1 Tukuy-atiyniyoq Señor Diosmi Judá suyuman Jerusalén llaqtaman tukuy imaymana qosqanta pisiyachipunqa, hinallataq lliw t'antatapas unutapas qechupunqa. 2 Ch'usaqyachillanqataqmi allin qharitapas, awqa-tinkuqtapas, jueztapas, profetatapas, watuqtapas, kurak runatapas, 3 capitantapas, respetana qharitapas, yuyaychaqtapas, allin llank'aqtapas, tukuy layqatapas. 4 Hinaspa erqe waynachakunallata umallinkupaq churanqa, loqhe waynakunan kamachiqninku kanqa. 5 Runapurapas wasimasintinpas sarunchanakunqaku, waynakunapas kurak runakuna contran sayarinqaku, millay runakunapas allin runakuna contran sayarinqaku. 6 Huk runan wawqenta taytankuq wasinpi hap'ispa ninqa: Qanpaqa p'achallaykipas kashanraqmá, umalliyku kapuy, kay thunisqa llaqtapi kamachikuy, nispa. 7 Hinan chay runaqa wawqenman kutichinqa: Manan ñoqaqa chayta allinyachiyta atiymanchu, wasiypiqa manan kanchu mikhunaypas p'achaypas, ama llaqta kamachiqtaqa churawaychu, nispa. 8 Jerusalenqa misk'akunmi, Judá suyuqa urmapunmi, rimasqankupas ruwasqankupas Señor Dios contran, Atiyniyoq Diostan sinchita phiñachinku. 9 Sayapakuyninkun paykunataqa ch'atan, manan huchankutaqa pakankuchu, Sodoma llaqta hinan llapa runaman sut'inchanku. ¡Ay, paykunamanta! Paykuna kikinkuq muchunankutan wakichikunku. 10 Chanin runakunata niychis: Qankunaqa allillanpunin kankichis, nispa. Paykunaqa ruwasqankuq ruruntan kusisqa chaskinqaku. 11 ¡Ay, mana chanin runamanta! Paypaqqa manan allinchu kanqa, payqa imaynatachus runamasinta muchuchirqan chay hinallatataqmi muchunqa. 12 Erqekunallan llaqtayta ñak'arichishan, warmikunan kamachikushan. ¡Ay llaqtalláy! Kamachikuqniykikunan q'otushasunkichis pantay ñantan pusashasunkichis. 13 Señor Diosqa juzganapiñan kashan, llaqtanta t'aqtananpaqmi sayarinña. 14 Señor Diosmi juzgayta qallarispa llaqta umallikunata, kurak runakunatawan nin: Qankunan uvas chakrayta chaqonkichis, wakchakunamanta suwakuspan wasiykichispi waqaychankichis. 15 ¿Pitaq qankunari kankichis llaqtayta sarunchanaykichispaq, wakchakunatapas pisichanaykichispaq? Ñoqa Tukuy-atiyniyoq Señor Diosmi chayta nini, nispa. 16 Señor Diosqa nillantaqmi: Sión llaqta warmikunan sinchita hatunchakunku, umankuta hoqarispan purinku, q'ewiykachakuspan purinku, ñut'ullapi thaskispan purinku, chakinku sumaqchakusqankutan chhaqllaqechinku. 17 Chaymi paykunaq umanta q'arayachisaq, p'aqla umatataq purichisaq, nispa. 18 Chay p'unchaymi Señor Diosqa tukuy k'achanchakuyninkuta qechunqa: chakinku sumaqchanankuta, sumaqchasqa uma watanankuta, q'anchi killaman rikch'akuq kunka walqanankuta, 19 aretenkuta, maki walqanankuta, uma watanankuta, 20 sombreronkuta, chakipaq cadenachankuta, chumpinkuta, q'apaq hawina pomochankuta, lloq'ekunanku q'aytunkuta, 21 sortijankuta, senqa siwinkuta, 22 sumaq p'achankuta, phullunkuta, llikllankuta, ch'uspankuta, 23 espejonkuta, sumaq lino p'achankuta, uma k'uyunankuta, chalinankuta ima. 24 Sumaq q'apaypa rantinpiqa asnaymi kanqa, chumpiq rantinpitaq waskha kanqa, sumaq ñaqch'akuypa rantinpitaq p'aqla uma kay, sumaq p'achakunaq rantinpitaq qhasqa p'acha, sumaq rikch'ayniyoq-kaypa rantinpitaq fierro pariwan marcay kanqa. 25 Allin qharikunapas awqa-tinkuypin wañunqaku, awqa-tinkuqkunapas maqanakuypin wañunqaku. 26 Jerusalén llaqtaqa waqaykunqan, yana p'achawanmi churakunqa, wikch'usqa kaspanmi pampapi tiyaykunqa.
