1 Efrainmi wayrata kawsaq-masinpaq hina qhawan, p'unchay-ch'isiyaqmi rupha wayraq qhepanta phawan, astawanmi llullakushanpas runatapas maqashan. Asiria suyuwanmi rimanakun, Egipto suyumanmi aceitetapas apachin, nispa. 2 Señor Diosmi Judá runakuna contra quejakushan, imaynachus purisqanman hinan Jacobpa mirayninta muchuchinqa, maychus ruwasqankunaman hinan payman kutichipunqa. 3 Jacobmi mamanpa wiksanpi wawqenta talonninmanta hap'irqan, wiñay tukusqaña kaspataq Dioswan hap'inakurqan. 4 Angelwanmi hap'inakurqan, hinaspan atiparqan, saminchananpaqmi waqaspa angelta valekurqan. Diosmi Jacobta Betelpi tarirqan, hinaspan chaypi paywan rimarqan. 5 Tukuy-atiyniyoq Señor Diosmi Payqa, Señor Diosmi sutinqa. 6 Qanqa Diosniykiq yanapaykusqan kutirikuy, cheqaqta munakuy, chaninta ruway, Diosniykiq ruwapunasuykita suyashallaypuni. 7 Efrainqa Canaán suyu runa hina mana chaninmi, waqllisqa balanzawanmi runa q'otuyta yachan. 8 Efrainmi nin: Arí, qhapaqyapunin, qhapaqmi kashani, ichaqa manan pipas mana chaninpi tarisqaymanta huchachawanmanchu, nispa. 9 Egipto suyupi kashasqaykimantapachan ñoqaqa Diosniyki Señor Dios kani, karpakunapin tiyachisqaykipas Ch'uklla Ruwana Fiesta p'unchaykunapi hina. 10 Profetakunamanmi rimaykurqani, sapa kutillan rikhuriykunata rikuchirqani, profetakunawanmi rikch'anachiy simikunata rimachirqani. 11 Galaadpin wak'a dioskunata yupaycharqanku, chaymi ch'usaqmanña tukupun. Gilgalpin torokunata sacrificanku, chaymi altarninkuqa chakrakunapi rumi soqyakuna hina kapunqa. 12 Jacobmi Aram hallp'aman ayqekurqan, Israelmi warmita tarinanpaq servipakurqan, warmita tarinanpaqmi uywata michipakurqan. 13 Señor Diosqa huk profetawanmi Egipto suyumanta Israel llaqtata horqomurqan, huk profetawanmi chay llaqtata waqaycharqan. 14 Efraín runakunan Señor Diosta sinchita phiñachirqanku, chaymi Señor Diosqa runa wañuchisqankumanta paykunata huchachanqa, Señor Diosqa pisichasqankumantan paykunata muchuchinqa.
