Oseas 9

1Israel runakuna, ama kusikuychischu, Diospi mana iñiyniyoqkuna hinaqa ama q'ochukuychischu. Diosniykichismanta t'aqakuspaykichismi qhelli huchapi purirqankichis, trigo saruchinakunapi qhelli huchata ruwasqaykichismantan pago chaskiykuyta munankichis. 2Trigoykichispas vinoykichispas manan kawsanaykichispaq kapunqachu, upi vinoykichispas manan ukyanaykichispaq kapunqachu. 3Manan Señor Diospa suyunpi tiyankichisñachu, aswanmi Efraín runakunaqa Egipto suyuman kutinkichis, Asiria suyupitaq mana mikhuna qhelli mikhunata mikhunkichis. 4Manan vino ofrendakunata Señor Diosman hich'ankichischu, manan sacrificiokunatapas payman haywankichischu. Chay sacrificiokunapas ayaq kasqanpi mikhuna hinan kanqa, pipas chayta mikhuqqa qhellichakunqan. Mikhunaykichisqa yarqaynillaykichispaqmi kanqa, chay mikhuytaqa manan Señor Diospa wasinman apaykunkichischu. 5¿Imanankichistaq hatun fiesta p'unchaypi? ¿Imanankichistaq Señor Diosman qayllaykuna hatun p'unchaypi? 6¡Uyariychis! Muchunamanta ayqeshaqtiykichispas Egipto runakunan hap'isunkichis, Menfis llaqtapin p'ampasqa kankichis. Qolqe illaykichistan kisa p'ampaykapunqa, tiyanaykichispin khiska wiñaykapunqa. 7Muchuna p'unchaykunañan chayamun, ayni-kutichina p'unchaykunañan chayamun. ¡Israel suyu, chayamusqanta yachachun! Qankunan ninkichis: Profetaqa mana yuyayniyoqmi, Diospa yuyaychasqan runaqa waq'an, nispa. Hucha q'epi kaspan chaytaqa ninkichis, chaymi sinchita cheqnikuwankichis. 8Efraín runakunata qhawanaypaqmi Diosqa profetanta churawan, qankunan ichaqa tukuy ñanniykunapi urmachiyta munawankichis, Diospa wasinpipas ñoqataqa cheqnikuwankichismi. 9Gabaa llaqtapi sucedesqanta hinan sinchitapuni waqllipurqankichis. Señor Diostaqmi mana chanin ruwasqaykichista yuyarinqa, hinaspan huchallikusqaykichismanta muchuchisunkichis, nispa. 10Señor Diosmi nin: Israelta chayllaraq tarishaspayqa ch'inneqpi uvastapas tarishayman hinan karqan, ñawpaq rikhuriq higosta hinan, ñawpa taytaykichiskunataqa rikurqani. Ichaqa Baal-peorman chayaspankun Baal diosman sonqollikurqanku, chay munakusqanku ídolo hinan ancha millakuyman tukupurqanku. 11Efrainpa hatun-kayninqa urpi hinan phalaripunqa, manañan kanqachu naceqkunapas, wiksallisqakunapas, wiksapi kamakuqkunapas. 12Wawankutaña uywanqaku chaypas, ñoqan llapallanta wañuchisaq. ¡Imaynaraqmi paykunaqa kanqaku paykunamanta t'aqakapuqtiy! 13Ñoqan Efrainta rikurqani Tiro llaqta hina munay cheqaspi sayarichisqata, chaywanpas wawankunataqa wañuchinapaqmi horqomunqa, nispa. 14Señor Diosníy, paykunaman qoy... ichaqa, ¿imatan qowaq? Wiksankuta sulluqman tukuchiy, ñuñunkutapas ch'alqe ñuñuman tukuchiy. 15Señor Diosmi nin: Gilgalpin mana chanillantapuni ruwashanku, chaypin paykunata cheqnikuni. Millaykunata ruwasqankumantan wasiymanta paykunata qarqosaq, manañan paykunataqa munakusaqchu. Llapa umallinkunaqa ñoqa contran sayaripunku. 16Efraín runakunaqa polvillo onqoyniyoq mallki hinan, ch'akisqa saphiyoqkunan, manañan rurupunkuchu. Wawayoqña kankuman chaypas, ñoqan luylusqa wawankuta wañuchisaq, nispa. 17Diosniymi paykunata wikch'unqa, manan Dios kasukuyta munarqankuchu. Suyukuna ukhupitaqmi tumaqaya purinqaku.

will be added

X\