1 Israel suyuqa k'allmasapa uvas yura hinan, pay kikinpaqmi askhata rurun. Askhata rurusqanman hinan altarkunatapas askhata perqarqan, suyunpa t'ikarisqanman hinan yupaychana saywa rumikunatapas astawan sumaqcharqan. 2 Israel suyuqa iskay sonqon, kunanqa huchanmantan muchuchisqa kanqa. Señor Diosmi altarninkunata ñut'unqa, yupaychana ruminkunatapas thuninqa. 3 Kunallanmi ninqaku: Manan reyninchis kanchu, Señor Diosta mana manchakusqanchisrayku, reyqa, ¿imatataq ñoqanchispaq ruwanman? nispa. 4 Yanqallan rimanku, yanqallan jurankupas rimanakunkupas, chaymi chaninchayqa mana chaninman tukupun, chakra wachukunapi wiñaq wañuna qora hinan. 5 Bet-avén llaqtapi qori torilloq apasqa kasqanmantan Samariapi tiyaqkunaqa khatatatanku. Chay torillomantan llaqtaqa waqashan, hinallataq chay ídolo yupaychaq sacerdotenkupas waqashan. Sumaqchasqa idolonkun apasqa kapushan, chaymi paykunaqa khuyayta waqashanku. 6 Torillo idolonkupas Asiria suyumanmi apasqa kanqa hatun reyman haywanankupaq. Ahinan Efraín runakunaqa p'enqachisqa kanqa, Israel suyun idolonmanta p'enqakunqa. 7 Samaria reymi chinkapunqa, mayupi tuyuq ñut'u k'aspi hina. 8 Mana chanin wak'a dios yupaychana cheqaskunapas thunisqan kanqa, chaykunapin Israel llaqtaqa astawan huchallikuq. Altarninkuna patapin khiskapas kisapas wiñanqa. Orqokunatan ninqaku: ¡Pakaykuwayku! nispa. Moqokunatan ninqaku: ¡Urmaykamuwayku! nispa. 9 Señor Diosmi nin: Gabaapi ñoqa contra huchallikusqaykichismantapachan Israel runakuna qankunaqa huchallikushallankichispuni, chaymi chay millay runakunamanqa Gabaapi awqa-tinkuy aypanqa. 10 Munasqay tiempopin paykunata muchuchisaq. Llaqtakunan paykuna contra huñukunqaku sinchi huchankumanta Israelta muchuchiqtiy. 11 Efrainqa llank'aq waka hinan, era saruytan munan, ichaqa sumaq kunkanmanmi yugota wataykuni, Efrainmi chutanqa, Judataq yapunqa, Jacobtaq rastranqa. 12 Chanin kawsay muhuta qankunapaq tarpuychis, cheqaqta munakuwasqaykichis rurutataq cosechaychis. Purunta qankunapaq chakmaychis ñoqa Señor Diosta maskhana p'unchaykunaña kasqanrayku. Ñoqata maskhawaychis saminchaykunata parata hina chayachimunaykama. 13 Qankunan ichaqa mana allinkaqta tarpurqankichis, mana chaninkaqtataq cosecharqankichis, hinaspan llullakuy ruruta mikhurqankichis. Atiyniykimanmi hap'ipakurqanki, askha kallpasapaykikunamanmi k'askakurqanki. 14 Maqanakuy qapariymi llaqtaykiman chayamunqa, llapa pukaraykikunapas thunisqan kanqa, imaynan Salmanqa Bet-arbel llaqtata thunispa awqa-tinkuy p'unchaypi mamakunatapas wawakunantinta ch'aqerqarirqan hinata. 15 Chay hinatan Betelpi tiyaqkunata ruwasunkichis sinchi huchaykichis hawa. Chay p'unchaymi tutallamanta Israel suyu reyqa wañurqochisqa kanqa, nispa.
