Habacuc 3

1Profeta Habacucpa mañakusqan, llakiy-llakita takinapaq. 2Señor Diosnilláy, allin mentasqa kasqaykitan uyarirqani, Señor Diosnilláy, ruwasqaykikunamantan utirayarqani. Ñawpa ruwasqaykikunata kunanpas ruwallaytaq, kay p'unchaykunapi chaykunata rikuchiwayku. K'arakta phiñakuspaykipas khuyapayaykuwayku. 3Diosmi Temán suyumanta hamun, Ch'uya Diosmi Parán orqomanta hamun. Qhapaq-atiyninmi hanaq pachantinman mast'arikun, teqsimuyuntinpin payqa yupaychasqa kashan. 4Lliphipiyninpas inti k'anchay hinan, makinmantan illapakuna wach'imun, atiyniyoq kaspanmi payqa chaykunawan p'achakun. 5Ñawpaqentan wañuy onqoy phawan, qhepantan ruphapakuy onqoy purin. 6Pay sayaykuqtinmi kay pacha khatatatan, pay qhawariqtinmi suyukuna chukchun, ñawpa orqokunan thunikun, ñawpa moqokunan urmaykun, maypachamantapas chay hinatan payqa ruwan. 7Cusán runakunaq karpankunapin hatun llakita rikurqani, Madián runakunaq tiyananpin llaki phutiyta rikurqani. 8Señor Diosnilláy, ¿mayukunapaqchu phiñakurqanki? ¿Phawaq mayukunapaqchu phiñakurqanki? ¿Lamar-qochapaqchu k'arakta phiñakurqanki? ¿Chaychu, caballoykikunapi sillakurqanki, atipanaykipaq carretakunapipas phawamurqanki? 9P'eqtaykitan wach'inaykipaq wakichirqanki, llapa wach'inaykikunan wakichisqaña kashan. Mayukunawanmi kay pachata wayq'o-wayq'ota ruwachirqanki, 10qanta rikuspan orqokuna khatatatarqan, lloqlla unun phawarqan, ukhuy-ukhu lamar-qochan qaparirqan, chaykamataqmi phoqchiqesqankuna orqo hinaraq sayarirqan, 11wach'isqaykikuna k'anchariqtinmi, k'anchashaq lanzayki lliphipiriqtinmi, intipas killapas sayarqan. 12Phiñasqan teqsimuyuntinta charqaspa purirqanki, k'arak phiñasqan suyukunata sarurqanki. 13Llaqtaykita qespichinaykipaqmi lloqsimurqanki, akllasqayki reyta qespichinaykipaqmi hamurqanki. Millay runakunaq wasintan thunirqanki, teqsinkunataraqmi rikhurichirqanki. 14Soldadonkunan ch'eqechiwanankupaq sinchi wayra hina phawaykamuwarqanku, paykunaqa pakaykukuq wakcha runatan oqoykunankupaq qhawapayashanku, qanmi ichaqa umallinkuta wach'ispa ch'antirqanki. 15Lamar-qochantan caballoykikunapi purirqanki, askha unu ukhupin hatun phosoqokunata sayarichirqanki. 16Chaykunata uyariqtiymi sonqoy phatatatarqan, kunkanta uyariqtiymi simiy khatatatarqan. Tullu nanaymi hap'iwarqan, chakiymi susunhapurqan. Ichaqa Diosmi sinchi llakiwan muchuchinqa hamuq awqa soldadokunata, chaymi ñoqaqa chay p'unchayta pacienciawan suyakusaq. 17Higos sach'aña mana t'ikaqtinpas, uvas yurakunaña mana ruruqtinpas, olivo sach'aña mana ruruqtinpas, chakrakunapiña cosecha mana kaqtinpas, oveja t'aqaña wañurqarichisqa kaqtinpas, uywa kanchakunapiña wakakuna mana kaqtinpas, 18ñoqaqa Señor Dioswanmi kusikusaq, Qespichiqniy Dioswanmi q'ochukusaq. 19Apu Señor Diosmi kallpachawan, paymi tarukata hina purichiwanqa, paymi orqo patankunanta allintapuni purichiwanqa.

will be added

X\