Isaías 41

1Qocha patapi, islakunapi tiyaqkuna uyariwaychis. Hatun suyukuna, kallpachakuychis, hamuychis huñunakusunchis, juzgasqa kananchispaq. 2¿Pin inti lloqsimuymanta chay atipaqllapuni reyta rikhurichimurqan? ¿Pin payman hatun suyukunata hap'ichin? ¿Pin reykunatapas payman k'umuykachin? Chay reymi espadanwan paykunata ñut'un, wach'inanwanmi wayraq apasqan pajata hina ch'eqechin. 3Paymi paykunata qatin, mana k'irichikuspalla, usqhayllan phawan. 4¿Pin chay hinakunata ruwarqan? Ñoqa Señor Diosmi ruwarqani, qallariymantapacha imapas kanankunataqa ñoqan unancharqani. Ñoqa sapallaymi kani, ñawpaqkaqmi kani, tukukuypipas kashallasaqtaqmi. 5Islakunapi tiyaqkunan ruwasqayta rikuspanku mancharikunku, kay pachantin runakunan khatatatanku, paykunan qayllaykamushankuña, hamushankuña. 6Sapankan yanapanakuspa ninakunku: ¡Kallpachakuy! nispa. 7K'ullu llaqllaqmi qori takaqta kallpachan, martillowan idolota takaspa llusk'achaqpas herrerota kallpachan: Allinmi soldadurawan k'askachisqaykiqa, nispa, hinaspan clavokunawan idolota allinta takan mana kumpakunanpaq. 8Israel-lláy, qanmi kamachiy kanki, Jacoblláy, qantan akllakurqayki, amigoy Abrahampa mirayninmi kanki. 9Kay pachaq karunmantan pusamurqayki, karullaña suyumantan waqyamurqayki, hinaspan nirqayki: Kamachiymi kanki, nispa. Ñoqan akllakurqayki, manataqmi qhawarparirqaykichu. 10Ama manchakuychu, qanwanmi ñoqaqa kashani, ama pisipaychu, ñoqaqa Diosniykin kani, ñoqan kallpachasqaykipas yanapasqaykipas, ñoqan hap'iykusqaykipas atipachisqaykipas. 11Llapa qanpaq k'arakta phiñakuqkunan p'enqachisqa k'umuykachisqa kanqaku, qanwan maqanakuqkunaqa manapas kankumanchu hinan chinkachisqa kanqaku. 12Awqaykikunataqa maskhankin manataqmi tarinkichu, chay maqaqniykikunaqa manapas kankumanchu hinan kanqaku. 13Ñoqaqa Diosniyki Señor Diosmi kani, paña makiykimantan hap'ishayki, ñoqan niyki: Ama manchakuychu, ñoqan yanapasqayki, nispa. 14Señor Diosmi nin: Jacoblláy, kuru hinan pisipaq qhawarisqa kanki, Israel-lláy, qanqa huch'uyllan kanki, chaypas ama manchakuychu, ñoqan yanapasqayki, ñoqaqa Israel runakunaq Ch'uya Diosninmi kani, qespichiqniykitaqmi kani. 15Kayqa, mosoq rastrillomanmi tukuchiyki, ñawch'illaña kirusapa rastrillomanmi tukuchiyki, orqokunatan chaywan ñut'unki, moqokunatan ñut'u pajaman hina tukuchinki. 16Chaykunatan wayrachinki, hinan wayra apanqa, tutuka hatun wayran chaykunata ch'eqechinqa, hinaqtinmi qanqa ñoqarayku q'ochukunki, Israelpa Ch'uya Diosnintan hatunchanki. 17Wakchakunan mana imayoqkunan unuta maskhanku, manataq chayta tarinkuchu, qallunkun mana unu kaqtin k'askaykun. Ñoqa Señor Diostaqmi paykunata uyarisaq, ñoqa Israelpa Diosninqa manan paykunata saqerparisaqchu. 18Q'ara orqokunamantan mayukunata phawachimusaq, wayq'okunapin unukunata phullpuchimusaq, ch'inneqtan p'uytu-p'uytuman tukuchisaq, ch'aki hallp'apin pukyukunata phawachisaq. 19Ch'inneqpin mallkisaq cedro sach'akunata, acacia sach'akunata, arrayán sach'akunata, olivo sach'akunatapas, ch'aki hallp'apin wiñachisaq pino sach'akunata, kiswar sach'akunata, ciprés sach'akunatapas. 20Chaymi runakunaqa chaykunata rikunqaku, hinaspan ñoqa Señor Diospa ruwasqayta yachanqaku, ñoqa Israelpa Ch'uya Diosninpa kamasqayta entiendenqaku, nispa. 21Señor Diosmi nin: Yaw, idolokuna, qankuna tupapakuychis, nispa. Jacobpa Reyninmi nin: Qankunamanta rimarikuychis. 22Asuykamuspa willawayku imachus qhepaman kananta. Ñawpa sucedesqanri, ¿ima ninantan nin? Willawayku, ñoqaykutaq maki uyarisaqku. Qhepaman imachus kananta willawayku chayta yachanaykupaq. 23Qhepaman imachus kananta willawayku, qankunaqa dioskuna kasqaykichista yachanaykupaq. Imallatapas allintapas mana allintapas ruwaychis, chay ruwasqaykichista rikuspa manchapakunaykupaq. 24¡Qankunaqa manan imapaschu kankichis! ¡Manan imatapas ruwayta atinkichischu! Millakuymi qankunata yupaychaq runaqa. 25Reqsisqay runan inti lloqsimuy ladopi tiyan, sutinmantan payta waqyamushani wichaymanta phawaykamunanpaq, chaymi payqa hamushanña. Kamachikuqkunatan t'uruta hina sarunqa, imaynan manka ruwaqqa t'uruta sarun hinata. 26¿Mayqenniykichistaq ñawpaqta chayta willakurqankichis, hina kasqanta rikuspayku: “Hinapunimá kasqa”, ninaykupaq? Manan mayqenniykichispas chaytaqa willakurqankichischu, manan pipas ima simi rimarisqallaykichistapas uyarirqanchu. 27Ñoqapunin ñawpaqtaraq Sionman chayta willarqani, ñoqan Jerusalenman sumaq willakuyta willaqta kacharqani: ¡Kamachipaq apasqakunaqa kutimpushankuñan! ¡Qhawariychis! Chayamushankuñan, nispa, ninanpaq. 28Qhawarirqanin, manataq pipas karqanchu, manan mayqen diospas yuyaychaq karqanchu, chay tapusqayman ima nispapas kutichiwananpaq. 29Llapallankun yanqakama, manan imatapas ruwayta atinkuchu, yanqa mana serviqmi idolonkuqa, nispa.

will be added

X\