Oseas 7

1Llaqtayta wakmanta t'ikarichiqtiymi, Israel llaqtayta hampiqtiymi, Efrainpa huchallikusqan rikhurin, Samaria llaqtaq mana chanin ruwasqan rikhurin. Paykunaqa q'otushallankupunin, wasikunamanmi suwakuq haykunku, callekunapitaq runakunata ch'utinku. 2Ichaqa manan sonqonkupi reparankuchu tukuy mana chanin ruwasqankuta yuyayniypi hap'ishasqayta. Kunanqa ruwasqankun paykunata mat'iykushan, chaykunataqa qhawashallanipunin. 3Millay ruwasqankuwanmi reyta kusichinku, llullakusqankuwantaqmi umalli runakunatapas kusichinku. 4Llapallankun wasanchaqkuna hina wasanchanku. Hornopi pisillata rawraq nina hinan kanku, masa chapusqaq poqonankama t'anta masaqqa mana allintachu rawrachin, chay nina hinan lep'eqenku. 5Reyninkuq hatun p'unchayninpin umalli runankunaqa vinowan loqheyanku, reytaq asipayaqkunaman k'askakun. 6Contranpi yuyaykuspankuñan payman qayllaykunku, sonqonkun horno hina, tutantin pisillata rawran, tutamantataq qallusparaq rawraykushan. 7Llapallankun horno hinaraq rawrarinku, kamachiqninkutapas oqoykunkun. Sapanka reyninkun urmaytakama urmanku, manataqmi mayqenninkupas waqyakamuwanchu. 8Efraín runakunan wak llaqtakunawan chhaqrukapunku, Efraín runakunan huk lado uyan chayasqa t'anta hina kapunku. 9Wak llaqtayoqkunan kallpanta tukurqan, paytaq mana chayta reparakunchu. Soqo umallañan kapurqan, paytaq mana chayta reparakunchu. 10Israel runakunaq anchaykachayninkun paykuna contra rimarin, chaypas manan ñoqa Diosninku Señor Diosman kutirikamuwankuchu, manan maskhallawankupaschu. 11Efraín llaqtaqa mana yuyayniyoq urpi hinan, Egipto suyutan waqyakurqan, Asiria suyumanmi asuykurqan. 12Chayman rishaqtinkun, llikayta paykunaman wikch'uykusaq, phalaq animalkunata hinan paykunata urmachisaq, huñunakusqankuta uyarispan paykunata hap'isaq. 13Paykunaqa ñoqamantan t'aqakurqanku, ¡imaynaraqmi kanqaku! Paykunaqa awqaymi sayarirqanku, chaymi wañuchisqa kanqaku. Ñoqaqa paykunata kacharichiytan munarqani, paykunataq ichaqa ñoqa contra llullakuspa rimanku. 14Manan tukuy sonqochu waqyakamuwarqanku, aswanpas puñunankupin yanqalla llakipakushanku, trigota vinota mañakunankupaqmi mana iñiyniyoqkuna hina cuerponkuta kuchukunku. ¡Awqaymi sayaripushanku! 15Ñoqaña paykunata yachachirqani kallpacharqani chaypas, paykunaqa ñoqa contran mana allinkunata yuyaykunku. 16Mana valeq dioskunamanmi rinku, mana allin wach'i t'iwkachiq q'ewisqa p'eqta hinan kanku. Hatunchakuspa rimasqanku hawan umalli runankutaqa espada wañuchinqa, chaymi Egipto suyupi paykunataqa asipayanqaku, nispa.

will be added

X\