Isaías 26

1Chay p'unchaypin Judá suyupi kay takita takinqaku: Allin perqasqa llaqtanchisqa qespikunanchispaqmi kapuwanchis, ancho perqakunataqa Señor Diospunin sayarichipuwanchis. 2Punkukunata kichariychis chanin llaqtaq haykunanpaq, hunt'aq chanin runaq haykunanpaq. 3Señor Diosníy, qanqa thak-kaypin waqaychanki ñawpaqeykipi qaqa sayaq runataqa, qanmanpuni hap'ipakusqanrayku. 4Suyakullaychispuni Señor Diospiqa, paypunin Wiñay Qaqaqa. 5Paymi uma hoqariqkunata qaqapachin, hatunchakuq llaqtatapas k'umuykachin, pampayachinankaman thunin. 6Chaytataq pisichasqakuna wakchakunapiwan chakinkuwan saruykunku, nispa. 7Chaninkunaq ñanninqa cheqanpunin, Señor Diosníy, qanpunin paykunapaq “siwk” nisqa ñanta allichanki. 8Señor Diosníy, kamachikuyniykita ruwaspan suyashaykiku, sonqoykuq munasqanqa qanpi yuyaymi. 9Tukuy sonqoywanmi tutantin qanllapi yuyaymanani, tukuy almaywanmi tutamanta maskhayki. Kay pachata juzgaqtiykin runakuna yachanku imachus chanin-kay kasqanta. 10Hinaña millay runamanta khuyallikunki chaypas, paykunaqa manapunin yachankuchu chanin-kayta, millayllapunin kanku chanin runaq suyunpipas, manataqmi reparankupaschu Señor Diospa hatun-kaynintaqa. 11Señor Diosníy, muchuchinaykiqa wakichisqañan, paykunataqmi mana reparaqpas tukunkuchu. Llaqtaykita ancha munakuq kasqaykita rikuchunku pasaq p'enqasqa kanankupaq, awqaykipaq wakichisqayki nina paykunata ruphachun. 12Señor Diosníy, qanmi thak-kayta qowankiku, ima ruwasqaykupas qanpa yanapayllaykiwanmi ruwasqa. 13Diosniyku Señor Dios, wak wiraqochakunan ñoqaykuq kamachiqniyku karqan, ñoqaykun ichaqa qanllatapuni Señorniyku reqsikuykiku. 14Paykunaqa wañusqan kashanku, manataqmi hatarimunqakuñachu, paykunaqa llanthullan kanku, manataqmi sayarimunqakuñachu. Paykunataqa ñak'arichipurqankiñan thunipurqankiñan, llapan paymanta yuyarinakunatapas p'uchukachirqankiñan. 15Señor Diosníy, cheqaqtapunin suyukunata hatunyachirqanki, suyuq llapan qorpankunatan hatunyachirqanki, chay hawan hatunchasqa karqanki. 16Señor Diosníy, llakikuypin maskharqaykiku, qan muchuchishawaqtiykikun llakisqa mañakamurqaykiku. 17Señor Diosníy, qayllaykipin kasharqayku imaynan wiksallisqa warmiqa wachakunan p'unchay chayamuqtin q'ewikachakuspa nanaywan qaparin chay hinata. 18Wiksallikurqaykun, wachakuy nanaywanmi qaparkacharqayku, wachakurqaykutaq wayrallata, manan suyuyku qespichiyta atirqaykuchu, manan hallp'api tiyaqtachu paqarichirqayku. 19Wañuqniykikunan kawsarinqaku, ayaykikunan sayarinqaku. ¡Hallp'api puñuqkuna, wakmanta rikch'ariychis, hinaspa kusikuymanta qaparkachaychis! Señor Diosníy, sulla hina k'anchayniykitan kachamunki, chaymi wañusqakuna hallp'amanta paqarimunqaku. 20Phaway, llaqtalláy, wasiykiman haykuy, ukhumantataq allintapuni wisq'akamuy, pakarikamuy huk tiempota Señor Diospa phiñakuynin thaninankama. 21Qhawariychis, qhapaq tiyananmantan Señor Diosqa lloqsimushan huchankumanta kay pachapi tiyaqkunata muchuchinanpaq. Hallp'a pachaqa manan pakanqachu wañuchisqakunata, pakallapi runa wañuchisqakunatan llapanta rikhurichimunqa.

will be added

X\