Isaías 42

1Señor Diosmi nin: Kayqa kamachiymi, ñoqan payta kallpachani, paymi akllakusqay, paymi kusichiwan. Paytan Espirituywan hunt'aykuni, hatun suyukunamanmi chanin-kayta willanqa. 2Manan qaparkachanqachu, manan waqyakunqachu, manan callekunapipas kunkanqa uyarikunqachu. 3Manan q'echusqa soqostaqa p'akinqachu, manan q'osñishaq mechatapas wañuchinqachu, cheqaqtapunin chanin-kayta churanqa. 4Manan pisipanqachu manan sayk'unqapaschu, imachus chanin-kayta kay pachapi churanankama. Lamar-qocha pata hatun suyukunataqmi yachachikuy siminkunata maki suyashanqaku, nispa. 5Señor Diosmi hanaq pachata kamaspa mast'arirqan, kay pachatapas chaypi kaqkunatapas ruwarqan, chaypi tiyaq runakunatapas kawsachin, chay patanta puriqkunamanpas samayta qoykun. Paymi kamachinta nin: 6Ñoqa Señor Diosmi ruwarqayki waqyarqayki, pusashaykin chanin yuyaykusqayta hunt'anaykipaq, qanmi runakunawan sutiypi rimanakunki, hatun suyukunapaqmi k'anchay kanki. 7Ñawsakunaq ñawintan kicharimunki, presokunatan carcelmanta horqomunki, tutayaqpi tiyaqkunatan watay wasimanta kacharichimunki, nispa. 8Ñoqallan Señor Diosqa kani, manan pipas ñoqa hina qhapaqchasqaqa kanqachu, ñoqallan yupaychasqaqa kanay, manan idolokunachu. 9Kayqa, ñawpaq willasqaykunan hunt'akunña, kunantaqmi mosoqkunata willakusaq, manaraq rikhurimushaqtinmi chaykunata willaykichis. 10Señor Diosman mosoq takita takiychis, teqsimuyuntinpi payta yupaychaychis, lamar-qochanta barcopi puriqkuna, payta yupaychaychis, chaypi tiyaq animalkunapas, payta yupaychaychis, lamar-qocha pata hatun suyu runakunapas, payta yupaychaychis. 11Ch'inneqpas chaypi kaq llaqtakunapas kusikuchunku, karpakunapi tiyaq Cedar ayllu runakunapas kusikuchunku, Petra llaqtapi tiyaqkuna kusisqa takichunku, orqo patakunamantapacha kusisqa qaparichunku. 12Señor Diosta qhapaqchachunku, payta yupaychachunku, lamar-qocha islakunapi payta yupaychachunku. 13Señor Diosmi kallpasapa runa hina lloqsin, awqa-tinkuq runa hinapunin phiñakun, kunkayoqta waqyakuspan: ¡Maqanakusunchis! nispa qaparin, awqakunatataqmi atipan. 14Señor Diosmi nin: Unayñan ch'inlla kasharqani, upallakurqanin aguantakurqanin, kunanmi ichaqa wachakushaq warmi hina qaparkachasaq, anchisaq, khuyayta samaqesaq. 15Orqokunatan moqokunatan thunisaq, llapa q'omertan ch'akichisaq, mayukunatan ch'aki pampaman tukuchisaq, qochakunatan ch'akichisaq. 16Ñawsakunatan mana rikusqanku ñankunanta purichisaq, mana rikusqanku ñankunantan paykunata pusasaq, laqhayaqtan ñawpaqenkupi k'ancharichisaq, ranratapas pampayachisaqmi. Chaykunataqa ruwasaqpunin, llaqtaytaqa manan saqerparisaqchu. 17Idolokunaman hap'ipakuqkunaqa, chaykunaq rikch'ayninta diosniykun kankichis, nispa niqkunaqa, qhepaman kutichisqa, sinchi p'enqachisqataq kanqaku. 18Roqt'ukuna, uyariychis, ñawsakuna, rikunaykichispaq qhawariychis. 19¿Pin kamachiymantapas aswan ñawsaraq? ¿Pin kachasqay runamantapas aswan roqt'uraq? ¿Pin waqyakusqay llaqtamantapas aswan ñawsaraq? ¿Pin ñoqa Señor Diospa kamachiymantapas aswan roqt'uraq? 20Imaynatan rikurqanki, ichaqa manan chaykunata repararqankichu, uyariytaqa atirqankin, ichaqa manan imatapas uyarirqankichu, nispa. 21Señor Diosmi chanin yuyaykusqanta hunt'ananpaq yachachikuy simita hatuncharqan, may hina chaniyoqchus kamachikuy siminqa kasqanta llaqtanman yachachirqan. 22Chaypas, kay llaqtatan suwarqanku llat'anarqanku, llapallankutan qaqa wasikunaman wisq'arqanku, carcelkunamanmi apaykurqanku. Paykunatan llat'anarqanku manataq pipas paykunata kacharichiq karqanchu, paykunatan suwaspa aparqanku, manataq pipas: Kutichipuychis, nispa niqqa karqanchu. 23Chayri, ¿mayqenniykichistaq kayta uyarinqa? Ima ninantachus kaykunaq nisqantari, ¿pitaq yuyaymananqa? 24¿Pin Jacobpa mirayninta qechunapaq qoykurqan? ¿Pin Israelta llat'anaqkunaman hap'iykachirqan? ¿Manachu Señor Dios chayta ruwarqan? Pay contran huchallikurqanchis, manan ñanninkunapi puriyta munarqanchischu, manan yachachikuy simintapas kasurqanchischu. 25Chaymi Señor Diosqa k'arak phiñakuyninta chayachirqan, hatun maqanakuywanmi muchuchirqan. Muyuriqmantan kanaykurqan, chaypas manan repararqankuchu, ruphaykurqanmi, ichaqa manan kasukurqankuchu.

will be added

X\