Isaías 39

1Chay p'unchaykunapin Babilonia rey Baladanpa churin Merodac-baladanqa uyarirqan Ezequiaspa onqosqanta qhaliyasqantawan, chaymi runakunawan cartakunata qokuytawan apachirqan. 2Ezequiastaq kachamusqakunata kusisqa chaskirqan, hinaspan lliwta qhawachirqan qhapaq kayninta, qolqenta, qorinta, q'apaq hawinankunata, q'apaq aceitenkunata, arma waqaychana wasinta, llapan waqaychana wasinkunatapas. Manan imallapas karqanchu wasinpipas suyunpipas mana qhawachisqaqa. 3Hinan profeta Isaiasqa Ezequiasman rispa tapuykurqan: –¿Maymantan chay runakuna hamusqa? ¿Ima ninkun? nispa. Chaymi Ezequiasqa nirqan: –Karu suyumantan hamusqaku, Babilonia suyumantaraq, nispa. 4Hinan Isaiasqa tapuykurqan: –¿Imatan wasiykipi rikurqanku? nispa. Ezequiastaq nirqan: –Lliwtapunin rikurqanku, manan imallatapas manaqa qhawachirqanichu, nispa. 5Chaymi Isaiasqa nirqan: –Tukuy-atiyniyoq Señor Diospa nisqanta uyariy, 6huk p'unchaymi wasiykipi kaqkunapas kunankama, ñawpa taytaykikunaq huñusqan kaqkunapas llapallan Babilonia suyuman apasqa kanqa. Manapunin imachallapas kaypi puchunqachu. 7Wakin wawaykikunatawanraqmi Babiloniaman apanqaku, chaypin kaparqospanku reypa wasinpi kamachipaq churanqaku, nispa. 8Ezequiastaq Isaiasman kutichirqan: –Señor Diospa willakuynin apamuwasqaykiqa allinpunin, nispa. Payqa yuyarqanmi: Kawsasqay p'unchaykunallapas thak-kaymi kanqa, manan ima sasachakuypas kawanqachu, nispa.

will be added

X\