Isaías 16

1Ch'inneqpi kashaq Sela llaqtamanta Moab runakunaqa Jerusalenpi kamachikuqman sumaq sonqota hina borregokunata apachiychis. 2Moab suyu warmikunan q'esanmanta mancharichisqa ayqeq pichitanka hina Arnón mayu pasanapi mana maymanpas puririyta atinkuchu. 3Judá runakunatan ninku: Ama hinachu kay, yuyaychawayku, hark'aykuwanaykikupaq yuyaykuychis. Kuskan p'unchaypi qaqa llanthu hina llanthuykichiswan samarichiwayku. Ayqekuqkunatapas pakaykuychis, paykunataqa amapuni hukman hap'iykachiychischu. 4Hinalla pakakuchunku ayqekuq Moab runakuna, muchuchiqmanta paykunata pakaykuychis, nispanku. Ñak'arichiqqa tukukapunqan, payqa manañan thuninqañachu, sarunchakuqqa suyumantan chinkaripunqa, 5chaymi Davidpa mirayninmanta huk kamachikuq paqarinqa, paymi khuyapayaspa hunt'aq kaspa kamachishallanqa. Juzgaspanqa chaninchaytapunin ruwanqa, usqhayllataqmi cheqaq-kaytapas ruwanqa. 6Judá runakunan ninku: Moabpa sinchi anchaykachaynintaqa yachanchismi, paykunaqa kanku pay-payman tukuq, uma hoqariq, hatunchakuq ima, alabakusqankupas yanqa thawtiyllan. 7Chayrayku llapan Moab runakunaqa suyunkumanta waqachunku, Quir-hareset llaqtapi pasasniyoq t'anta mikhusqankuta yuyarispa khuyayta waqachunku, nispa. 8Hesbonpi chakrakunan ch'akipun, Sibmapi uvas chakrakunan naq'epun. K'allmankunaqa Jazerkaman chayarqan, ch'inneqmanmi mast'arikurqan, lamar-qochakamataq ayparqanpas, ichaqa suyukunaq kamachikuqninkunan aswan sumaq chakratapas lliwta chaqorqan. 9Chaymi Jazer runakunawan kuska Sibmapi uvas chakrakunamanta waqani, Hesbonmantawan Elealemantawanmi unuy parata waqani, cosechamantapas poqosqa ruru hoqariymantapas manañan kusikapunkuñachu, aswanpas awqankuq chaqosqan hawan ch'inyapunku. 10Chakrakunapi kusikuypas q'ochukuypas tukukapunmi, uvas chakrakunapipas manan pipas kusikuymanta qaparinchu, manan pipas takinchu, manan uvastapas vinota ruwanankupaq sarunkuchu, Señor Diosmi chay qapariyninkuta p'uchukachipun. 11Chaymi Moabmanta Quir-haresetmantawan llakiy-llaki tocaq arpa hinaraq sonqoy waqashan. 12Moab runakunaqa orqopi yupaychana cheqasta rispapas sayk'uyllatan tarinku, yupaychana wasita mañakuq haykunku chaypas, yanqapaqmi. 13Unayñan Señor Diosqa Moab contra chhaynata rimasqa. 14Kunantaqmi Señor Diosqa nin: Moabpa hatun-kayninqa llank'apakuqpa yupasqan hina kinsa wata hunt'apin p'uchukapunqa, sinchi askha runayoqña kashan chaypas, iskay kinsa pisi kallpa runakunallan qhepanqaku, nispa.

will be added

X\