1 Chay p'unchaykunapin Ezequiasqa sinchitapuni onqoykapurqan. Hinan Amozpa churin profeta Isaiasqa watuykukuq rispa nirqan: –Señor Diosmi nin: Testamentota ruwachikuy, wañukapunkin, manan qhaliyawaqñachu, nispa. 2 Chaymi Ezequiasqa uyanta perqaman kutirispa Señor Diosmanta mañakurqan: 3 Señor Diosníy, valekuykipunin imaynatachus servisqayta yuyarinaykipaq. Ñoqaqa tukuy sonqon chaninta servirqayki, sonqoykiman chayaqtataqmi ruwarqanipas, nispa. May khuyaytataq waqaykurqan. 4 Chaymantataq Señor Diosqa kamachirqan Isaiasta: 5 Phaway, Ezequiasta nimuy, ñawpa taytayki Davidpa Diosnin Señormi nin: Uyarinin mañakuwasqaykita, rikunitaqmi ruwasqaykitapas, chaymi yapaykuyki chunka phisqayoq watatawan kawsanaykipaq. 6 Qantapas Jerusalén llaqtatapas Asiria suyu reypa makinmantaqa qespichisaqmi. Ñoqan kay llaqtataqa awqanmanta waqaychasaq, nispa. 7 Señor Diospa rimarisqan hunt'akunanta yachanaykichispaqqa kay señaltan Diosqa ruwanqa. 8 Intiq purisqanman hinan llanthuqa Ahazpa ruwasqan gradasta uraykunña, chaywanpas paymi intita qhepaman kutichinqa chunka gradasman llanthuq wichanankama, nispa. Hinan intiqa chay nisqanta hinapuni qhepaman kutirqan. 9 Judá suyu rey Ezequiasmi qhaliyasqanmanta kay takita kamarirqan: 10 –Ñoqaqa yuyarqanin: Kallpayoq kashaspaymi wañupusaq, unay wata kawsayta manaña rikuspan Wañuy-pachaman haykupusaq, nispa. 11 Ñoqaqa yuyarqanin: Kay pachapiqa manañachá Señor Diosta rikusaqchu, kay pachapi kawsaqkunatapas manañachá qhawarisaqchu, nispa. 12 Michiqkunaq ch'ukllan paskasqa hinan kawsayniyqa paskaspa apasqa kapurqan. Kawsayniyqa awa allwisqa q'aytu hinan, Diostaq chaymanta wit'uqapuwaspa k'uyurqapuwan, chay hinapin tuta-p'unchay ñak'arichiwarqan. 13 Illariq tutantinmi nanaymanta qaparirqani, leonpas tulluykunata k'utushawanman hinaraq, tuta-p'unchaymi Diosqa ñak'arichiwarqan. 14 Khallwakuna hinan waqarqani, urpikuna hinan anchirqani, ñawiypas utiwarqanñan hanaq pachata qhawarayashaqtiy, ¡Señor Diosníy, uyariway! Khuyaytan muchushani. 15 Ñoqari, ¿ima niymantaq? Pay Señor Diospunin chay hinata onqochishawan, paytaq rimapayawarqan. Tukuy p'unchay kawsayniypin k'umuykukuspa purisaq sonqoypi phutikusqayrayku. 16 Señor Diosníy, rimapayasqaykiwan ruwasqaykipiwanmi runaqa kawsan, ñoqapas chaykunawanmi kawsashani, qanmi qhaliyachiwaspa kawsachiwarqanki. 17 Cheqaqtapunin ñak'arisqayqa allinniypaq karqan, munakuwaspaykin aya p'ampanaman rinaymanta hark'awarqanki, llapan huchaykunatataq pampachawarqanki. 18 Aya p'ampanapi kaqkunaqa manañan yupaychayta atisunkikuñachu, wañusqa kaqkunaqa manañan hatunchasunkiñachu, hallp'a ukhuman chinkaykapuqkunaqa manañan hunt'aq-kayniykipi suyakunkuñachu. 19 Kawsaqkunallapunin yupaychaytaqa atisunki, imaynan ñoqapas kunan ruwashani hinata. Taytakunan wawankuman willanku hunt'aq-kayniykimanta. 20 Señor Diosmi qespichiwanqa, chay hinaqa arpanchista tocaspanchis takisunchis Señor Dios yupaychana wasipi tukuy p'unchay kawsayninchispi, nispa. 21 Isaiasqa nirqañan: Higosta kutaspa reypa k'irinman laq'aychis, hinan qhaliyanqa, nispa. 22 Ezequiastaq Isaiasta tapusqa: ¿Imaynapitaq yachasaq Dios yupaychana wasi rinaytari? nispa.
