1 Señor Diosqa Amozpa churin Isaiasmanmi Babilonia suyumanta kaykunata rikuchirqan: 2 Señor Diosmi nin: ¡Huk q'ara orqopi awqa-tinkuy bandera señalta hoqariychis! ¡Soldadokunata kunkayoqta waqyaychis phawaykunankupaq! ¡Makita altoman haywariychis, qhapaq llaqtaq punkunkunanta haykurparinankupaq! 3 Ñoqapaq t'aqasqa soldadoykunatan waqyaniña, awqa- tinkuypi atipaqkunatan kamachiniña phiñachiwaqniykunata muchuchinankupaq, paykunaqa atipanaymantan kusikushanku, nispa. 4 ¡Uyariychis! ¡Orqokunapin uyarikun askha runaq ch'aqwasqan hina! ¡Uyariychis! ¡Llaqta puran qaparkachashanku suyukunapas huñuykukushanman hina! Tukuy-atiyniyoq Señor Diosmi soldadonkunata sapankata qhawaran maqanakuypaq wakichisqakunata. 5 Paykunan karu suyumanta hamunku, kay pachaq cantonmanta chayamunku, Señor Diosqa k'arak phiñasqan kashan, chaymi soldadonkunawan suyukunata purunyachinqa. 6 Señor Diospa muchuchinan p'unchaymi qayllamunña, Tukuy-atiyniyoqpa kachamusqan hatun llakiqa chayamunñan, chayrayku waqaychis. 7 Llapa runakunaq makinmi liwi kanqa, llapallankutaq kallpa wañuy kanqaku, 8 sinchi mancharisqan kanqaku. Sinchi nanasqan anchinqaku, wachakuq warmi hinan nanaywan q'ewikachakunqaku. Sapankan q'aqchasqa qhawarinakunqaku, uyankupas p'enqakuymantan sansarinqaraq. 9 Chayamushanñan Señor Diospa muchuchinan p'unchayqa, sinchi llaksakuy p'unchaymi kanqa, rawrarishaq k'arak phiñakuy p'unchaymi kanqa, kay pachatan purunyachinqa, chaypi kashaq huchasapakunatapas ch'usaqyachinqa. 10 Ch'askakunapas qoyllurkunapas manan k'anchamunqañachu, intipas lloqsirqamuspa hinan tutayapunqa, killapas manan k'anchamunqañachu. 11 Señor Diosmi nin: Kay pachatan mana chanin kayninmanta muchuchisaq, millay runakunatan huchankumanta wanachisaq. Hatunchakuqkunaq uma hoqariynintan p'uchukachisaq, usqhaylla phiñakuqkunatan, mana khuyapayakuqkunatan k'umuchisaq. 12 Ofirmanta apamusqa ch'uya qoriqa sinchi pisin, chay qorimantapas aswan pisiraqmi runakunaqa kanqa. 13 Hinaqtinmi hanaq pachapas chhaphchikunqa, kay pachapas tiyananmanta kuyurinqa rawrashaq k'arak phiñakuyniy hawa. 14 Runakunaqa taruka qatiykachasqamanmi rikch'akunqa, mana michiqniyoq oveja t'aqamanmi rikch'akunqa, sapankan kutipunqaku kikin ayllunkumankama, sapankan ayqekunqaku kikin hallp'ankumankama. 15 Pipas tarichikuqqa lanzawan sat'irqosqan wañunqa, ayqeshaq hap'isqapas espadawan k'irisqan wañunqa. 16 Wawakunapas taytankuq ñawpaqenpin pampaman ch'aqesqa kanqa, wasinkupas llat'anasqan kanqa, warminkupas violasqan kanqa. 17 Media suyu runakunatan paykuna contra kachamusaq, chay runakunaqa manan qolqe sonqochu, manan qoriman k'askasqapaschu kanku. 18 Wach'inankuwanmi waynakunata wañuchinqaku, chayllaraq naceqkunatapas manan khuyapayanqakuchu, erqekunatapas manan llakipayanqakuchu. 19 Babiloniaqa lliw suyukunamantapas ancha sumaqmi, chay hawan runakunaqa hatunchakunku, ichaqa Sodoma llaqtata Gomorra llaqtata hinan thunisaq. 20 Chaypiqa manan pipas hayk'aqpas tiyanqañachu, Arabe runakunapas manan chaypiqa karpakunqañachu, michiqkunapas manan uywankuta michinqañachu. 21 Chay llaqtapiqa salqa phiña animalkunallañan tiyanqa, wasikunatapas ch'useqkunallañan hunt'aykunqa, chaypiqa surikunallañan tiyanqa, salqa cabrakunallañan phawaykachanqa. 22 Pukara llaqtankunapipas chacalkunan aullakunqa, ancha sumaq wasikunapipas atoqkunan tiyanqa. Babiloniamanqa thunikunan p'unchaymi qayllaykamunña, Babiloniaqa pisi p'unchayllañan kanqa, nispa.
