1 Wawqeykichistan ninkichis: “Diospa llaqtanmi” kankichis, nispa. Panaykichistapas ninkichis: “Diospa khuyapayasqanmi” kankichis, nispa. 2 Señor Diosmi nin: Mamaykichista huchachaychis, payta huchachaychis, manan payqa warmiyñachu, manan ñoqapas qosanñachu kani. Rabona-kayninta saqepuchun, wasanchaq-kayninta wikch'upuchun. 3 Paqtan p'achanta ch'utispa q'alarpariyman, nacesqan p'unchaypi kasqanta hina ruwayman, purunyachipuyman, ch'aki hallp'allamanña tukuchiyman, hinaspa ch'akiymanta wañuchiyman. 4 Manan wawankunatapas khuyapayasaqchu, qhelli huchapi purispa tarisqan wawakuna kasqanrayku. 5 Mamanqa qhelli huchapin purirqan, paykunata wachaqqa p'enqaytan ruwarqan. Nirqanmi: Munakuwaqniykunata qatikusaq, paykunan qowan mikhunatapas, unutapas, millmatapas, linotapas, aceitetapas, ukyanatapas, nispa. 6 Chaymi ñanninta khiskawan wisq'asaq, rumi perqawanpas muyuykachisaq ñanninkunata manaña tarinanpaq. 7 Munakuqninkunaq qhepantan phawanqa, manataqmi taripanqachu, maskhaykunqan, manataqmi tarinqachu. Chaymi ninqa: Ñawpaq qosayman kutipusaq, paywanqa aswan allinmi karqani kunan kashasqaymantaqa, nispa. 8 Payqa manan yuyarikurqanchu ñoqa payman trigotapas, vinotapas, aceitetapas qosqayta. Ñoqan payman qolqetapas qoritapas askhata qorqani, paytaq ichaqa chaykunawan Baal diosta ruwachikurqan. 9 Chaymi ñoqaqa qechukapusaq poqosqaña trigoytapas ch'arwasqaña vinoytapas. Qechukapullasaqtaqmi p'achakunanpaq qoykusqay millmaytapas linoytapas. 10 Hinaspan munakuqninkunaq rikushasqan cuerponta q'alarparisaq. ¡Manan pipas makiymantaqa payta qechuwanqachu! 11 P'uchukachisaqmi lliw q'ochukuyninta, wata fiestankunata, mosoq killa p'unchayninkunata, samana p'unchayninkunata, llapa huñukuyninkunatapas. 12 Uvas chakrankunatapas higos sach'ankunatapas chaqorqarisaqmi, chaykunamantan payqa nirqan: Ñoqaqmi chaykunaqa, munakuwaqniykunaq pago qowasqanmi kakun, nispa. Chaykunatan qoraq tukusqan chakraman tukuchisaq, hinan salqa animalkuna chayta mikhunqa. 13 Hinaspan payta muchuchisaq Baal diospaq fiestata ruwasqanmanta. Chay fiestakunapin inciensowan Baalta q'apachirqan. Hinallataq walqanakunawan anillokunawan churakuspa qharinkunaq qhepanta phawarqan, ñoqatataq ichaqa qonqapuwarqan. Ñoqa Señor Diosmi chayta nini. 14 Ñoqan paypa sonqonta suwasaq, hinaspan ch'inneqman pusasaq, chaypin misk'itapuni rimaykusaq. 15 Hinamantataq uvas chakrankunata payman kutichipusaq, Acor wayq'otapas suyakuna punkumanmi tukuchisaq. Chaypin payqa sipasllaraq kashaspa k'askakuwasqanta hina k'askaykakapuwanqa, Egiptomanta lloqsimpusqan p'unchaypi hina. 16 Chaypachan: Qosáy, niwanqa, manañataqmi: Baalníy, niwanqachu. Ñoqa Señor Diosmi chayta nini. 17 “Baal” nispa rimaynintan chinkachipusaq, manataqmi hayk'aqpas chay sutitaqa rimarinqañachu. 18 Chay p'unchaykunapin Israel llaqtaq allinninpaq rimanakusaq salqa animalkunawan, phalaq animalkunawan mach'aqwaykunawan ima. Chinkachipusaqmi kay suyupi wach'ina p'eqtatapas, espadatapas, awqa-tinkuytapas, chhaynapi llaqtayqa thak-nisqa samakunanpaq. 19 Israel llaqta, ñoqan qanwan wiñaypaq casarakusaq, chaninninpin qanwan casarakusaq, sumaqtan uywasqayki, tukuy tiempon munakusqayki, khuyapayasqaykipas. 20 Qanwan casarakuspaymi qanpaq hunt'aqllapuni kasaq, chaypachan ñoqa Señor Diosta reqsiwanki. 21 Ñoqa Señor Diosmi nini: Chay p'unchaykunapin llaqtaypa mañakusqanta uyarimusaq. Ñoqan hanaq pachamanta hallp'a pachaman parachimusaq, 22 hallp'a pachataq ruruchinqa trigota, uvasta, olivotawan, chaykunatan Jezreelman qomusaq. 23 Ñoqan llaqtayta kay hallp'api serviwananpaq takyachisaq. “Lo-ruhamatan” khuyapayasaq, “Lo-ammitan”: Qanmi llaqtay kanki, nisaq. Paytaq: ¡Qanmi Diosniy kanki! niwanqa, nispa.
