Génesis 3

1Mach'aqwayqa Señor Diospa ruwasqan llapan salqa animalkunamantapas aswan yuyaysapan karqan. Hinan warmita nirqan: –¡Ahá! ¿Dioschu nirqasunkichis: Aman mikhunkichischu huertapi llapa sach'a ruruta, nispa? nispa. 2Warmitaq mach'aqwayman kutichirqan: –Huertapi sach'akunaq ruruntaqa atiykun mikhuyta, 3huerta chawpipi kaq sach'a rurullatan manaqa, Diosmi niwarqanku: Aman chaytaqa mikhunkichischu, amallataq llamiykunkichispaschu, mana chayqa wañunkichismi, nispa. 4Hinaqtinmi mach'aqwayqa warmita nirqan: –Manapunin wañunkichischu. 5Diosqa yachanmi chayta mikhuqtiykichis hina ñawiykichis kicharikunanta, hinaspa Dios hina allinkaqta mana allinkaqta reqsiq kanaykichista, nispa. 6Hinan warmiqa qhawarirqan sach'a ruruqa mikhunapaq sumaqllaña, munayllaña kasqanta, yachayniyoq kanapaq munapayana kasqantapas. P'itispataq mikhuykurqan, hinaspa qosanman haywarirqan, hinan paypas mikhuykullarqantaq. 7Hinaqtinmi iskayninkuq ñawinkuqa kicharikurqan, hinaspan reparanakurqanku q'alalla kashasqankuta. Hinan higos raphita siraspanku p'istunakunata ruwakurqanku. 8Hinaspanmi tarde kinray wayrarimuyta Señor Diospa huertapi purishasqanta uyarirqanku, hinan Señor Diospa qayllanmanta warmi-qhari huerta sach'a-sach'api pakakurqanku. 9Señor Diostaq qharita waqyaspa nirqan: –¿Maypin kashanki? nispa. 10Paytaq kutichirqan: –Huertapi purishaqtiykin kunkaykita uyarispa manchakurqani q'alalla kashasqayrayku, chaymi pakakurqani, nispa. 11Diostaq tapurqan: –¿Pitaq willarqasunki q'alalla kashasqaykita? ¿Hark'arqayki chay sach'a rurutachu mikhurqanki? nispa. 12Qharitaq kutichirqan: –Kawsaysiwananpaq qowasqayki warmin sach'a ruruta qowarqan, hinan mikhurqani, nispa. 13Hinaqtinmi Señor Diosqa warmita nirqan: –¿Imatan ruwarqanki? nispa. Warmitaq nirqan: –Mach'aqwaymi q'otuwarqan, hinan mikhurqani, nispa. 14Chaymi Señor Diosqa mach'aqwayta nirqan: –Kayta ruwasqaykiraykun uywakuna ukhupi, lliw salqa animalkuna ukhupipas ñakasqa kanki. Lliw kawsasqayki p'unchaypin suchuspa purinki, ñut'u hallp'atan hak'unki. 15Qantawan warmitawanmi cheqninachisqaykichis, mirayniykitawanpas paypa miraynintawanpas, mirayninmi umaykipi t'ustusunki, qantaq talonninpi kaninki, nispa. 16Warmitataq nirqan: –Wiksallikuspaykin sinchita ñak'arinki, nanaywanmi wawakunata wachakunki. Munasqaykitaq qosaykiman apasunki, paytaq kamachisunki, nispa. 17Qharitataq nirqan: –Warmiykita kasusqaykiraykun, hark'arqayki chay sach'a ruruta mikhusqaykiraykun, qan hawa hallp'aqa ñakasqa kanqa, sayk'uywanmi hallp'ata ruruchinki, chaytan tukuy kawsasqayki p'unchaykuna mikhunki. 18Khiskakunan kisakunan wiñapusunki, k'ita q'omerkunatataq mikhunki. 19Hump'iykita hich'arispan mikhunata tarinki ruwasqa kasqayki hallp'aman tukunaykikama, ñut'u hallp'an kanki, ñut'u hallp'amantaqmi tukupunki, nispa. 20Qhariqa warmintan suticharqan Evata, payqa llapa kawsaqkunaq maman kasqanrayku. 21Señor Diostaq qharipaq warmipaqwan qaramanta p'achata ruwapurqan, hinaspan paykunata p'achaykachirqan. 22Hinaspan nirqan: –Kayqa, qhariqa hukninchis hinan kapun allinkaqta mana allinkaqta yachaspa. Kunanqa, paqtan makinta haywarispa kawsay sach'aq rurunta p'itinman, mikhuspataq wiñaypaq kawsanman, nispa. 23Chaymi Señor Diosqa Edén huertamanta payta wikch'umpurqan hallp'ata llank'ananpaq. Payqa chay hallp'amanta ruwasqan karqan. 24Qharita qarqomuspataq, Edén huertaq inti lloqsimuy ladonpi churarqan querubinkunata, tukuyneqman wach'iq nina espadatapas, kawsay sach'aman ñanta hark'ananpaq.

will be added

X\