Oseas 6

1Israel runakunan ninku: Haku Señor Diosman kutirikapusunchis. Paymi llik'irqariwarqanchis, payllataqmi qhaliyachiwasunchispas, paymi k'iriwarqanchis, payllataqmi k'irinchista watawasunchispas. 2Iskay p'unchay qhepatan kawsarichiwasunchis, kinsakaq p'unchaypin sayarichiwasunchis, paypa qayllanpitaqmi kawsasunchispas. 3Señor Diosta reqsisun, reqsinanchispaqqa kallpachakullasunpuni. Imaynan pachaqa illarimunqapuni, chay hinan Señor Diosqa chayamuwasunchispuni, imaynan paraqa qhepatapas ñawpaqtapas hallp'aman paramunpuni, chay hinan Señor Diosqa chayamuwasunchispuni, nispa. 4Señor Diosmi nin: Efraín llaqta, ¿imanasqaykitaq? Judá llaqta, ¿imanasqaykitaq? Munakuwasqaykichisqa pacha phuyu hinallan, chinkaripuq pacha paqar sulla hinallan. 5Chayraykun qankunatapas profetakunawan ñut'uchirqaykichis, simi rimarisqaykunawanmi wañuchirqaykichis. Imaynatachus kawsanaykichista munasqaymi k'anchay hina rikhurimun. 6Khuyapayakuq kanaykichistan munani, sumaq kawsay sacrificiokunataqa manan munanichu, ruphachina sacrificiokunataqa manan munanichu, aswanpas ñoqata reqsiwanaykichistan munani. 7Paykunan ichaqa rimanakusqayta Adán hina p'akirqanku, chay hinatan wasanchawarqanku. 8Galaad llaqtaqa runa wañuchiqkunawan hunt'an, mana chanin ruwaqkunaq llaqtanmi. 9Imaynan suwakunaqa pitapas suyapanku, ahinatan sacerdote t'aqapas Shehem ñanpi runata wañuchinku, chay hinata ruwasqankuqa p'enqaymi. 10Israel suyupin sinchi millayta rikurqani, chaypin Efraín runakunaqa wasanchashallankupuni, Israel runakunaqa qhellichakushallankupuni. 11Yaw, Judá, ñan qanpaqpas muchunayki p'unchaytaqa unanchaniña.

will be added

X\