Oseas 11

1Señor Diosmi nin: Wawallaraq Israel llaqta kashaqtinmi, ñoqaqa payta munakurqani, chay churiytan Egipto suyumanta waqyamurqani. 2Ichaqa sapa kuti waqyaqtiymi, astawan ñoqamanta t'aqakuwarqan. Yanqa dioskunamanmi sacrificiokunata haywaqku, idolokunamanmi inciensota q'apachiqku. 3Ñoqan Efraín llaqtata puriyta yachachirqani, makinmanta hap'ikuspan purichirqani, chaywanpas paykunaqa manan repararqankuchu cuidasqayta. 4Sumaq sonqoywanmi, munakuyniywanmi, paykunaq sonqonta suwarqani, ñuñuq wawakunata hinan uyayman asuykachikurqani, paykunaman mikhuchinaypaqmi k'iraykurqani. 5Paykunan ichaqa mana kutirimuwayta munarqankuchu, chaymi Egipto suyuman mana kutinqakuchu, aswanpas Asiria suyu reymi paykunata kamachinqa. 6Llaqtankunapin awqankunaqa espada hap'intin phawaykachanqaku, allin perqasqa llaqtankupas thunisqan kanqa, yuyaykusqallankutaqmi paykunataqa chinkachinqa. 7Llaqtaymi ñoqamanta karunchakushallanpuni, Baal diosmanmi waqyakunku, chayraykun waqyakamuwaqtinkupas, mana uyarimusaqchu. 8Efrainlláy, ¿imaynan saqerparisqayki? Israel-lláy, ¿ñoqari wikch'urpariykimanchu? ¿Imaynan ñoqaqa Adma llaqta thunisqayta hina thuniykiman? ¿Imaynan ñoqaqa Zeboim llaqta ruwasqayta hina ruwaykiman? ¡Sonqoymi: Ch'allaq, niwan, anchatapunin llakipayashayki! 9Manan k'arakta phiñakusqayman hinapunichu ruwasaq, manan Efraín suyutaqa wakmanta thunisaqchu, Diosmi kani, manan runachu. Qanwan kaq Ch'uya Diosmi kani, manan phiñasqachu qankunaman hamusaq. 10Paykunaqa ñoqa Señor Diospa qhepaytan purinqaku, ñoqaqa león hinan qaparisaq. Qapariqtiymi wawaykunaqa chukchuspa inti haykuymanta hamunqaku. 11Phalaq animal hinan Egipto suyumanta khatatataspa phawamunqaku, Asiria suyumantan urpi hina phalamunqaku, hinan paykunata wakmanta wasinkupi tiyachisaq. Ñoqa Señor Diosmi chayta nini. 12Efraín runakunan sapa kutilla llullakuwarqan, Israel llaqtan pasaq kutilla q'otuwarqan. Judá runakunaqa ñoqamantan t'aqarikuwanku, idolokunapaqtaq hunt'aq kanku.

will be added

X\