Isaías 21

1Qocha pataq ch'inneqninmanta willakuy: Uraymanta t'uyurmi manchay wayra phawamuq hinan ch'inneqmanta chayamushan, manchay-manchay suyumantan awqakuna hamushan. 2Diosmi rikuchiwarqan sinchi manchakuy rikhuriyta: Q'otukuqpa runamasinta hap'iykachipushasqanta, llat'anaspa qechusqanta apamushasqanta. Nirqantaq: ¡Elam suyu runakuna, chay runakuna contra phawaykuychis! ¡Media suyu runakuna, llaqtankuta muyuykuychis! Babilonia suyu runakunan hukkunata llakichirqan, chay llakikuytan p'uchukachisaq, nispa. 3Chayta rikuspan cuerpoyraq nanaymanta khatatatashan, wachakuq warmi hinaraqmi q'ewiykukushani. Chaykunata uyarispaymi manchasqapuni kashani, chaykunata rikuqtiymi umayraq muyurishawan. 4Yuyayniyraqmi chinkarishawan, manchakuymantan khatatatashallaniña, samaykunaypaq suyarayasqay ch'isin aswan manchakuyman tukurqapun. 5Mesaqa churasqañan, chusipas tiyanapaq mast'asqañan, mikhushankuñan, ukyashankuñan. Soldado kamachiqkunatan nishankuña: ¡Sayariychis! ¡Escudoykichista wakichikuychis! nispa. 6Señor Diosmi niwan: Phaway, qhawaqta churamuy, ima rikusqantapas willakamunanpaq. 7Iskay caballoq chutasqan carretata rikuspa runakunata asnopiña camellopiña sillaykusqata rikuspapas, makillapuni qhawachun, nispa. 8Chaymi qhawaq churasqaqa waqyakamurqan: Wiraqocháy, kasqallanpin kashani, ch'isiyaqmi sayashani, tutan-tutanmi qhawaspallapuni kashani. 9¡Qhawariy! Kaytan hamushan huk runa iskay caballoq chutasqan carretapi. Paymi waqyamushawan: ¡Urmaykapunmi! ¡Urmaykapunmi Babilonia llaqtaqa! Llapanmi diosninkunapas pampapi p'aki-p'aki wikch'urayashan, nispa. 10Ñoqataq nirqani: Llaqtalláy, trigo hina erasqan, wayrachisqan kanki, ñoqan ichaqa willashaykichis Israelpa Tukuy-atiyniyoq Diosninpa niwasqanta, nispa. 11Edom suyu contra willakuy. Seirmantan waqyamuwan: Llaqta qhawaq runa, ¿ñachu paqarimunqaña? Llaqta qhawaq runa, ¿ñachu illarimunqaña? nispa. 12Llaqta qhawaq runataq kutichirqan: –Paqarimushanñan, ichaqa tutayarqollanqataqmi. Tapukuyta munaspaqa tapukamullay, huktawanpas kutimullay, nispa. 13Arabia suyumanta willakuy: Dedán llaqta runakuna, camellokunapi astakuspaykichismi Arabia ch'inneq cheqaskunapi puñunkichis, 14unuta apamuychis ch'akichikuqkunaman qonaykichispaq. Tema llaqtapi tiyaqkuna, ayqekuqkunaman mikhunata haywariychis. 15Paykunaqa ayqekushanku espadaq ñawch'inmantan, p'eqtaq wach'inanmantan, manchakuy awqa-tinkuymantawan, nispa. 16Señor Diosmi niwan: Llank'apakuqpa yupasqan hina huk wata ukhullapin Cedar runaq uma hoqariq kayninqa tukurqakapunqa. 17Cedar runakunaq aswan allinnin qharikunaqa wach'iqkunan, chaykunamantapas pisillañan qhepaykapunqa. Ñoqa Israelpa Señor Diosninmi chayta nini, nispa.

will be added

X\