Isaías 40

1Diosniykichismi nin: Llaqtayta sonqochaykuychis, paykunata kusirichiychis. 2Jerusalenta sumaqta rimaykuychis, sut'itapuni payman willaykuychis: Khuyay muchusqaykin tukukapun, huchallikusqaykin pampachasqa kapun, tukuy huchallikusqaykimantan Señor Diosqa anchatapuni ñak'arichirqasunki, nispa. 3Huk kunkan waqyakun: Ch'inneqpi Señor Diospaq ñanta kichaychis, Diosninchispaq purun pampapi purinata wakichiychis. 4Llapa wayq'ota hunt'achiychis, llapa orqotapas llapa moqotapas pampayachiychis, p'uktutapas kuskachaychis, khallkatapas llamp'uyachiychis. 5Chhaynaqa, Señor Diosmi qhapaq-atiyninpi rikhurimunqa, hinan llapa runa payta rikunqa. Señor Diospunin chaytaqa nin, nispa. 6Huk kunkan nin: ¡Waqyakuy! nispa. Ñoqataq tapuykurqani: –¿Ima nispataq waqyakusaqri? Llapa runaqa qora hinallan, tukuy sumaq-kayninpas campopi t'ika hinallan. 7Señor Dios chayman wayrachimuqtinmi qorapas ch'akipun, t'ikapas naq'epun. Runaqa qora hinallapunin, nispa. 8Hinan niwarqan: Arí, qorapas ch'akipunmi, t'ikapas naq'epunmi, Diosninchispa siminmi ichaqa wiñaypaq qaqatapuni sayan, nispa. 9Sión llaqta, qanqa allin willakuytan apamushanki, orqo pataman wichay willakunaykipaq. Jerusalén llaqta, qanqa allin willakuytan apamushanki, mana mancharispa kunkayoqta waqyakuy. Judá suyu llaqtakunaman willay: ¡Chayamushanñan Diosniykichisqa! nispa. 10Apu Señor Diosqa atiyniyoqmi chayamushan, atiyninwanmi lliwpi munaychakushan, horqokampusqan llaqtanwanmi hamushan. 11Uywa michiq hinan llaqtanta michin, uñakunatan marq'an, chaykunatan oqllaykun, sumaqllatan qholla uñayoqkunata michin. 12¿Pitaq lamar-qochata maki qochanpi tupurqan? ¿Pitaq hanaq pachata makinwan cuartarqan? ¿Pitaq pachantin hallp'ata huk tupunallapi huñuykurqan? ¿Pitaq orqokunata romanapi aysarqan? ¿Pitaq moqokunata balanzapi pesarqan? 13¿Pitaq Señor Diospa yuyayninta yacharqan? ¿Pitaq payta yuyaycharqan? 14¿Piwantaq yuyaychachikurqan? ¿Pitaq payman yachachirqan chaninkaqta ruwayta? ¿Pitaq yachayta payman yachachirqan? ¿Pitaq reparayta payman rikuchirqan? 15Diospaqqa hatun suyukunaqa unu sut'uy hinallan, balanzapi k'askarayaq ñut'uy-ñut'u hallp'a hinallan. Islakunatapas ñut'u hallp'ata hinallan pesan. 16Diosman ruphachispa haywanapaqqa manan Líbano orqo-orqopi sach'akunapas altar ninapaqqa aypanmanchu, manallataqmi chaypi kaq animalkunapas aypanmanchu. 17Llapa hatun suyukunapas ñawpaqenpiqa manapas kanmanchu hinan, paypaqqa manapas kashankumanchu hinan. 18Chay hinaqa, ¿imawantaq Diosta rikch'anachinkichis? ¿Imaman rikch'akuqtan payta ruwankichis? 19Metal unuyachiqmi hich'aspa idolota ruwan, qori takaqmi chayta qoriwan qatan, hinaspan qolqe cadenakunata chaypaq ruwapun. 20Wakcha kaspan wakin runaqa mana chay hina idolota ruwayta atinchu, chaymi kuruq mana mikhunan kurkuta akllan, hinaspa allin llaqllaqta maskhan mana kumpakuq idolota ruwananpaq. 21¿Manachu yacharqankichis? ¿Manachu uyarirqankichis? ¿Manachu kay pachamantapas willarqasunkichis? ¿Manachu kay pacha kamasqanmantapas entienderqankichis? 22Diosqa kay pachaq muyun patapin tiyashan, runakunatapas t'isku-t'iskuta hinallan rikun. Paymi hanaq pachata cortinata hina mast'arin, chaytan tiyana karpata hina chutarin. 23Paymi atiyniyoqkunata mana imaman tukuchin, kay pachapi kamachikuqkunata mana kaqman tukuchin. 24Paykunaqa qholla mallkikuna hinan, chayllaraq mallkisqakuna hina saphichakushaqtillankuraqmi Diosqa chaykunaman wayrachimun, hinan naq'epun, tutuka hatun wayrapas chaykunataqa chhapata hinan apapun. 25Ch'uya Diosmi tapukun: ¿Piwanmi rikch'anachiwankichis? ¿Pin ñoqa hina kanman? nispa. 26Hanaq pachata qhawariychis. ¿Pin chaykunata kamarqan? Ch'askakunata ch'ulla-ch'ullamanta lloqsichimuqmi, sutinmantakama qoyllurkunata waqyamuqmi. Payqa sinchi atiyniyoqmi sinchi kallpayoqmi, manan ch'ullapas faltanchu. 27Jacoblláy, ¿imanaqtintaq quejakunki? Israel-lláy, ¿imanaqtintaq rimanki: Señor Diosqa manan imaynachus kashasqayta reparanchu, Diosqa manañan yuyariwanchu, nispayki? 28¿Manachu yacharqanki? ¿Manachu uyarirqanki? Señor Diosqa wiñay Diosmi, teqsimuyuntinta kamaqmi. Manan payqa sayk'unchu, manan payqa pisipanchu, manan yuyayninmanpas pipas aypanchu. 29Payqa sayk'usqatan kallpachan, pisipaqtapas wakmantan kallpachan. 30Waynakunapas sayk'unmi pisipanmi, kallpasapakunapas peqtunmi urmanmi, 31Señor Diospi confiakuqkunan ichaqa wakmanta kallpachasqa kanqaku, anka hinan phalanqaku, phawanqakun, manataqmi sayk'unqakuchu, purinqakun, manataqmi pisipanqakuchu.

will be added

X\