Génesis 41

1Iskay wataña pasaqtinmi Faraonqa mosqokurqan, mosqoyninpitaq payqa Nilo mayu patapi hina sayashasqa. 2Mayumantan lloqsimushasqa qanchis wira wakakuna llusk'allaña, hinaspa q'achu-q'achupi mikhushasqaku. 3Chaykuna qhepatataq mayumanta lloqsimushasqa qanchis millay toqti wakakuna, hinaspan sumaq wira wakakunaq qayllanpi mayu patapi sayaykurqanku. 4Hinaspanmi millay toqti wakakunaqa oqoykurqanku chay qanchis llusk'a wira wakakunata. Faraontaq rikch'arirqan. 5Wakmantan puñuykurqan, hinaspa iskaykaq kutipi mosqokurqan: Qanchis trigo uma rurusapallaña sumaqta wiñasqa ch'ulla tullullapi. 6Chaykuna qhepatataq lloqsimushasqa wak qanchis trigo umakuna ch'usukama rupha wayraq naq'echisqan. 7Chay qanchis ch'usu trigo umataq oqoykurqan chay qanchis trigo uma sumaqkaq rurusapata. Hinan Faraonqa rikch'arirqan, chayqa mosqoyllataq kasqa. 8Tutamantataq hawapi-ukhupi sonqoyoq karqan, hinaspan waqyachimurqan Egiptopi llapan watuqkunata, llapan yachayniyoqkunatawan. Hinaspanmi Faraonqa paykunaman willarqan mosqokusqankunata, ichaqa manan pipas karqanchu Faraonpa mosqokusqanta sut'inchaq. 9Hinaqtinmi copa haywaqkunaq umallinqa Faraonta nirqan: –Kunanmi huchaykunata yuyarini. 10Maypachachus qanqa kamachiykikunapaq phiñakurqanki, guardia umalliq wasinmantaq presota apachiwarqankiku, ñoqata hinallataq t'anta ruwaqkunaq umallintapas. 11Chaypachan paywan ñoqawan kasqan tutalla mosqokurqayku, sapanka mosqoytaq sut'inchanayoqkama karqan. 12Chaypin ñoqaykuwan kasharqan huk Hebreo wayna, guardia umalliq kamachin. Paymanmi chayta willarqayku, paytaq mosqokusqaykuta sut'inchapuwarqanku, hinan sapankaman imachus kasqanta willawarqanku. 13Chaymi mosqoyniykuta paypa sut'inchasqanman hina karqan: Ñoqan llank'anayman churasqa kapurqani, hukkaqtaq seq'osqa kapurqan, nispa. 14Chaymi Faraonqa Joseta waqyachimurqan. Hinan usqhaylla carcelmanta horqomurqanku, sunkhantapas k'isukuspataq wak p'achawan p'achakurqan, hinaspa hamurqan. 15Hinan Faraonqa Joseta nirqan: –Ñoqan mosqokuni, manataq pipas kanchu chayta sut'inchay atiq, chaywanpas qanmanta willakuqtan uyarini: Mosqokusqakunatan uyarin, hinaspan chaykunata sut'inchan, nisqata. 16Josetaq Faraonta nirqan: –Ñoqaqa manan imapaschu kani, Diosmi mosqokusqaykitaqa willasunki sonqoyki tiyaykunanpaq, nispa. 17Chaymi Faraonqa Joseman willarqan: –Mosqoyniypin Nilo mayu patapi hina kashasqani, 18hinan mayumanta lloqsimushasqa qanchis llusk'a wira wakakuna, hinaspan q'achu-q'achupi mikhushasqaku. 19Chaykuna qhepatataq qanchis millay toqti wakakuna lloqsimushasqa, sinchi tullu, manan chaykuna hina millaytaqa rikurqanichu Egiptontinpipas. 20Chay toqti wakakunan oqoykushasqaku ñawpaqkaq qanchis wira wakakunata. 21Chay oqoykusqanku wakakunaqa manan reparakurqanchu, chay toqtikunaqa kasqan millayllapunin ñawpaq hina kasharqanku. Hinaspan rikch'arirqani. 22Chaymantapas mosqokullarqanitaqmi, hinaspan rikurqani: qanchis trigo uman wiñasqa ch'ulla tullullapi, rurusapataq sumaqtaq kasqa. 23Hinallataq qanchis trigo uma, ch'usu, ch'akisqa, rupha wayraq naq'echisqan chaykuna qhepata wiñasqa. 24Hinaspanmi ch'usu trigo umaqa oqoykusqa qanchis sumaq umakunata. Chaytan willaniña watuqkunaman, manataq pipas kanchu chayta sut'inchapuwananpaq, nispa. 25Hinaqtinmi Joseqa Faraonta nirqan: –Mosqokusqaykiqa kaqkamallan, Diosmi imatachus ruwananta rikuchirqasunki. 26Qanchis sumaq wakakunaqa qanchis watan, qanchis sumaq trigo umakunapas qanchis watan, mosqoyqa kaqkamallan. 27Qhepankuta lloqsimuq qanchis millay toqti wakakunapas qanchis watan, chay qanchis trigo uma ch'usullaña rupha wayraq naq'echisqanpas, qanchis wata yarqay kananmi. 28Iman kaqllatan qanman willayki, Diosmi imatachus ruwananta rikuchirqasunki. 