1 Israel llaqtalláy, Diosniyki Señor Diosman kutipuy, huchallikuspan qanqa urmaykurqanki. 2 Señor Diosman kutirikapuychis, kay hinata mañakuspaykichis: Tukuy mana chanin kasqaykuta pampachaykuwayku, sumaqta chaskiykuwayku yupaychayniykuta qanman qomunaykupaq. 3 Manan Asiria suyuqa qespichiwanqakuchu, manañan maqanakuna caballomanpas sillakusaqkuchu, manan ima ruwasqaykutapas “diosniyku” nisaqkuñachu. Qanllan mana tayta-mamayoqta khuyapayaqqa kanki, nispa. 4 Señor Diosmi nin: Ñoqan mana kasuwasqankuta kasukuyman t'ikrasaq, tukuy sonqon paykunata munaykakapusaq, manañan paykunapaq k'arakta phiñakusaqchu. 5 Ñoqan Israel runakunapaq sulla hina kasaq, paykunataqmi hamanq'ay t'ika hina phanchirinqa, Líbano cedro sach'akuna hinan allin saphichasqa kanqa. 6 K'allmankunan mast'arikunqa, olivo sach'a hinan munayllaña kanqa, mallkikunayoq Líbano orqo-orqo hinan q'aparinqa. 7 Israel runakunan wakmanta llanthuypi tiyaykunqaku, hinaspan trigo hina wiñanqaku, uvas yura hinan t'ikanqaku, Líbano vino hinan ancha reqsisqa kanqaku. 8 Yaw, Efraín, ¿iman idolokunawan ruwanay? Ñoqan qanta uyarisqayki hinaspan waqaychasqayki. Ñoqan qanpaqqa q'omer ciprés sach'a hinallapuni kani, ñoqataqmi ruruchiqniykipas kani, nispa. 9 Pipas yachayniyoqqa kay simikunata yachachun, pipas yuyayniyoqqa kaykunata entiendechun. Señor Diospa ñanninkunaqa chaninkaman, chanin runakunataq chay ñanninta purinku, millay runakunataq ichaqa chaykunapi urmanku.
