Isaías 4

1Chay p'unchaymi huk qharita qanchis warmikuna qechunakunqaku, hinaspa ninqaku: Ñoqaykuqa sapankaykun mikhunaykuta maskhakusaqku, kaqniykuwanmi p'achakusaqkupas, sutillaykita qoykuwayku ama p'enqaypi kanaykupaq, nispanku. 2Chay p'unchaymi Señor Diosqa munaytapuni ch'ikchichinqa, Israelpi qhepaq llapa runakunataq hallp'aq rurusqanwan sumaqta q'ochukunqaku, sonqopas-sonqotaq kanqaku. 3Sionpi qhepakuq runakunapas Jerusalén llaqtapi kawsashaq runakunapas “Señor Diospaq t'aqasqa” nispa sutichasqan kanqaku, Señor Diosmi sutinkuta Jerusalenpi qelqanqa kawsashanallankupaq. 4Señor Diosmi huk wayrata kachamunqa juzgananpaq, hukkaq wayratataq thuninanpaq, ahinapin Jerusalenta ch'uyanchanqa runa wañuchisqanku huchamanta. Paymi Sión llaqtapi tiyaq warmikunaq qhelli-kayninkuta lliwta pichanqa. 5Chaymantataq Señor Diosqa Sión orqo patantinpi, chaypi huñukuq runakunaq patantinpi kamanqa p'unchaypaq phuyuta, tutapaqtaq q'osñita nina rawraytawan. Llapan chaykuna patapitaq Señor Diospa qhapaq-atiynin kanqa, 6chaymi ruphaymanta pakaykunqa llanthuykunqa, paramantapas manchay para chikchi wayramantapas hark'aykunqa.

will be added

X\