Isaías 12

1Chay p'unchaypin ninki: Señor Diosníy, “Gracias”, nimuykin, k'arak phiñasqaña ñoqapaq karqanki chaypas, phiñakuyniykiqa ñan tiyaykunña, hinaspan sonqochawarqanki. 2Qespichiwaqniyqa Diospunin, manan manchakunichu, paymanmi hap'ipakuni, Señor Diosmi kallpachawaqniy, paymantan takini, paymi Qespichiqniy, nispa. 3Diospa qespichisqan kaspaykichismi kusikunkichis, imaynan mana ch'akiq unu pukyuyoq kusikun hinata, 4chay p'unchaymi ninkichis: Señor Diosman graciasta qoychis, sutinta hatunchaychis, suyukunaman paypa ruwasqankunamanta willaychis, Qollana kasqantapas sut'inchaychis. 5Señor Diosqa musphanakunatan ruwarqan, chayrayku payman takiychis, ruwasqankunataqa kay pachantin yachachun. 6Sionpi tiyaqkuna, kusikuymanta qapariychis, Israelpa Ch'uya Diosninqa ancha hatunmi, payqa llaqtan ukhupin kashan, nispa.

will be added

X\