhepakaqpas kani, ñoqamanta wak diosqa manan kanchu. 7¿Pitaq ñoqa hinari? ¡Sayarimuspa rimarichun! ¡Llaqtayta akllakusqaymantapacha sucedesqankunata willakuchun! ¡Imachus qhepaman kananta willakuchun! 8Llaqtalláy, ama khatatataychu, ama manchapakuychu, chaytaqa willarqaykiñan, ñawpaqmantañan willarqayki. Qankunan testigoykunaqa kankichis. ¿Ñoqamanta wak diosqa kanchu? Manan wak Pakakuna Qaqaqa kanchu, manan pitapas reqsinichu, nispa. 9Idolokunata ruwaqkunaqa yanqakaman, chaninpaq qhawasqanku idolokunaqa mana imapaq valeqmi. Idolokunata yupaychaqkunaqa ñawsan, manan imatapas yachankuchu, chaymi p'enqaypi rikukunqaku. 10Idolota ruwaqqa mana imapaq valeq diostan ruwan. 11Pipas idolota yupaychaqqa p'enqaypin rikukunqa, idolokunata ruwaqkunaqa runallan kanku. Llapallanku huk nisqalla Diosman qayllaykuchunku, chaypin manchakunqakupas p'enqakunqakupas. 12Herreron cincelta hap'in, sansa ukhupin fierrota parichin, chaytan martillowan takashaspalla ídolo rikch'ayta horqon, chaytan kallpasapa makinwan ruwan, yarqachikunmi, hinan laqhoyapun, unumantan ch'akichikun, hinan pisipapun. 13K'ullu llaqllaqmi reglata churan, lapizwanmi seq'eykun, azuelawanmi llaqllan, compaswan tupuspan ch'ikurqarin, hinaspa runa rikch'ayta ruwan, munay rikch'ayniyoq runata, chayta wasinpi churananpaq. 14Cedro sach'atan kumpan, otaq sach'a-sach'a ukhupi kurkuyasqa ciprestapas robletapas akllan, otaq laurel mallkisqan sach'ata parawan wiñachin. 15Chay kurkuwanmi runaqa wayk'ukun, wakinwanmi q'osñichikun, wakinwanmi hornota kanan t'antata ruwananpaq, wakinmantataqmi diosta llaqllaspa chayta yupaychan, idolota ruwaspan chaypa ñawpaqenpi qonqorikun. 16Wakintan ninaman kanan, chay sansa patapin aychata kankan, aychata mikhuspan saksaykun. Chay ninapi q'oñikuspan nin: ¡May allinmi nina qayllapi kay, q'oñirishaniñan! nispa. 17Wakinmantataq idolota ruwakun, chaytan yupaychan, chaypa ñawpaqenpin qonqoriykukuspa mañakun: ¡Qespichiway, qanqa diosniymi kanki! nispa. 18Chay runakunaqa manan yachankuchu manan entiendenkuchu, ñawinkupas ñawsayaykunmi mana rikunankupaq, sonqonkupas rumiyaykunmi mana entiendenankupaq. 19Manan mayqenninkupas reparankuchu, manan yuyayninku kanchu, manan yuyaykuspa ninkuchu: Wakin kurkutan kanaykurqani, chay sansapin t'antata chayachirqani, aychatan kankarqani hinaspan chayta mikhurqani. ¡Wakinmantataq kay millay idolota ruwasqani! ¡Kay yupaychashasqayqa huk k'ullullan kasqa! nispaqa. 20Chayqa usphata mikhuy hinapunin, sonqonmi q'otuspa pantachin. Manan qespikuyta atinqakuchu, manan entiendenqakuchu makinkupi hap'ishasqankuqa llullapuni kasqantaqa. 21Señor Diosmi nin: Jacoblláy, kayta yuyariy, Israel-lláy, kamachiymi kanki. Ñoqan ruwarqayki, kamachiymi qanqa kanki. Israel-lláy, manan qonqakusqaykichu. 22Ñoqan phuyuta hina huchallikusqaykikunata chinkachini, pacha phuyuta hinan huchaykikunata ch'usaqyachini. Ñoqan qespichimurqayki, chayrayku kutirikamuway, nispa. 23Señor Diosmi Jacobpa mirayninta qespichirqan, Israelpaq ruwasqanwanmi qhapaqchasqa karqan, chayrayku, hanaq pacha, kusisqa qapariy, hallp'a pacha ukhukuna, kusisqa qapariychis, orqokunapas llapa sach'akunapas, takiykuychis. 24Señor Diosmi nin: Ñoqan mamaykiq wiksallanpiraq ruwarqayki, qantan qespichirqayki. Ñoqan Señor Diosqa kani, tukuy imaymanata kamaqqa, ñoqallan hanaq pachata mast'arirqani, mana yanapasqallan hallp'a pachata takyachirqani. 25Ñoqan llulla profetakunaq watusqanta qolluchini, watuqkunaq yuyayninwanpas pukllakuni. Ñoqan hamawt'akunata pantachini, yachayniyoqkunatapas yanqa thawtiqman tukuchini. 26Ñoqan kamachiykunaq siminta hunt'ani, kachasqaykunaq willakusqantapas hunt'achini. Ñoqan Jerusalenmanta nini: Chaypi runa wakmanta tiyachun, nispa. Judá suyu llaqtakunamantan nini: Wakmanta perqasqa kachun, nispa, raqayninkumantan nini: Ñoqan wakmanta perqasaq, nispa. 27Lamar-qochatan nini: ¡Ch'akipuy! Ñoqan mayuykikunata ch'akichipusaq, nispa. 28Ñoqan Cirota nini: Qanmi michipuqniy kanki, qanmi tukuy ima munasqayta hunt'anki, nispa. Paymi Jerusalenmanta ninqa: Wakmanta perqasqa kachun, nispa, yupaychana wasimantapas ninqa: Teqsinkuna teqsichasqa kachun, nispa.

will be added

X\