Habacuc 2

1Qhawana patapin makilla qhawashasaq, perqa patapin sayashasaq, imatachus Señor Diospa niwanantan suyakusaq, quejakusqayman imatachus nimuwanantan suyakusaq. 2Hinan Señor Diosqa nimuwarqan: Rikuchisqayki chayta qelqay, p'alta k'arpapi sut'ita qelqay, chayta phawaylla leenapaq. 3Manaraqmi tiempo chayamunchu kay rikhuriypa hunt'akunanpaq, ichaqa hunt'akunqapunin, chay p'unchayqa sispaykamushanñan, qheparimunqaña chaypas, suyallay, tiemponpipunin chayamunqa. 4Chayrayku kay willakuyta qelqay: Mana chaninta ruwaq runaqa pisi kallpayanqan, chanin runan ichaqa Diospi iñispallapuni kawsanqa, niqta. 5Qhapaq kayqa runatan pantachin, imaymanata munapakuq runaqa k'ankaykachanmi, sonqonqa manan tiyanchu, Wañuy-pacha hinan hanllarin, wañuy hinan mana saksanchu, chaymi llapa suyukunapi munaychakun, llapa llaqtakunatan kamachiman tukuchin. 6Chay llapallan suyukunan payta takipayanqaku, pay contran k'askachita takinqaku: ¡Imaynaraqmi kanki! Qanqa hukkunamanta suwakuspaykin qhapaqyashanki. ¿Hayk'aqkamataq prenda hap'isqaykiwan qhapaq kaykunata huñushallanki? 7Qonqayllan manukuqniykikunaqa sayarimunqaku, paykunaqa rikch'arimuspan mancharichisunkiku, hinaspan imaymanaykita qechusunkiku. 8Askhallaña suyukunamantan llat'anarqanki, runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi wakin suyukunapas llat'anasunkiku. 9¡Ay, imaynaraqmi kanki! Familiaykitan suwakusqaykikunawan qhapaqyachirqanki, wasiykitapas mana piqpa chayananpin wasicharqanki mana piqpa imanananta yuyaspayki. 10Qanqa askha llaqta runakunatan waqllichirqanki, wasiykipi kaqkunatan p'enqayman churarqanki, qan kikillaykitataqmi waqllichikurqankipas. 11Perqa rumikunapas qan contran qaparinqaku, chakasqa kurkukunapas chay qaparisqatan yachapayanqaku. 12¡Ay, imaynaraqmi kanki! Runata wañuchispan llaqtata perqarqanki, mana chaninkunata ruwaspan llaqtata teqsicharqanki. 13Ahinaqa, chay runakunaq llank'asqanqa ninapaq llant'a hinan, suyukunaqa yanqan sayk'unku. ¿Manachu chayqa Tukuy-atiyniyoq Señor Diospa kamachikusqan? 14Imaynan lamar-qochaqa unuwan hunt'a kashan, chay hinan kay pachaqa Señor Diospa qhapaq-atiyninta reqsiq runakunawan hunt'a kanqa. 15¡Ay, imaynaraqmi kanki! Runamasiykitan chhaqrusqa vinowan machachirqanki, hinaspan q'ala kayninta qhawapayarqanki. 16Qanqa manan hatunchasqachu kanki, aswanpas p'enqaypin rikukunki. Qanpas kunanqa ukyallankitaqmi, hinaspan q'ala kayniykita rikuchikunki. Señor Diosmi paña makinwan phiñakuy hunt'a vasota haywamusunki, hinan hatun-kayniykiqa p'enqayman tukupunqa. 17Líbano orqokunapin sach'akunata kumparqanki, qantapas kumpasunkikun. Salqa animalkunatapas wañuchirqankin, qantapas wak animalkunan mancharichisunki. Runakunatan wañuchirqanki, suyukunatapas, llaqtakunatapas, chaykunapi llapa tiyaqtapas ch'utirqankin, chaymi chay muchuchiyqa taripamusunki. 18¿Imapaqtaq valen llaqllasqa idoloqa? Runallan chaytaqa llaqllarqan. ¿Imapaqtaq valen ninapi unuyachispa hich'asqa diospas? Llullakuyta yachachiqllan chayqa. Manan idolokunaqa rimayta atinchu, chaypas ídolo ruwaqqa chaykunamanpunin hap'ipakun. 19¡Ay, imaynaraqmi kanki! Qanmi k'ullu idolota: ¡Rikch'ariy! ninki. Mana rimariq rumitapas: ¡Sayariy! ninki. ¿Chaykunaqa imallatapas runata yuyaychanmanchu? Chaykunaqa qoriwan qolqewan qatasqan kashan, ichaqa manan kawsankuchu. 20Señor Diosmi ichaqa ch'uya wasinpi kashan, paypa qayllanpiqa kay pachantin runakuna upallachun.

will be added

X\