Isaías 15

1Moab suyupaq willakuy. Moabpi kashaq Ar llaqtan raqay-raqay kashan, huk tutallapi thunisqa. Moabpi kashaq Quir llaqtan raqay-raqay kashan, huk tutallapi thunisqa. 2Dibón llaqta runakunan orqopi kashaq yupaychana wasiman waqaq seqaykunku. Moab runakunan sinchita waqan Nebo llaqtaq Medeba llaqtaq thunikusqanmanta. Llapankun uma rutusqa, sunkha k'isusqa kanku. 3Qhasqa p'achayoqmi runakuna callekunapi purinku, wasi patakunapin sonqo nanayta waqanku, plazakunapin llapallanku qaparinku, aminatan waqanku. 4Hesbón llaqta Eleale llaqta runakunan awqanku hawa qaparinku, qaparisqankutaq karupi kashaq Jahaza llaqtakamaraq uyarikun. Chaymi Moab suyupi allin qhari soldadokunaqa khatatatanku, sinchitataq pisi kallpayanku. 5Sonqoymi Moabmanta yawarta waqashan. Runankunan ayqekuspanku Zoar llaqtakama Eglat-selisiya llaqtakama phawanku. Wakinmi Luhit llaqtaman waqakuspa seqaykunku, wakintaq Horonaimman riq ñanta rinku: ¡Imaraqmi! ¡Ikiraqmi! nispa waqaspanku. 6Nimrim wayq'o unupas ch'akipunmi, q'achukunapas naq'epunmi, llapa q'omerkunapas ch'akipunmi, manapunin ima ch'ikchillapas kanchu. 7Chaymi runakunaqa waqaychasqa qhapaq kayninkuta q'epiykukuspa Sauce Wayq'onta ayqekunku. 8Chay runakunaq qapariynintan Moab suyu qorpa ranra yachapayan, khuyayta waqasqankuqa Eglaim llaqtakaman, Beer-elim llaqtakaman uyarikun. 9Dimón llaqta mayu yawar hunt'aña kashan chaypas, aswantaraqmi mana allinta chayachisaq, Moab suyu runakunataqa ayqekuqtapas chaypi qhepaqtapas leonmi mikhupunqa.

will be added

X\