Oseas 13

1Efraín ayllu rimariqtinqa llapallan payta manchakurqanku, Israel suyupin payta hatuncharqanku, ichaqa Baal diosta yupaychaspan Efrainqa huchallikurqan, hinaspan wañukapurqan. 2Kunanpas Efraín runakunaqa huchallikushallankun, qolqenkuta ninapi unuyachispan idolokunata ruwakunku, yuyaykusqankuman hina yachaqkunaq ruwasqan idolokunata ruwakunku. Hinaspan ninku: ¡Sacrificiokunata diosninchiskunaman haywaychis! nispa. Runakunataq torilloman rikch'akuq idolokunata much'anku. 3Chaymi illarimuy chinkapuq pacha phuyu hina kanqaku, usqhaylla chinkapuq pacha illariy sulla hina kanqaku, eramanta wayraq phukusqan ñut'u paja hina kanqaku, t'oqomanta lloqsiq q'osñi hina kanqaku. 4Señor Diosmi nin: Ñoqan Egipto suyupi kasqaykichismantapacha Diosniykichis Señor Dios kani. Manan qankunaqa wak Diosta reqsinkichischu, aswanpas ñoqallatan, manan wak qespichiqpas kanchu, aswanpas ñoqallan. 5Ñoqan ch'inneqpi waqaycharqaykichis, chay sansashaq pampapi cuidarqaykichis. 6Ñoqan qankunata michirqaykichis, hinan saksaykurqankichis. Saksaykuqtiykichistaq sonqoykichisqa hatunchakurqan, hinan qankunaqa qonqapuwarqankichis. 7Chaymi ñoqaqa qankunapaq león hina kasaq, leopardo hinan ñanpi qhamiyasqaykichis. 8Uñankunata chinkachikuq china ukumari hinan hap'irqarispa sonqo llikaykichistapas qhasurqarisaq. León hinan chaypi mikhusqaykichis, phiña salqa animal hinan llik'isqaykichis. 9Israel runakuna, ñoqan thunisqaykichis. ¿Pitaq yanapaykusunkichis? 10Chayri, ¿maytaq reyniykichis qespichinasuykichispaq? ¿Maytaq llapa llaqtaykichiskunapi umalli runaykichiskunapas? ¿Manachu qankunaqa: Reytapas umallikunatapas qowayku, nispa mañakuwarqankichis? 11Qankunapaq phiñakuspaymi reyta churapurqaykichis, qankunapaq k'arakta phiñakuspaytaqmi qechupurqaykichis. 12Efraín suyuq huchallikusqanqa qelqa k'uyupi qelqasqan kashan, chay hina waqaychasqan huchankunaqa kashan. 13Nacenan horan hunt'akun, ichaqa mana yuyayniyoq wawa kaspan, nacenanña kashaspanpas chakakun. 14¿Wañuy-pachaq atiyninmantachu paykunata kacharichisaq? ¿Wañuymantachu paykunata qespichisaq? Yaw, wañuy, ¿maytaq wañuchinayki? Yaw, wañuy-pacha, ¿maytaq muchuchinayki? ¡Manañan chay runakunata khuyapayasaqchu! 15Efraín suyuña qora hina t'ikarinqa chaypas, inti lloqsimuy lado rupha wayratan ñoqa Señor Diosqa ch'inneqmanta chayachimusaq, hinan pukyunpas ch'akipunqa, unu p'uytunpas tukukapunqa. Llapa chaniyoq waqaychasqa illankunatan awqanqa qechunqa. 16Ñoqa contra sayarisqanmantan Samaria llaqtaqa muchuchisqa kanqa, awqanpa espadanmi paykunata wañuchinqa, wawankunan pampaman ch'aqerqarisqa kanqa, wiksallisqa warmikunan khallarqarisqa kanqa, nispa.

will be added

X\