Isaías 43

1Jacobpa miraynin Israel llaqta, kamaqniyki Señor Diosmi nisunki: Ama manchakuychu, ñoqan kacharichimurqayki, sutiykimantan waqyamurqayki, ñoqapaqmi qanqa kanki. 2Unuta chimpaqtiykipas, ñoqaqa qanwanmi kasaq, mayunta chimpaqtiykipas, manan mayuqa millp'usunkichu. Nina ukhunta puriqtiykipas, manan ruphasunkichu, ninaqa manan imanasunkipaschu. 3Ñoqan Diosniyki Señor Dios kani, Israelpa Ch'uya Diosninmi kani, Qespichiqniykin kani. Qanta kacharichinaypaqqa Egipto suyutan pagani, rantiykipitaq Etiopía suyuta Seba suyutawan qoni. 4Ñoqapaqqa ancha chaniyoqmi kanki, ñoqan munakuyki hatunchaykuyki, chaymi kacharisqa kanaykipaq runakunata pagani, qespichisqa kanaykipaq hatun suyukunata pagani. 5Ama manchakuychu, ñoqaqa qanwanmi kashani, inti lloqsimuymantan mirayniykita pusamusaq, inti haykuymantataq hoqarimusqayki. 6Wichaytan nisaq: Paykunata kutichimuy, nispa, uraytataq nisaq: Ama hark'amuychu, nispa. Churiykuna karumanta hampuchun, ususiykunapas kay pachaq karunmanta kutimpuchun. 7Paykunaqa ñoqaq llaqtaymi, paykunataqa hatunchawanankupaqmi kamarqani, nispa. 8Señor Diosmi nin: llaqtayta waqyamuychis, paykunaqa qhawaq ñawsan, uyariq roqt'un kanku. 9Llapa hatun suyukuna juzganaman huñukamuchunku, llapa llaqtakuna hamuchunku. ¿Mayqen diosninkutaq chay kananta willawarqanchis? ¿Mayqen diosninkutaq chay sucedesqantaña willawarqanchis? Testigonkuta pusamuchunku: Hinapunin kasqa, nispa rimarinankupaq, uyariqkuna: Cheqaqpunin kasqa, nispa ninankupaq. 10Israel llaqtalláy, testigoykunan qankunaqa kankichis, akllakusqay kamachiykunan kankichis, reqsiwanaykichispaq iñiwanaykichispaq, Diospuni kasqaytapas yachanaykichispaq. Ñoqallapunin Diosqa kani, manan hayk'aqpas wak diosqa karqanchu. 11Ñoqallapunin Señorqa kani, ñoqallapunin qespichiqpas kani, 12ñoqan chay kananta willarqani uyarichirqani, qankunatan qespichirqaykichis, manan wak dioschu chayta ruwarqan. Chhaynaqa, qankunan testigoykuna kankichis, maypachamantapas Diospuni kasqaymanta. 13Manataqmi pipas makiymanta qechuqqa kanchu, manan pipas ñoqaq imapas ruwasqaytaqa qolluchiyta atinmanchu, nispa. 14Israelpa Ch'uya Diosnin, qespichiqniykichis Señor Diosmi nin: Qankunata qespichinallaypaqmi runakunata Babilonia contra kachani, hinan Babilonia runakunaqa barconkupi kusikunankutaqa ayqekuytapuni munanqaku. 15Ñoqan Señorqa kani, Ch'uya Diosniykichis, ñoqan Israelpa Kamaqnin kani, Reyniykichis, nispa. 16Señor Diosmi llaqtanta nin: Unayñan lamar-qochapi ñanta kicharqani, manchana unupi purinata kicharqani, 17kallpasapa ejercitontan qatimurqani carretakunantinta caballokunantinta, kuskallan manaña sayarinankupaq urmaykurqanku, wañupuq mecha hinan tukukurqanku. 18Chaywanpas amaña unay p'unchayta yuyariychischu, amaña ñawpata rimashaychischu. 19Ñoqan mosoqkaqta ruwashani, chayqa rikhurishanñan, ¿manachu reparankichis? Ñantan ch'inneqpi kichashani, mayukunatapas ch'aki pampapi purichishani 20akllakusqay llaqtaman ukyachinaypaq. Ch'inneqpin unuta phullpuchishani, ch'aki pampapin mayukunata purichishani, chaymi campo salqa uywakunapas, chacalkunapas, surikunapas, yupaychamuwanqaku. 21Kay llaqtataqa ñoqapaqmi kamakurqani, yupaychaykunatan takipuwanqa. 22Chaywanpas, Jacoblláy, manan waqyakamuwarqankichu, Israelláy, ñoqawanmi amikurqanki. 23Manan ovejakunata ruphachina sacrificiopi haywawarqankichu, manan sacrificioykikunawanpas yupaychawarqankichu. Chaypas manan ruru ofrendakunata mañakuspa sayk'uchirqaykichu, manan inciensota mañakuspapas mat'irqaykichu. 24Manan q'apaq cañakunatapas rantipuwarqankichu, manan sacrificanayki wiratapas haywawarqankichu, aswanmi huchaykikunata q'epichiwarqanki, mana chanin ruwasqaykikunawanmi sayk'uchiwarqanki. 25Ichaqa, ñoqan kashani, ñoqaraykun huchallikusqaykikunata pichani, manañataqmi huchaykikunata yuyarisaqchu. 26Imapas huchachawanaykipaq kaqtinqa, ¡juzganaman risunchis! Lliwta willakuy, hinan rimasqayki cheqaqchus manachus kasqanta yachasun. 27Ñawpa taytaykin huchallikurqan, umalliykikunapas ñoqa contran sayarirqan. 28Chaymi ñoqaqa yupaychana wasiy umalli runakunata saruncharqani, Jacobtapas ñakanapaqmi churarqani, Israeltapas k'aminapaqmi churarqani.

will be added

X\