Oseas 1

1Judá suyupi rey Uzías, rey Jotam, rey Ahaz, rey Ezequías kamachikushaqtinkun, Israel suyupitaq Joaspa churin rey Jeroboam kamachikushaqtin, Señor Diosqa Beeriq churin Oseasta rimaykurqan. 2Señor Diosmi Oseaswan llaqtaman rimaykuyta qallarishaspa Oseasta nirqan: Llaqtayqa wasanchawaspanmi t'aqakapuwan, chayrayku rispa rabona warmiwan casarakamuy. Hinaspa chay rabonapi wawakunata churiyamuy, hinan “wasanchaq warmiq wawankuna” nisqa kanqaku, nispa. 3Chaymi Oseasqa Diblaimpa ususin Gomerwan casarakurqan. Paymi wiksallikuspa qhari wawata Oseaspaq wachakurqan. 4Hinan Señor Diosqa Oseasta nirqan: –Chay wawata Jezreel sutiwan sutichay. Kay pisi p'unchaykunallamantan rey Jehupa ayllunta muchuchisaq Jezreelpi runakunata wañurqarichisqanmanta, hinaspaymi wichay lado Israel suyuta chinkachipusaq. 5Chay p'unchaypin Jezreel wayq'opi Israel soldadokunaq atiyninta p'uchukachipusaq, nispa. 6Huktawanmi Gomerqa wiksallikuspa warmi wawata wachakurqan. Hinan Señor Diosqa Oseasta nirqan: –Chay wawata “Lo-ruhama” sutiwan sutichay, manañan Israel runakunata astawanpas khuyapayasaqñachu huchankuta pampachashanaypaq. 7Aswanpas Judá suyu runakunata khuyapayasaq, hinaspan ñoqa kikiy Diosninku Señor Dios paykunata qespichisaq, ichaqa manan wach'ina p'eqtawanchu, espadawanchu, awqa-tinkuywanchu, caballokunawanchu, caballopi sillakuq soldadokunawanpaschu, nispa. 8Lo-ruhama sutiyoq wawata hanuk'asqan qhepatataq Gomerqa wakmanta wiksallikurqan, hinaspan huk qhari wawata wachakurqan. 9Hinan Señor Diosqa Oseasta nirqan: –Chay wawata “Lo-ammi” sutiwan sutichay, manan qankunaqa llaqtayñachu kapunkichis, ñoqapas manan Diosniykichisñachu kapuni, nispa. 10Chaypas Israel runakunaqa lamar-qocha patapi aqo t'iyu hinan kanqaku, “Manan llaqtayñachu” nisqa cheqaspin “Kawsaq Diospa Wawankuna” nisqa kanqaku. 11Chaypachan Judá suyu runakunapas Israel suyu runakunapas hukllaman huñuykukunqaku, ch'ulla kamachiqllata churakunqaku, suyunkupipas t'ikarinqaku. ¡Jezreelpa t'ikarisqanqa ancha hatun p'unchaymi kanqa!

will be added

X\