Isaías 17

1Damasco llaqta contra willakuy. Tukuy-atiyniyoq Señor Diosmi nin: Damascoqa manañan llaqtachu kanqa, k'urpa montón hinan kapunqa. 2Aroer hap'iy llaqtakunaqa wiñaypaq purunyachisqan kapunqa, uywa michinamanmi tukupunqa, mana piqpa mancharichisqanmi uywakunaqa mikhunqa. 3Efraín suyuq pukara llaqtankunaqa thunisqan kanqa, Damasco llaqtaq atiyninqa p'uchukapunqan, Siria suyupi qhapaq runakunaqa Israel runakuna hinallataqmi p'enqaypi rikukunqaku, nispa. Chaytan Tukuy-atiyniyoq Señor Diosqa nin. 4Israelpa Diosnin Señormi nin: Chay p'unchaymi Israelpa mentasqa-kayninqa pisiyarqapunqa, qhapaq kayninpas tukurqakapunqa. 5Imaynan ichhuqqa trigota ichhun, makinwan trigota hap'ispataq ch'usaqta chakrata saqen, chay hina saqesqan Israelqa kanqa, 6mana chaytaq Refaim wayq'opi qhellapasqa chakra hina kanqa. Mana chaytaq olivo sach'a chhaphchisqa hina kanqa, aswan alto k'allmapin iskay kinsa rurukunallaña qhepanqa, rurusapa k'allmapitaq tawa phisqa rurukunallaña qhepanqa, chay hinallañan Israel runakunaqa qhepanqa, nispa. 7Chay p'unchaymi runaqa yanapayta maskhaspa Kamaqninman kutirinqa, Israelpa Ch'uya Diosninman asuykunqa. 8Runakunaq ruwasqan altarkunamanpas manan rinqakuñachu, Asera diosaq rikch'aynintapas manan yupaychanqakuñachu, altar ruwasqankupipas manan inciensota q'osñichinqakuñachu. 9Chay p'unchaymi perqawan allin hark'achisqa llaqtankuna wikch'usqa kanqa, imaynan Hiv runakunaq Amor runakunaq llaqtankupas Israelta manchakuspa wikch'usqa karqan chay hina, lliwmi purun-purun kanqa. 10Israel llaqta, Qespichiqniyki Diostan qonqapurqanki, manan yuyarirqankichu payqa pakakunayki Qaqa kasqanta. Wak'a dioskunata yupaychanaykipaqmi sumaq huertakunata llank'anki, wak llaqta diospa sutinpin ruruykikunata tarpunki. 11Hinaña tarpusqayki p'unchay allinta llank'anki, hinaspa chay muhuta phutuchinki chaypas, mana hampiy atina millay onqoy hamuqtinmi lliw chakraykiq ruruynin chinkapunqa. 12¡Achacháw! ¡Askha llaqtakunan kunununumun! ¡Lamar-qocha phoqchiqeq hinan qaparimun! ¡Achacháw! ¡Suyukunan qaparin sinchi askha unuq t'oqyasqanta hina! 13Chaywanpas Dios anyaqtinmi, usqhaylla karuman ayqenku, imaynan orqokunapi ichhuta wayra apan ahinata, tutuka muyuq wayra ñut'u hallp'ata apan ahinata. 14Paykunaqa ch'isinmi manchanata q'aqchanku, manaraq illarimuytataq ichaqa ch'usaqyarqapunku. Llat'anaqninchiskunaqa chay hinallapunin kashanku, suwaqninchiskunaqa chay hinapin rikukunku.

will be added

X\