Oseas 5

1Señor Diosmi nin: ¡Yaw, sacerdotekuna, kayta uyariychis! ¡Yaw, Israel llaqta, maki uyariychis! ¡Yaw, reypa ayllun kaqkuna, maki uyariychis! Qankunan juzgasqa kankichis, Mizpapin toqlla karqankichis, Tabor orqo patapin mast'asqa llika karqankichis, 2Sitim pampapi p'uytu t'oqoqmi karqankichis, chaymi llapaykichista ñoqa muchuchisqaykichis. 3Ñoqan Efraín runakunata allinta reqsini, Israel runakunataqa sut'itapunin rikuni. Arí, Efraintaq wasanchawan chayqa, Israelqa qhellichakapunmi, nispa. 4Millay ruwasqankun Diosman kutirikapunankupaq mana kacharinchu. Qhelli huchapi puriyman k'askakuspankun Señor Diosta mana reqsinkuchu. 5Israel runakunaq anchaykachayninkun paykuna contra sut'ita rimarin. Efraín runakunan huchallikusqallankupitaq misk'akunku, Judá runakunapas paykunallawantaqmi misk'akunku. 6Ovejakunantin wakakunantinmi Señor Diosta maskhaspa purinqaku, ichaqa manan payta tarinqakuchu, paykunamanta Señor Dios t'aqakapusqanrayku. 7Paykunaqa Señor Diostan qheparparinku q'aqa wawakunata churiyaspa, chaymi mosoq killa rikhurimuqtin, paykunaqa chakrakunantin ch'inyachisqa kanqaku. 8Gabaapi waqrata tocaychis, Ramapipas putututa waqachiychis, awqa-tinkuypaq wakichikunapaq Bet-avenpi qapariychis: ¡Benjamín ayllu makilla qhawakuychis! nispa. 9Efraín runakunaqa muchuchiy p'unchaypin ch'inyachisqa kanqaku, cheqaqpuni kanantan Israel ayllukunapi willani. 10Señor Diosmi nin: Judá suyu umallikunaqa qorpakunata wasapaqkuna hinan kanqaku. Paykunamanmi k'arak phiñakuyniyta unuta hina chayachimusaq. 11Efraín runakunan sarunchasqa kashanku, rimanakuyman hina chaskisqanku hallp'akunatan qechuchikapunku, yanqa dioskunata qatikuytapuni munasqankurayku. 12Ñoqan Efraín suyupaq thuta kuru hina kasaq, Judá suyupaqtaq tullu ismuy hina kasaq. 13Efraín runakunan onqosqa kasqankuta reparakushaspanku Asiria suyuta rirqanku, Judá runakunataq ismuripusqankuta reparakushaspanku hatun reyman yanapay mañakuqta kacharqanku. Chay reyqa manan qhaliyachiyta atisunkichischu, ismurisqaykichistapas manan hampiykuyta atisunkichischu. 14León hinan Efraín runakunaman phawaykusaq, uña león hinan Judá runakunaman phawaykusaq. Ñoqa kikiymi paykunata llik'irqarisaq, hinaspaymi ripusaq. Paykunatan achurikuspa aysarikusaq, manataqmi pipas kacharichiwanqachu. 15Hinaspan maychus tiyanayman kutipusaq huchankumanta muchuspa maskhawanankukama, llakipakuyninkupin maskhawanqaku, nispa.

will be added

X\