29Egipto suyupin qanchis wata askhallaña mikhuy kanqa, 30chaykuna qhepatataq qanchis wata yarqay kanqa. Chaymi askhallaña mikhuypa Egipto suyupi kasqanqa qonqasqa kanqa, suyuntintataq yarqayqa hasut'inqa. 31Chay askhallaña mikhuypa kasqanqa manan reparakunqachu qhepanta yarqay hamusqanrayku, chay yarqayqa sinchipunin kanqa. 32Iskay kutita mosqokusqaykiqa willakun Diospa cheqaqtapuni yuyaykusqantan, hinallataq Diosqa usqhayllata chayta hunt'anantawan. 33Chayraykun kunan yuyaychayki, huk yuyayniyoq yachayniyoq qharita maskhay, hinaspa Egipto suyupi llank'achiqta churay. 34Kaytapas ruwallaytaq, suyuntinpi kamachikuqkunata churay, hinaspa qanchis watantin askha cosechamanta Egipto suyuntinpi phisqa costalmanta hukninta t'aqaspa huñuchunku. 35Hinaspa kay hamuq allin watakunapi llapa mikhuyta huñuchunku, kamachiytaq trigota churanankupaq llaqtakunapipas mikhuna kananpaq, hinaspataq waqaychachunku. 36Chay mikhuytaqa waqaychachunku suyupaq, Egipto suyupi qanchis wata yarqay kanqa chaypaq, chaymi suyuqa yarqaymanta mana wañunqachu, nispa. 37Chay yuyaychaytan Faraonqa allinpaq hap'irqan, hinallataq oficialninkunapas, 38hinaspan Faraonqa paykunata nirqan: –¿Kay runata hina hukta tarisunmanchu? Diospa Espiritunmi paypiqa kashan, nispa. 39Hinaspanmi Faraonqa Joseta nirqan: –Diosmi lliw chaykunata yachachisunki, manan kanchu qan hina yuyayniyoqpas yachayniyoqpas. 40Qanmi palacioypi kamachikunki, kamachikusqaykitan llapa llaqta kasusunki, kamachikuna tiyanallapin ñoqaqa qanmanta kurak kasaq. 41Qhawariy, ñoqan churayki Egipto suyuntinpi kamachikunaykipaq, nispa. 42Hinaspanmi Faraonqa makinmanta selloyoq anillonta horqokuspa chayta Josepa makinman churaykurqan, sinchi fino lino p'achawantaq p'achachirqan, kunkanmantaq walqaykurqan huk qori walqanata. 43Chaymantataq iskaykaq carretanman wichachirqan, hinaspa ñawpaqenpi waqyakurqanku: ¡Qonqorikuychis! nispa. Chhaynatan Egipto suyuntinpi churarqan. 44Chaymantataq Faraonqa Joseta nirqan: –Ñoqan Faraón kani, mana simiykimantaqa manan pipas Egipto suyuntinpi kuyurinqachu, nispa. 45Faraonqa Joseta suticharqan Zafnat-paneata, hinaspanmi payta casarachirqan On llaqta sacerdote Potiferaq ususin Asenatwan. Ahinapin Joseqa Egipto suyuntinta purirqan. 46Joseqa kinsa chunka watayoqmi karqan Egipto rey Faraonpa qayllanman pusashaqtinku. Joseqa Faraonpa qayllanmanta lloqsispanmi Egipto suyuntinta purirqan. 47Chay qanchis allin watakunapin mikhuyqa askhallataña rururqan. 48Chaymi payqa huñurqan qanchis watantin mikhuyta, Egipto suyupi ruruqta, hinaspan mikhuyta llaqtakunapi waqaycharqan, muyuriqnin campo mikhuyta sapanka llaqtapi churachispa. 49Joseqa trigota huñurqan lamar-qocha aqota hinaraqmi, sinchi askhallataña mana yupay atinakama, manañan yuparqankuñachu. 50Josepaqqa nacerqan iskay wawakunan manaraq ñawpaqkaq yarqay wata chayamushaqtin, chaykunatan On llaqta sacerdote Potiferaq ususin Asenat paypaq wachakurqan. 51Joseqa phiwi churintan suticharqan Manasesta, nirqanmi: Diosmi qonqachipuwan lliw muchuyniyta, taytaypa lliw aylluntapas, nispa. 52Hukkaqtataq suticharqan Efrainta, nirqanmi: Diosmi mirachiwan llakikusqay suyupi, nispa. 53Chay hinatan Egipto suyupi askhallataña mikhuypa rurusqan qanchis wata hunt'akurqan, 54hinaspan qanchis wata yarqay qallarirqan, Josepa ñawpaqmantaña willakusqanman hina. Llapa suyukunapin yarqay karqan, Egipto suyuntinpin ichaqa mikhuy karqan. 55Egipto runakunaqa mikhunanku tukukapuqtinmi, Faraonman mikhunata mañakuspa qaparirqanku. Faraontaq llapa Egipto runakunata nirqan: –Joseman riychis, hinaspa ruwaychis imatachus pay nisunkichis chayta, nispa. 56Yarqaytaq tukuy suyuntinpi karqan, chaymi Joseqa kicharirqan llapa taqe wasikunata, hinaspan trigota Egipto runakunaman venderqan, Egipto suyupiqa sinchipunin yarqayqa karqan. 57Hinantinmantan Egiptoman hamurqanku Josemanta rantikuq, hinantin pachapi sinchi yarqay kaqtin.

will be added

X\