Isaías 33

1Yaw, llat'anaq runa, ¡imaynaraqmi kanki! Yaw, hap'iykachiq runa, ¡hayk'aynaraqmi kanki! Qanqa manan hayk'aqpas llat'anasqapaschu hap'iykachisqapaschu karqanki, llat'anayta tukuqtiykiqa, llat'anasqallataqmi kanki, hap'iykachiyta tukuqtiykiqa, hap'iykachisqallataqmi kanki. 2Señor Diosnillayku, anchata khuyapayaykuwayku, qanpipunin suyakushayku, sapa paqar hina kallpachawayku, hatun sasachaypi rikukuqtiyku qespichiwayku. 3Qan rimariqtiykin ñoqaykuwan maqanakuq llaqtakuna ayqenku, qan sayarimuqtiykin awqayku suyukuna ch'eqerinku. 4Imaynan langostakuna llapan q'omerta ch'usaqyachin, chay hinatan llat'anamusqankuta hukkuna ch'usaqyachinqa, imaynan t'isku-t'iskupas t'iwkan, chay hinatan qechumusqanku pataman wak runakuna t'iwkamunku. 5Señor Diosmi hanaq pachapi tiyan, paymi hatunchasqa kashan. Paymi Sionpi Jerusalenmanpas cheqaq-kaywan chanin-kaypiwan hunt'aykunqa, 6paymi kanqa llaqtanpaq allin takyasqa teqsi hina, paymi llaqtanta waqaychallanqapuni, paykunamanmi qonqa yachayta allin yuyaytawan, Señor Diosta manchakuq-kayninkun illankuqa. 7¡Qhawariy! ¡Callekunapin kallpasapakuna qaparishan! Awqakunawan sumaq rimanakuqta kachasqakunan unuy-parata waqashan. 8Runa ñankunan purunyapushan, manan pipas chayninta purinñachu, sumaq rimanakuytan awqa p'akipun, chay rimanakuypi testigokunatapas pisichapun, manan pitapas respetankuñachu. 9Kay suyun may khuyay llakisqa kashan, Libanopi sach'akunan naq'epushan, Sharón pampan ch'aki pampaman tukupushan, Basán orqopi Carmelo orqopi sach'akunapas ch'akiykapushanmi. 10Señor Diosmi suyukunata nin: Kunanqa sayarispaymi hatunchasqa kasaq, rikuchisqaykichismi may hatunchus kasqayta. 11Qankunaq yuyaykusqaykichisqa ruwasqaykichispas ichhu q'opa hinallan, kikiykichismi thunikushankichis. 12Qankunan isku hina kanasqa kankichis, t'ankar hinan ruphachisqa kankichis. 13Karupi tiyaqkuna, ruwasqaymanta uyariychis, qayllapi tiyaqkuna, atiyniyoq kasqayta reparaychis, nispa. 14Sionpi huchasapakunan khatatatanku, mana chanin runakunapas manchakuymantan ninku: Diosmi wiñay p'unchay ruphakuq ninaqa, ¿mayqenninchistaq ñawpaqenpi tiyayta atisunman? nispanku. 15Mayqenchus chaninta purispa cheqaqtapuni rimanqa, mayqenchus mana hukkunata suwaspa qhapaqyanqa, mayqenchus lluk'iykachikuspa mana rantichikunqachu, mayqenchus runa wañuchiqkunaq yuyaychasqantapas mana chaskinqachu, mayqenchus mana allinkunatapas mana qhawarinqachu, 16chay runan mana manchakuspa kawsanqa, allin pukarapi tiyaq hinan kanqa, mikhunanpas ukyananpas kashallanqapunin. 17Reytan rikunki ch'ak-nisqa tiyashaqta, suyuq qorpankunatapas aswan hatunyasqatan rikunki. 18Manchakuypi tiyasqaykita yuyarispan ninki: ¿Maytaq impuesto sik'iqkunari? ¿Maytaq rantisqapas vendesqapas makilla qhawaqri? ¿Maytaq torrekunata qhawaqri? nispa. 19Manañan chay uma hoqariq llaqtata rikunkiñachu, mana yachasqayki rimaq runata, manan uyarinkiñachu chay wak suyuq rimayninta. 20¡Qhawariy Sionta, Diosta yupaychaspa fiesta ruwananchis llaqtata! Qankunan qhawarinkichis kusisqalla kaq Jerusalenta, allin churasqa karpakuna hinan kashan, takarpunkunapas mana horqonan, watanankunapas mana p'itikuqmi. 21Chaypin Señor Diosqa ch'ak-nishaq ñoqanchiswan kanqa, llaqtaqa mayukunayoqmi yarqhakunayoqmi kanqa, awqakunaqa manan llat'ananqañachu lloqenawan tanqana botenkuwanpas hatuchaq barconkuwanpas. 22Señor Diosqa juezninchismi, Señor Diosqa kamachiwaqninchismi, Señor Diosqa reyninchismi, pay kikinpunin qespichiwasun. 23Chay hinaqa, awqaña hamuqtinpas barconpa waskhankunan wayayanqa, sayaq k'aspinpas kuyuykachanqan, wayraq tanqanan telanpas manan mast'arikuyta atinqachu. Hinan llat'anaspa qechusunchis awqaq qhapaq kaynintaqa, wist'ukunapas llat'anaysikunqakun. 24Sionpi tiyaqkunaqa manan mayqellanpas: “Onqosqan kani”, ninqachu, Diosmi chaypi tiyaqkunaq huchanta pampachanqa.

will be added

X\