1 Señor Diosqa nillawarqantaqmi: Rillaytaq, hinaspa warmiykita wakmanta munakamuy, wasanchaqña, wak qhariyoqña kan chaypas. Ahinatan ñoqa Señor Diosqa Israel runakunata munakuni, paykunaña wak dioskunaman kutirikapunku chaypas, chay dioskunaman pasas t'antakunata haywayta munanku chaypas, nispa. 2 Hinaqtinmi payta rantikurqani chunka phisqayoq qolqewan, huk fanega kuskannin cebadapiwan. 3 Hinaspan payta nirqani: Qanmi unayta ñoqawan tiyanki, aman rabona warmichu kanki, amallataq wak qhariwanpas puñunkichu, ñoqapas qanllawanpunin kasaq, nispa. 4 Unaymi Israel runakunaqa mana reyniyoq mana umalliyoq kanqaku, manan kanqachu sacrificiokunapas, yupaychana saywa ruminkupas, Diospa munayninta watunankupas, wasi idolonkupas. 5 Chay qhepatataqmi Israel runakunaqa kutimunqaku, hinaspan Señor Diosninkuta reyninku Davidtawan maskhanqaku. P'uchukay p'unchaykunapin manchakuywan Señor Diosman asuykunqaku, paytaqmi paykunata saminchanqa.
