Isaías 28

1¡Ay, Samaria llaqtamanta! Chay llaqtaqa Efraín suyupi machaqkunaq uma hoqarinan llaqtan, imaynan chay machaqkunaq umanpi t'ika guirnalda t'awipushan, chay hinan Samariaq sumaq-kayninpas naq'epushan. ¡Ay, sumaq ruruchiq wayq'o patapi kaq llaqtamanta! ¡Ay, machasqa wikch'urayaqkunaq uma hoqarinan llaqtamanta! 2Señor Diosqa huk kallpasapa atiyniyoq runatan wakichishan, paymi chikchi t'oqyay hina, manchay tutuka hatun wayra hina, manchay unu para hina, manchay lloqlla hina kallpanwan Samariata pampaman wikch'unqa, 3chakinwantaq t'ustunqa Israel suyupi machaqkunaq uma hoqarinan llaqtata. 4Hinan chay sumaq ruruchiq wayq'o patapi kaq llaqtaqa, chay t'awipushaq t'ika guirnalda hina llaqtaqa, miska rikhuriq higos hinan kanqa, pillapas rikurqospaqa makinwanmi p'itispa mikhunqa. 5Chay p'unchaypin Tukuy-atiyniyoq Señor Diosqa llaqtanmanta qhepaqkunapaq umapi k'anchariq corona hina kanqa, sumaqllaña t'ika guirnalda hina kanqa. 6Juzganapi juezkunamanqa Señor Diospunin chanin-kayta yachachinqa, llaqta punkupi hark'apakuq soldadomanpas kallpatan qonqa. 7Sacerdotekunapas profetakunapas vinowan machasqan thampiykachashanku, tragowan machasqan yuyay chinkasqa kashanku, vinowanmi t'ili ukyasqa kashanku, rikhuriypi Dios rimapayaqtinpas machasqan thampiykachashanku, runakuna chaninchanankutaqa pantapunkun. 8Llapa mesan millay qhelli kashan aqtuspa qhellichasqankuwan, lliwpunin qhellichasqanku kashan. 9Ñoqamantan paykuna ninku: ¿Pitataq payri yachachinman? ¿Pimantaq uyarisqan simita entiendechinman? ¿Chayllaraq hanuk'asqa wawamanchu? ¿Chayllaraq p'itisqa wawamanchu? 10Payqa chayllaraq rimay yachaq wawa hinan riman, kay kamachikuy, chay kamachikuy, kay ladontan, chay ladontan, huk chhikallanta kaypi, huk chhikallanta haqaypi, nispanku. 11Chayraykun Diosqa kay llaqtaman rimanqa akllu rimaykunapi, mana yachasqanku simikunapi. 12Ñawpaqtañan payqa kay llaqtaman nirqan: Kunanqa samaykuychis, sayk'usqatapas samarachiychis, samarakuychis kunanqa, nispa. Manataq paykunaqa uyariyta munarqankuchu. 13Chayraykun Señor Diosqa rimapayanqa erqekunaman hina, kayta chayta ruwaychis nispa, kayta chayta kasuychis nispa, kay ladopi asllata yachaychis, chay ladopi asllata ruwaychis nispa, huk chhikallan kaypi, huk chhikallan haqaypi nispa, wasanpamanta urmanankukama, toqllaq k'irispa hap'isqan kanankukama. 14Yaw, k'amikuq runakuna, Jerusalén llaqta kamachiqkuna, uyariychispuni Señor Diospa siminta. 15Qankunan alabakunkichis: Wañuywanmi allinta rimanakuyku, Ukhu-pachawanmi allinta rimanakuyku, manchakuy wañuy chayamuspa mana taripawanankupaq. Llullakuspakama q'otuspakama allillanmi kasaqku, nispa. 16Chayraykun Apu Señor Diosqa nin: Sionpin allin takyasqa teqsita churashani, chay patamantaqmi esquina hap'iq allin ch'ila rumita churashani, chay rumipin qelqasqa kashan: Pipas iñiqqa mana kuyuriqmi sayanqa, niq. 17Chay perqaypin chanin-kayqa plomada hina kanqa, cheqaq-kaytaq nivel hina kanqa. Llullakuspakama allillanmi kasun, nisqaykichisqa chikchiq thunisqanmi kanqa, pakakunaykichis cheqastapas llimp'aq unun apanqa. 18Wañuywan rimanakusqaykichispas p'akisqan kanqa, Ukhu-pachawan rimanakusqaykichispas yanqan kapunqa, manchakuy wañuy chayamuspaqa pasaqtan ñit'isunkichis qankunataqa. 19Sapa kuti hamuspanmi apasunkichispuni, paqarmanta paqarmi sapa p'unchay, sapa tuta phawamuspa pichasunkichis, uyarispallaraqmi khatatatankichis. 20Imaynan rimaypi ninku hina mana hayt'arikuy atina huch'uy puñuna pata, mana p'istuykukuy atina huch'uy qatana, nispa. 21Perazim orqopi ruwasqanta hinan Señor Diosqa ruwanqa, Gabaón wayq'opi phiñakusqanta hinan Señor Diosqa phiñakunqa, huk-hina mana reqsisqa ruwaytan ruwanqa, musphana mana reqsisqa ruwaytan ruwanqa. 22Kunanqa ama asikuychischu, cadenaykichis ama mat'ikunanpaq Tukuy-atiyniyoq Apu Señor Diosmi niwan: Yuyaykuniñan suyuntinta thuninaypaq, nispa. 23Makilla rimasqaykunata uyariychis, allintapuni simiykunata uyariychis. 24Chakra llank'aq runaqa manan sapa p'unchaychu yapuspalla kan, manan sapa p'unchaychu chakmaspallapas k'upaspallapas kan. 25Aswanmi pampata kuskachaspaqa t'akan yana cominotapas, oqe cominotapas, chaymantapas t'akallantaq trigota wachu-wachuta, cebadatapas huk cheqaspi t'akan, centenowantaq chakra cantonta muyuchin. 26Diosmi chakra llank'aqman yachachin, imaynachus allin llank'ana kasqanta. 27Yana cominoqa manan fierro kiruyoq saruchinawanchu saruchikun, oqe cominopas manataq saruchina carretawanchu saruchikun, aswanpas yana cominoqa ñañu k'aspillawanmi waqtakun, oqe cominopas k'aspillawanmi p'anakun. 28Trigollatan saruchinku, ichaqa manan ñut'utachu, carreta saruqtinpas caballoq chakinqa manan ch'eqtanchu. 29Kay yachaykunataqa Tukuy-atiyniyoq Señor Diosmi qon, payqa yuyaychan mana pantanallatañan, yuyaykusqankunaqa allinkamapunin lloqsin.

will be added

X\