Isaías 2

1Señor Diosmi Amozpa churin Isaiasman Judá suyumanta Jerusalenmantawan kaykunata rikuchirqan. 2Hamuq p'unchaykunapin Señor Diospa wasin orqo aswan hatunkaray kanqa, llapa orqokunamantapas aswan alton kanqa. Llapa suyu runakunan chayman qhochurikamunqaku. 3Askha hatun suyukunan pusarinakamunqaku: Hakuchis, Señor Diospa orqonman wichasun, Jacobpa Diosnin yupaychana wasiman wichasun. Paymi ñanninkunata yachachiwasun, chay ñanninkunatataq purisunchis, nispanku. Sionmantapachan Señor Diospa yachachikuyninta yachachinqaku, Jerusalenmantapachan Señor Diosqa rimanqa. 4Señor Diosmi suyukunaq ch'aqwayninta chaninchanqa, askha llaqtaq churanakuynintan t'aqtanqa. Paykunaqa manañan awqa-tinkuypaq yachaqanqakuñachu, manan mayqen suyupas huk suyuwan maqanakunqañachu, espadankumantapas yapuna rejakunatan ruwakapunqaku, lanzankumantapas ichhunakunatan ruwakapunqaku. 5¡Jacobpa miraynin llaqtakuna, hakuchis Señor Diospa k'anchayninpi purisunchis! 6Señor Diosníy, Jacobpa miraynin llaqtaykiqa inti lloqsimuy lado suyukunaq ruwaynintan askhallataña ruwashanku, Filistea runakuna hinan layqakuykunatapas ruwashanku, mana iñiq wak llaqtakunawantaq rimanakunkupas, chaymi qanqa paykunata saqerparirqanki. 7Suyunkupiqa hunt'an kashan qoripas qolqepas, mana yupay atiymi qhapaq illakunapas, hinallataq caballokunapas sinchi askhallaña, maqanakuypaq carretakunapas mana yupay atiyllaña. 8Suyunkuqa hunt'allataqmi kashan idolokunawanpas. Runakunaqa paykunaq ruwakusqan dioskunatan yupaychanku. 9Paykunaqa huch'uyyachisqan kanqaku, p'enqachisqan kanqaku, chaywanpas ama pampachaychu. 10Yaw, runakuna, Señor Diospa manchana qayllanmanta atiyninpa lliphlli-kayninmantawan qaqa-qaqakunaman pakakuychis, pampa t'oqokunaman winakuychis. 11Hatunchakuq runakunaqa k'umuykachisqan kanqaku, uma hoqariq runakunaqa huch'uyyaykachisqan kanqaku, chay p'unchaypiqa Señor Diosllan hatunchasqa kanqa. 12Tukuy-atiyniyoq Señor Diosmi chay p'unchayqa k'umuykachinqa llapan hatunchakuqkunata, pay-payman tukuq runakunata, llapan anchaykachaq runakunatapas. 13Paymi Libanopi sinchi hatun sayayniyoq cedro sach'akunata kumpanqa, Basanpi encina sach'akunata chaqonqa. 14Alto orqokunata hatun moqokunatawan kuskachanqa. 15Hatun torrekunatapas allin perqasqa perqakunatapas thuninqa. 16Lamar-qochanta puriq llapa barcokunatapas, ancha sumaq buquekunatapas unuwanmi millp'uchinqa. 17Runaq hatunchakuyninmi huch'uyyachisqa kanqa, uma hoqariyninpas k'umuykachisqan kanqa, chay p'unchaypiqa Señor Diosllan hatunchasqa kanqa. 18Llapallan idolokunataq ch'usaqyachisqa kanqa. 19Señor Dios kay pachata chhaphchirinanpaq hamuqtinmi, paypa manchana qayllanmanta, atiyninpa lliphlli-kayninmantawan runakuna pakakunqaku, hinaspan qaqa wasikunaman, pampa t'oqokunaman winakunqaku. 20Chay p'unchaymi runakunaqa qori idolonkutapas qolqe idolonkutapas huk'uchakunaman masu huk'uchakunaman wikch'unqaku, chaykunatan paykuna kikinku yupaychanankupaq ruwakurqanku. 21Señor Dios kay pachata chhaphchirinanpaq hamuqtinmi, paypa manchana qayllanmanta, atiyninpa lliphlli-kayninmantawan runakuna qaqa k'aktukunaman ayqekunqaku, qaqa wasikunaman winakunqaku. 22Amaña runaman hap'ipakuychischu. ¿Imataq runari? Kawsayninqa huk samay hinallan.

will be added

X\